Daniel 7 - NTSHOB NSI

Mbwe njem Daniel: nyàm kuà

¹ A lo be mbwe ngu'njù fen Baltazar, mfen Babilon, Daniel yen njem, nzi njem, ndùs'a ke nzi num kunndà se là. Ndùlala a kite njem, nsoṅ njoṅ tshu fa ts'a be ntùm bwe là.

² Daniel tshob ndù: Ndùse me ke ndôte mum njem tèttswe' là, tshù, me yen fetmbaṅ fe num bag kamànyam kuà nse' nyi'te dibantse ndùb.

³ Nyàm ndùbndùb tum ntùm dibantse kuà, mo' ke fute mo'.

⁴ Mbwe nyàm fute ngwayit; ngù mbàb ghammàtat; me nke ndôte tà nkum ndùse bo tsho' mbàb mi là; bo tsho' i nsi, a tsin tù num nku mi mba mènntùn nà, bo fà ntù mènntùn yi.

⁵ Mbatte nyàm bàa fute mbù tshwèt, ntsin tù bag ntshù'. A lo ghù nkitnsa ntshu i ntat netèt nsô mi, bo nke ntshob yi ndù: Lo nsi mfèt mbàb yàme.

⁶ Yen nà be tôge, me nke ndôte, njen mo' nyàm, a fute nzwimàntô, ndù a ghù mbàb nkuà num mvèn i mba saṅ nà; yen nyàm nà lo ghù tu tse kuà, ndù bo fà netô yi.

⁷ Yen nà be tôge, me nke ndôte mum njem tèttswe', njen mbatte nyàm kuà ndù a kuni, mfét wut mbèn nta ntshùate. A lo ghù nsô ndùbndùb, mi tùne; a nke mfèle, mbe'te, mbèn nyiaṅte ju z'a tù' là nku. A lo ke fute nyàm tse bo bwôg be là; a ghù ndô mi gham.

⁸ Mba me ke ndôte tshen ndô là là, mo' metsit ndô ko' netèt bo; bo tsho' mbwe ndô tat mbwe yen ndô là. Yen metsit ndô là ghù miag mi mba mi mènntùn nà, ngù ntshu z'a be ndo' nka'te yi là.

Njwèn mèn bo Mén mèn

⁹ Me nke ndôte ndùse bo ke nte ndiaṅkwa là. Mbwe mèn mum ntswe'njù mi tswe nsi mbwe njwèn mèn. Nzwe i fôg mba nywinmbaṅ nà, nyiaṅtu tse làn mba ndeb là. Diaṅkwa se be mba ngwat mbwôg là, nku mi be mba mbwôg z'a tshwèt nkù nge' là.

¹⁰ Mo' mbwôg tum mbwe i mba ta'ntse là nke nké' nène. Ben ntsha'ntsha' nke mfa' yi. Ben ntshu'ntshu' tsinte mbwe i. Ghatsho'te tswete nsi, nga' ṅwa'ni.

¹¹ Me nke nke' ndôte mba ndô ke ntshob ntshob ka'te là, be ndùse me yen nyàm ze bo zwi i là, ndù bo bagte wul i, ma' ntùm mbwôg ndù a kù i.

¹² Mbe se' mba tshé' nyàm nà, bo kwé netô bo, là njôg mbam bon ntswe'njù yôg bo, tà nkum num mo' ngelaṅ, ndùse nu ku' là.

¹³ Me nke ndôte mum njem tèttswe', tshù, njen mèn a nke nse' num ndot mba Mén mèn nà. A nèn nkum mbaṅ mbwe mèn mum ntswe'njù mi, bo lo' i nèn yi mbwe i.

¹⁴ Bo fà netô yi, mfà nkuni yi, mfà nufen yi. Njoṅ nzwit benntùn fa mum ntshob nzenze nke mfa' yi. Ze netô b'a netô yen nà z'a ke nsi mi, ndù a tswe matmat là. Sàm ju ke nsi bagte nufen se.

Ntote ntun mbwe njem

¹⁵ Me Daniel, ntù àm lo tume, njem tse me yen nà zwiaṅt'àm.

¹⁶ Me kù'te nèn mbaṅ mo' mèn netèt tse bo tsinte bwe là mbètt'é ndù a soṅ àm nenùn njoṅ tshen tshu là fa. A bùnte me, ngù me lèn ntun njoṅ tshen tshu là fa.

¹⁷ Tshen nyàm ndùb kuà là, b'a fenfen kuà tse bo nsi lo num tsha' là.

¹⁸ Ben nelàn tse bo be tse Nsi z'a mfe tù là nsi kwé nufen, nufen ghô bo matmat, ghô bo ngu'ngu'.

¹⁹ Yen nà be tôge, me kô nelèn nu mfà num mbatte nyàm kuà z'a na' mbe ke fute njoṅ tsemo' fa là. A lo kuni neshu, ngù nsô tùne, mba nkib tùne, nke mfèle, mbe'te mbèn nyiaṅte mba ke lo z'a tù' là nku.

²⁰ Me lo kô nelèn nu num ndô gham ts'a be num tu i là; nkô nelèn nu num mo' ndô z'a tume, tse tat vùte nsi mbwe i là. Yen ndô là lo ghù miag mba ntshu z'a be ntshob ntshob ka'te là. A lo ghù ntshù mebwô ntshùa tsemo'o.

²¹ Me lo yen ndô là nke ma' ben nelàn ntsho, ntshùa yube,

²² tà nkum ndùse mbwe mèn mum ntswe'njù mi se' mfà mba' ben nelàn tse bo be tse Nsi z'a tà mfe tù là. Yen ngelaṅ nà ben nelàn kwé nufen ntùm mbu mube.

²³ A tshob me ndù: Mbatte nyàm kuà b'a mbatte nufen kuà z'a nsi be num nsitsha'a, be ke fute tsemo' nufen nà; a nsi jù njoṅ tsha' fa, nyiaṅte benntùn nku, nyiaṅte tshé' benntùn nku.

²⁴ Ndô gham b'a fenfen gham tse bo nsi tum num yen nufen nà là. Mo' mfen nsi tum njam bo, be ke fute mbwe fenfen. A nsi kôgte fenfen tat.

²⁵ A nsi tshob ntshob num Nsi z'a mfe tù là, fétte ben nelàn tse bo be tse Nsi z'a mfe tù là, ke nywinte nebate ngelaṅ bo ntshù'. Bo nsi swèn ben nelàn mum mbu mi num ngu'njù tat kam.

²⁶ Yen nà nsi be tôg netsho'te se'e, bo kwé ze netô, bagt'é, biagt'é matmat.

²⁷ Nesa'a, netô, bo ze nezi njoṅ nufen fa ts'a tun bam kamànyam nà, nsi tù' à ze nzwit ben nelàn tse bo be tse Nsi z'a mfe tù là. Ze nesa' b'a nesa' z'a tswe matmat là; njoṅ ghatô fa nsi fa' yi bèn ju' ntshu i.

²⁸ Tshù dù' tshô mi li. Me Daniel, nkwatenu màm lo tshu' tu àm, me nyamte se àm, ndé' men ntshob là mum ntù àm.