Daniel 6 - NTSHOB NSI

¹ Darius, ze Media, lo' nufen, ndù a kum ngu' ntshob bàa ṅam ntôge.

Ghakeban Daniel dù' ywi' mbwe i

² Darius yen ndù a bwô a ghù ba tàmànjô bon bàa nkù, njabte yub mum njoṅ ze nufen fa.

³ Ghatô yub be ntu tat, Daniel be netèt tshen ben tat là; tshen tàmànjô li b'a neke nsoṅ yub tshu ts'a be ntôg là, mba ndù kà mfen ju' ngùtni num sàm ju.

⁴ Daniel nke ntshùa tsemo' ghatô bo tàmànjô, num ywèt ndùb ts'a be num i là. Ndùlala mfen nke nkwate neyab i num tu njoṅ ze nufen fa.

⁵ Ndùlala ghatô boa tàmànjô to' nediag nu ngô te tu Daniel lo' bot'é yi, là ke ku'ni nefon sàm nu ke lo' lo, nummbe Daniel na' mb'a mèn netsine, mbe ndù sàm nu lo ke be num i, a ke bèn nto' fàn tse nu.

⁶ Tshen ben ni tshob ndù: Be be ke fon sàm nu nelo' ngom yen Daniel li yi, kà tag nda' netshùa be njam ntshù' ze Nsi, kà mfon nu nelo' ngom i yi.

⁷ Ndùlala tshen ghatô boa tshen tàmànjô li kù nde nèn mbwe mfen, ntshob yi ndù: Mfen Darius tswe matmat!

⁸ Njoṅ ghatô fa, njoṅ tàmànjô fa, njoṅ ghafà ntag fa boa njoṅ ngomna tse fa be ntshu ntshù' ndù mfen fà ntshù', ntshob ndù: Mba we lo, neto' mum lé'njù ze ntshù' tum nà, z'a le'te mo' nsi ke mo' mènntùn no, kà ke b'a nda' wù mfen nà, mb'a bwô ndù bo ma' i ntùm tàm ba ngwayit me mfen.

⁹ Ndonni a bwô ndù mfen fà yen ntshù' là, nkite kàn, ndù sen kàn nà ghô ndùlala, mb'a be ntùm ntshù' Media bo Persia z'a ke' be bate là.

¹⁰ A tshùa ndùlala mfen Darius kite kàn bo ntshù'.

Bo ma' Daniel ntùm tàm ngwayit

¹¹ Ndùse Daniel ju' ndù bo kite ntshù' là, a lo nèn ndà i, num laṅ ba' s'a tù, tôndà nke ndôte nze bag Yérusalém nà. A nke nte ntunkekwi' mi nsi, nde'te Nsi i, nyàmt'é, mb'a ke nto' ngù mbwembwe là.

¹² Tshen benntùn nà lo' tshu'te ntsho yi ndà, ntèt Daniel a nke nde'te Nsi i mbèn nke ntsiaṅ i.

¹³ Ndùlala bo nèn mbwe mfen, ntshob num nu ntshù' mfen ndù: O lo ke kite ntshù' ntshob mum bwe ndù mba we lo z'a be kum lé'njù ṅam ntat, a le'te mba zit nsi lo ke mo' mènntùn no kà ke nda' wù mfen nà, mba bo nsi ma' i mum tàm ba ngwayit ké mfen? Mfen bùnte ndù: A b'a ndùlala mba ntshù' Media bo ze Persia z'a ke' be bate tshob là.

¹⁴ Ndùlala bo tshob mbwe mfen ndù: Daniel mo' mèn netèt kuan ntsho tse bo fe Yuda là ke' lo' o mba ju là; a ndùlala, a be nde'te Nsi yoṅ tat ta' lé'njù.

¹⁵ Mfen ju' yen nu là nu tse sag i; a yab ntù i ndù a' kag Daniel; a diag nze neyôg i tà nèn nkum mben nyam.

¹⁶ Là tshen benntùn nà saṅlaṅ mbaṅ mfen, ntshob yi ndù: Mfen, a bwô o lèn ndù ntshù' z'o fà là ke' ghù nebate, ndaṅndaṅ mb'a be mum kàn Media bo se Persia là.

¹⁷ Ndùlala mfen tshob ndù bo lo' Daniel nèn ma' i mum tàm ba ngwayit. Mfen tshob Daniel ndù: A bwô ndù Nsi o z'o be mfa' yi ntùm kagtùn nà tshu' o.

¹⁸ Bo lo' loṅ nse' nkabte ntshu tàme, mfen te sitam i mba ze kamkam tse bwe, ndù kà sàm ju bate num ze nu Daniel.

¹⁹ Yen nà be tôge, mfen nèn ntshwèl i; a zi nziku'u, ke bam sàm màndà i diaṅ mbaṅ i; lèn laglo ke tsho tu i.

Daniel tum ntshu vù ntùm tàm ngwayit

²⁰ Mfen lo nsi nkebnjù, mà mfôgnjù, nèn ntshu tàm ngwayit be ndende.

²¹ Mfen be ghebte mbaṅ tàm, ntsiaṅ Daniel ntùm nze nenywine. A tshob Daniel ndù: Daniel ngafa' Nsi z'a be ntùn, Nsi o z'o be mfa' yi num njoṅ yu kagtùn fa là tshu' o bu ba ngwayit ké?

²² Daniel tshob mfen ndù: Mfen, tswe matmat.

²³ Nsi àm lo ntum Angél, mem ntshu ba ngwayit, bo ke' ghù sàm kebwô num àm, nummbe Nsi àm lo yen ndù me b'a mbu' mbwe i; mba kua' mbwe wù mfen me ke' ghù sàm nukebwô.

²⁴ Ndùlala mfen ghù mà tsiaṅte ndùb ntù i, ntshob bo sô Daniel tàm. Bo sô Daniel tàm lèn mfaṅ ke be num i, nummb'a lo yab ntù num Nsi i.

²⁵ Mfen tshob bo lo' benntùn tse bo bote Daniel là nèn ma' yub tàm ba ngwayit, bo, bon tshob mba zwi tshobe; bo yoṅ mbe kum nsi tàm ndù ba ngwayit ghom yube, mbe'te mvôg mube.

²⁶ Yen nà lo be tshùa mfen Darius kite njoṅ nzwit benntùn fa, njoṅ ngôngô fa mba njoṅ ntshob fa, tse bo be ntswe num njoṅ nsitsha' fa là, ntshob ndù: A bwô ndù mà fite ndùb be bin!

²⁷ A bwô ndù njoṅ benntùn fa mum yàm nufen fa, ke mbwôge, mbèn mvètte mbwe Nsi Daniel. Nummb'a b'a Nsi z'a be ntùn, ndù a tswe matmat là; ze nufen ke nsi zi sate, ze netô nsi tswe kà kum miagt'é.

²⁸ A yi ke ntshu' mèn mbèn njôg i; a yi ke ngù nsa boa nu netshàm mfe kamànyam mba num tsha'a. A yi bèn ntshu' Daniel mbu ngù' ba ngwayit.

²⁹ Daniel zi num ze ngelaṅ fen Darius, mba num ze Kirus ze Persia.