Daniel 4 - NTSHOB NSI

Njem mbatte bàa ze mfen yen nà: tù ndùb

¹ Mfen Nébukanetsar tshob njoṅ nzwit benntùn fa, njoṅ ngôngô fa mba njoṅ benntùn fa mum njoṅ ntshob fa tse bo be ntswe num njoṅ nsitsha' fa là ndù: A bwô ndù fite be bin kua' yàm yàme.

² Me yen ndù a bwô me soṅ nsa boa nu netshàm tse Nsi z'a be tà mfe tù ghù num àm nà.

³ Mi' tse nsa ghu' neshu! Mi' tse nu netshàm ta neshu! Ze nufen b'a nufen z'a tswe matmat là, ze netô tswe tse ngu'ngu'.

⁴ Tu wul àm Nébukanetsar lo ke njôg tshàm mum fite ndà àm, nke ntswe tshàm mebwô ntùm ntshwèl àm.

⁵ Me lo zi mo' njem a kag bwôg num àm; nkwate mi a ke ngùtni àm num kunndà sàm bo tshùalo tse me ke njen nà lo ma' fétwut num àm.

⁶ Ndùlala me tshob bo tsiaṅ ghazenu fa tse bo Babilon nà, ndù bo tote ntun njem me.

⁷ Ghangame, ghaka, ba Kaldéa mba ghalèn nsa se' mbwe àm, me soṅ yub yen njem nà, là bo ke soṅ àm ntote tun mi.

⁸ A be miagte, Daniel ze lén se be Beltasar, mum lén nsi àm, se' mbwe àm, ndù a ghù ywèt ba nsi tse nelàne. Yen ngelaṅ nà me soṅ i njem.

⁹ Beltasar, wù z'o be mfen ghangam nà, me lèn ndù o ghù ywèt ba nsi tse nelàn num o, ndèn ndù sàm mesin ke' be tshùa o. Tshù njem ze me zi li, soṅ àm ntote tun mi.

¹⁰ Tshù njem ts'a se' tu àm ndùse me be num kunndà sàm ni: Me lo ke ndôte, njen mo' mà zi tù, ndù a sage, netèt tsha'a.

¹¹ Sen tù là lo tù' se ndùb, mbèn nta. Ntshaṅ i lo ke nko' tà nèn nkum mfe kamànyam, bo nke ntsin num njoṅ ntôg njù fa njen i.

¹² Mfu mi lo bwô, ntàm mi yàm; jujù njoṅ benntùn fa ke ntum a num i; njoṅ nyàm tshwèt fa nke mfite bam netshaṅ i; bon nsaṅ nke nabte yub dù'ntswe mum nkaṅ mi. Njoṅ tshu nezwiag fa ke njù à num i.

¹³ Me lo ke ndôte njem ts'a se' tu àm num kunndà sàm nà, njen mo' Ngalôte dù', mèn nelàne, a nke nswe' mfe kamànyam.

¹⁴ A kua' nze neta ntshob ndù: Bin keb tù, bin tshu'te nkaṅ mi, bin nyi'te mfu mi, bin sate ntàm mi. A bwô ndù nyàm tum bam bwe nkù, bon nsaṅ tum mum nkaṅ mi nkù.

¹⁵ Là bin faṅ tun i dù' ze nga tse be là mum tsha'a. Bin lo' tshan nkul i yi boa tùne, netèt nenà. A bwô ndù meme' mi a swe' kamànyam nà zwi' i, ze jujù bèn mb'a nenà ndaṅndaṅ mba nyàm tshwèt là.

Daniel tote ntun njem mfen

¹⁶ A bwô ndù bo sô ntù mènntùn z'a ghù là, mfà ntù nyàm yi. Zwiaṅ njù sammbàa nsi tôg num i.

¹⁷ Yen ntshù' li ghalôte dù' bèn ntshobe; yen nu li benntùn bèn nabte, ndùlala ndù mba zit mènntùn lo lèn ndù a b'a Nsi z'a be tà mfe tù là bèn nke ntô njoṅ nufen benntùn fa. A num mfà fen mba we lo ze nu tse bwô i là, nke mbù'te fenyu' mèn z'a be netèt benntùn nà.

¹⁸ Tshù njem ze tu wul àm mfen Nébukanetsar yen nà. Tu wul o Beltasar fà ntote tun mi me. Nummbe njoṅ ghazenu fa mum yàm nufen ke' ku'ni netot'é me. Tu wul o ku'ni, nummb'o ghù ywèt ba nsi nelàn num o.

¹⁹ Ndùlala nu tshùa Daniel ze lén se be Beltasar là, nkwatenu mi kag bwôg num i. Mfen tshob yi ndù: A ke' bwô ndù njem bo ntote tun mi kag bwôg num o. Beltasar bùnte ntshob ndù: Tshùaben àm, a bwô ndù yen njem nà lôt'a ben tse bo be mban o là, ntote tun mi lôte ghakeban tsho.

²⁰ Tù s'o yen ndù a ghu', nta, se ntshaṅ i ko' nkum tà mfe kamànyam, bo nke ntsin num ntôg njù fa njen i là,

²¹ sen tù là se mfu mi bwô, ntàm mi yàm, a nke mfà jujù njoṅ benntùn fafa là, sen tù se nyàm tshwèt ke ntswe bam netshaṅ i, bon nsaṅ nke ntswe mum nkaṅ mi là,

²² b'a wù mfen z'o tù' mèn ndùb mba nganeta, yu nezi ko' tà nèn nkum kamànyam, yu netô zin tà nkum num ntôg njù là.

²³ Mfen yen mo' ngalôte dù', mèn nelàne, swe' mfe kamànyam ntshob ndù: Bin ke' tù, mbagt'é; là bin faṅ tun i dù' ze nga tse be bwe là nsi; bin kul i boa tshan mba ntùn mum nenà, ndù meme' mi a swe' mfe kamànyam nà zwi' i, ze jujù bèn mb'a nenà ndaṅndaṅ mba nyàm tshwèt là, tà nkum ndùse zwiaṅ njù sammbàa nsi tôg num i.

²⁴ Tshù ntote tun mi li me mfen. Tshù ntshù' Nsi z'a tà mfe tù z'a kwag tshùaben àm mfen ni:

Njem bumte

²⁵ Mba wù là, bo nsi yoṅ o netèt benntùn, k'o ke ntswe à bin à nyàm tshwèt. Bo nsi lo' à nenà kém o yi mba nyàmna' là, lo' meme' ywèl o yi. Zwiaṅ njù sammbàa nsi tôg num o, tà nkum ndùs'o lèn ndù Nsi z'a tà mfe tù be ntô nufen benntùn, nke mfà nufen nà mba we lo z'a kô i là.

²⁶ Dù' ze bo tshob ndù bo faṅ tun tù dù' nga tse be là la't'a ndù nufen o nsi tù'ù, a be z'a be be mànjam o lèn ndù kamànyam bèn ngù njoṅ netô fa là.

²⁷ A ndùlala a bwô ndù mfen ju' men ntag màm ni mebwô. A bwô ndù o tsin neghù nukebwô, ngù nunetsine, ntsin nefàn nu, ngù kondèn num ghayennge'; ndù so fu' zin nèn mbwe.

²⁸ Njoṅ yen nu là fa lo tsho num mfen Nébukanetsar.

²⁹ Ṅwù ntshob bàa gham lo be tôge, mfen nke nkatte tù ba' fen z'a be ntshwèt Babilon nà,

³⁰ ntshob ndù: Yen ni ke b'a mà zi Babilon ze me kut nelo' ngù dù'ntswe fen yi li ké? Me ke' lo' yàm mba', yàm neta, num nkuni nufen àm kà nkut yi ndù ké?

³¹ Men ntshob li ke yoṅ mi ntshu i, mo' nze swe' mfe kamànyam ntshob ndù: Bo ke ntshob yen nu li à wù me mfen Nébukanetsar! Bo kwé nufen o wù.

³² Bo nsi yoṅ o netèt benntùn, yu dù'ntswe tù' b'a netèt nyàm tshwèt. Bo nsi kém o nenà mba ba nyàmna' là; zwiaṅ njù sammbàa nsi tôg num o tà nkum ndùs'o lèn ndù Nsi z'a be tà mfe tù bèn nke ntô nufen benntùn, mbèn nke mfà i mèn z'a kô là.

³³ Be ndùse men ntshob là bumte num Nébukanetsar: Bo yoṅ i netèt benntùn, a fèt nenà mba ba nyàmna' là, meme' mi a swe' mfe kamànyam nà naṅ num wul i, nyiaṅtu tse ku' mba tse tsi là, nkib mi be mba nkib nku njùmbwe là.

³⁴ Ngelaṅ ze Nsi yab là lo ku'u, me Nébukanetsar me bù' miag màm mfe kamànyam, nkwate bèn nse' me. Me nyàmte Nsi z'a tà mfe tù là, me le'te, ngamte mèn z'a tswe matmat, mèn ze ze netô tswe matmat, mèn ze ze nufen tswe ngu'ngu' là.

³⁵ Njoṅ benntùn fa ntùm njù ke b'a sàm ju num miag mi. A be ngù à mb'a bwô i là boa ntshu ntsho kamànyam, ngù à mb'a bwô i là boa benntùn ntùm njù. Sàm mènntùn ke bwe z'a ku'ni neta tu yi, ke netshob ndù: O ghù à ke là.

³⁶ Num yen ngelaṅ nà, nkwate bèn nse' me; Nsi bèn mba' ghamte yàm nufen, nkuni yàm nufen mba nku'ni yàm nufen me; tshàm ghafà ntag mba tshàm ben ndùbndùb bèn mbètt'àm; bo bèn nte àm mum yàm nufen, yàm mba' nke nsin be nesine.

³⁷ Ndonni me Nébukanetsar, me tshwèt nyàmte, nke ndabte, nke ngamte mfen kamànyam. Njoṅ mfa' mi fa mba njoṅ tse manze fa b'a netsine. A ghù nekôg ben tse bo be nzin mum ko'tewut là ma' nsi.