Daniel 11 - NTSHOB NSI

Ntsho netèt mfen tun ntèn bo mfen tu

¹ A b'a yàm bu neta, mbe ngatomt'àm.

² Ndonni m'a' soṅ o nunenùne. Fenfen tat nsi be Persia. Mbatte kuà nsi ghù tshunkàb tshùa tsemo'o. Ndùs'a nsi tshùa njam tshunkàb tse tù' mèn neta là, a nsi lo' njoṅ i fa lo yi nsi num nufen Javan.

³ Là mo' neta kwatum nsi lo, tô ntùm mà neta ndùb, ghù mba ke lo z'a kô là.

⁴ Ndùs'a nsi zi kua' neshu là, nufen i nsi kebe, bo ghabt'é mum bag njù kuà; yen nufen nà ke nsi b'a mum mbu ze nzwit; bo ke nsi tô i mb'a ke ntô là, nummbe bo nsi fagt'é, ghabt'é tsemo' ben.

⁵ Mfen tun ntèn nsi tù' mèn neta. Là mo' nkam i nsi ta ntshùa i, tô; ze netô nsi zi neshu.

⁶ A nsi be kum tsemo' ngu'njù bo wat kàn, ngon mfen tun ntèn nèn mbaṅ mfen tu, ndù bo yi nabte nu. Là neta bu i ke nsi ghubte, a ke nsi taṅ nga, yi mba bu i. Bo nsi swèn i boa ben tse bo nsi lo' i nèn te là, tàab mba mèn z'a na' mbe ze ntom yen ngelaṅ nà là.

⁷ Mo' tob tù nsi bit num nga tse num ze dù'. A nsi nèn mbaṅ ntshu ntsho, tsho ntùm ntshwèt mfen tu, ghù nu num bo, tù' mèn neta.

⁸ A nsi lo' nsi tshobe, neto tshob tse tùn mba tshu tshob tse nkàb bo gol nèn yi mba ntsha' ntsho là mà Egipto. A nsi tsin nesà mbaṅ mfen tu num tsemo' ngu'njù.

⁹ A nsi se' mum nufen ntèn, bèn bèn ntùm ze ngô.

¹⁰ Bon tse nsi nèn tshwèt mba koṅntse là, dutte, bèn bèn njam. Bo nsi yab nge' tà nèn nkum ntùm ntshwèt mfen z'a tunntèn nà.

¹¹ Mfen tunntèn nsi ya ntù tum kam mfen tu ntsho. A nsi kam bwoṅ soyé yàme; tse soyé mfen tu nsi vù mum mbu mi.

¹² Yen bwoṅ soyé là nsi lo nsi, ṅwate be ntù i. A nsi biagte benntùn ntshu'ntshu', l'a ke nsi tshùa ntsho.

¹³ Nummbe mfen tu nsi bèn se' tse'te mo' bwoṅ soyé z'a yàm neshu ntshùa mbwe i là. A nsi be tshùa tsemo' ntswe'njù, tsemo' ngu'njù, a lo nsi num ntsho boa ntshu ntsho ndùb mba tshunkàb yàme.

¹⁴ Num yen ngelaṅ nà benntùn yàm nsi lo nsi num mfen tunntèn, ghafètte lem tum netèt yu nzwit mèn nta tu, ndùlala ndù bo ghù njem bumte, là bo nsi vù.

¹⁵ Mfen tu nsi kù'te, tswe' nsam, lo' ngô tse bo kut neta kàbngô bwe là. Tse soyé mfen ntèn boa tse ben neta fa ke nsi tsin tù mbwe i, nummbe ngù' nsi bwoṅ bo.

¹⁶ Mèn z'a nsi lo nsi num i là nsi ghù mb'a kô là, sàm mèn ke tsin mbwe i se se. A nsi tsin ntùm mbwô ngô, biagte mba ke lo z'a vù bu i là.

¹⁷ A nsi ghù nkwate netô njoṅ ze nufen fa mba newat kàn bo yi. A nsi fà ta' mènnzwi yi, ndù a tshùa bwe nsat'é; là yen nu là ke nsi ghù ze dù' ke bèn mbe.

¹⁸ A nsi tù' te lag à mum bag ngô ts'a tètntse là, lo' tse yàme. Là mo' mfen nsi tshèt tuswe z'a tshwèt nkô neso tu i là, ghù a bèn ngwù à be tu i.

¹⁹ A nsi bèn njam ntùm ze ngô. A nsi tiage, vù bo be ke bèn njen i.

²⁰ Mo' mèn nsi se' num ze dù', yab nge' kà yab mbu mi num nkuni fen. A nsi be tshùa tsemo' bon lé'njù bo be't'é. A ke nsi tshùa à num yantù, ke bèn ntshùa mba num ntsho.

²¹ Mo' fenyu' mèn nsi lo' ze dù', bo be ke fà nku'ni fen yi. A nsi lo' fite lo' kwé nufen yi, a nsi tshùa à njam fùte.

²² Ba soyé tse bo nsi sa mba koṅntse là nsi bite mbwe i, bo nsi biagte yube, mba mfen z'a wat kàn nà.

²³ Ndùse bo nsi tamte num i là, a tatte. A nsi lo nsi num bo, lo' metsit bwoṅ benntùn tshùa yub yi.

²⁴ A nsi tsho ntùm dù' tsha' mebwô z'a yen bag ngô là l'a mum fite; a nsi ghù ju tà tse ke tànjam tse lo na' mbe ke to' ghù là; a nsi ghabte ntsha', ghabte tshu tse bo lagte là mba tshu mebwô. A nsi tàmte nu mum ngô tse bo kut là, là mb'a nda' num mo' mén ngelaṅ.

²⁵ A nsi tshùb tu ntshu ntsho ndùb, lo' ze neta bo ze ngù' lo yi nsi num mfen tun ntèn. Mfen tun ntèn nsi lo nsi num ntsho boa ntshu ntsho ndùb mba ze neta; l'a ke nsi ghù mo' sàm ju, nummbe bo a nabte nkwate kebwô num i.

²⁶ Ben tse bo nsi jù tshujù num téblé se là nsi ghù a bi; tse soyé nsi sa tshwèt mba koṅntse là, fe ben vùte tshwèt yàme.

²⁷ Fenfen bàa nsi diag neghù nukebwô ntù bo; bo nsi tswe num téblé ntshù' ke tshob tatte. Là yen nà ke nsi vù lag, nummbe miagte ngelaṅ nsi b'a be kua' num ze ngelaṅ i.

²⁸ A nsi bèn ntùm ngô i bo tshunkàb ndùbndùb, là ntù i nsi lo nsi num kàn nelàne; a nsi ghù kebwô num i; yen nà nsi be tôg a bèn njam mum ngô i.

²⁹ Ngelaṅ lo ku'u, a bèn ndo nsi num tun ntèn, l'a ke be yen yoṅ i li a mb'a be mbwe yoṅ i là.

³⁰ Ba sitima nsi lo Kittim se' num i, mbu mi yube. A nsi bèn njam yen ngelaṅ nà lo' zwentù yab nu yi num kàn nelàne. Là, a nsi be ntshu ntshù' boa ben tse bo ghua' kàn nelàn nà.

³¹ Ba soyé tse nsi wag kàn Ndà Nsi, tsho bwe, biagte jule'te Nsi z'a ke mbe njoṅ ndù fa là, lo' ze mat neghamte Nsi z'a bag ntshùate là nse' yi.

³² Ben tse bo be mfàn kàn nà, a nsi lo' yub kaṅ ghamfùm yi njam ntshob fùte. Là ben tse bo lèn Nsi yub là nsi fèn ntù ghù mba bo ku'ni là.

³³ Ghasiaṅte ntùm ngô nsi tswite benntùn yàme; bo nsi tiag vù num ṅwi bo lambwôg mum ndà kuan, bo lag ntsha' yub.

³⁴ Ke bo tiag lo, mba metsit bwoṅ benntùn bèn se' ywimte yube. Benntùn yàm nsi tsho yub shun num fùte.

³⁵ Tsemo' ghasiaṅte nsi tiage, ndùlala ndù bo lànte yube, ntswite yube, nse' yub bo fôge, tà nkum miagte ngelaṅ. Nummbe yen nu là nsi b'a kua' num ngelaṅ i ze bo nabte njab là.

³⁶ Mfen nsi ghù mb'a kô là, ka'te bèn nyàmte wul i, ko' tu njoṅ nsi fa; a nsi tshob nu ke to' tshob num Nsi ba nsi, ke nèn be mbwe tà nkum ndùse yantù dunte là; nummbe mba ke lo ze bo na' ntàm nu bwe là nsi bumte.

³⁷ Ngelaṅ ke nsi be yi num tse nsi tà tse, ke num tse nsi bènnzwi ts'a be ndôte yub là lo, ke bèn ngù tse ngelaṅ num sàm nsi mba ntshù'. A nsi nyàmte wul i, ko' tu njoṅ nsi fa.

³⁸ A nsi ghamte nsi ngô tse bo kut là num yub dù'; nsi ze tà tse na' mbe ke lèn i là; a nsi lo' gol, nkàb, ndoṅ tanjoṅ mba tshu tse njoṅ i ta là ghamt'é yi.

³⁹ A nsi lo' nsi ba ghùn ghù nu yi mum ngô tse bo kut là; mba we lo z'a nsi bam ze nu là, a nsi fà ghamte yàm yi, a nsi ghù a ke ntô benntùn yàme, bèn fà tsha' yi num ze nda'.

⁴⁰ A nsi be num miagte ngelaṅ mfen tunntèn lo nsi num i, mfen tu vù num i mba fetmbaṅ nà boa nkalige; ghako' nyàmdiaṅ mba nsitima yàme. A nsi ke lo' tsha'a, sa mba koṅntse là kà ya'a.

⁴¹ A nsi tsho mum ngô z'a bwô ntshùate là, tse yàm nsi vù; là Edom, Moab mba kamkam bon Ammon nsi tum mum mbu mi.

⁴² A nsi tshag bu mum ngôngô nzenze, ngô Egipto ke nsi tum ntshu i.

⁴³ A nsi tù' ngatô tshunkàb gol bo nkàb, mba njoṅ tshu ntùn fa Egipto. Ba Libia mba ba Etiopia nsi bwe njam i.

⁴⁴ Tshô ts'a nsi fe bag ntumnyam mba tu là nsi kag bwôg num i, a lo' tshùagntù ndùb nèn tete tse ntàb ntshwèt netèt dibantse bo mbat nkuni, mbat nelàne. Sàm mèn ke nsi ywimt'é num miagte ngelaṅ.

⁴⁵ A nsi kut ba ntàb mfen ni netèt dibantse bo kônga nelàne z'a be ntùm ngô ndù a bwô ntshùa tsemo' là. A b'a bwe là ze vùkob nsi koṅ i, kà sàm mèn ke ywimt'é là.