Daniel 10 - NTSHOB NSI

Mo' njem nswe: Mènntùn ma' nzwe ndeb

¹ A lo be num mbatte ngu'njù tat mba Kirus be mfen Persia là, mo' ntshob se' Daniel ze bo ke ntsiaṅ i Beltasar là mum njem ndù: Men ntshob li mi a b'a mi nenùn nà ke ntshob nu mfà à num nge'. A kù' ntoṅ num men ntshob là, zenu se' yi num yen njem nà.

² Num yen ngelaṅ nà, me Daniel me tswe nsivù num ngabnjù tat.

³ Me lo ke bèn njù jujù ntùn, mbàb bo ndu' ke bèn ntsho ntshu àm; me ke bèn mbé'te mfèt tà nkum ndùse tshen ngabnjù tat là tôg là.

⁴ Mum lé'njù ntshob kuà ṅam mbàa ntùm mbwe maṅwù, me lo be kaṅ ta'ntse ndùb z'a b'a Hiddékél là.

⁵ Me bù' miag màm nke ndôte, njen mo' mèn ndù a ma' nzwe mebwô. Ntaṅ kob gol Ufaz tun i.

⁶ Wul i lo b'a mba krisôlitô là, se i nke nké' mba beba'mbaṅ nà, miag mi be mba lambwôg là. Mbu mi bo nku mi fute tùn se bo kwite là, là nz'é be mba tshu'te bwoṅ benntùn yàm nà.

⁷ Me Daniel na' njen njem à tù' me, benntùn tse bag à bo be là ke yen tshobe, là mo' mà bwôg ndùb ghom yube, bo kù nèn ndende.

⁸ Me na' ntù' à tù' me, me lo zi yen njem ndùb là. Neta lo bwoṅ me, se àm kaṅ ntshù mi, mbate tse, sàm ngù' ke bèn mbe me.

⁹ Me ju' là ntshob mi, ndùse me ju' là ntshob mi là, me tsho' ntam nsi, nkab se àm nsi.

¹⁰ Tshù, mo' bu kwag àm, nyi'te ntammbwe màm bo mbu màm,

¹¹ ntshob me ndù: Daniel ze nkôni, kù' ntoṅ nju' ntshob mi me nsi tshob wù là; tsin tù num dù' z'o be bwe là; nummbe bo tum àm mbaṅ o ndonni. Ndùs'a tshob me ndùlala là, me tsin tù, nke mvètte.

¹² A tshob me ndù: Daniel kà bwôg sàm ju; nummbe fe lé'njù s'o to' netshùb men ntshob là ntù o, mbèn mfà wul o nsi mbwe Nsi o là, Nsi lo ju' ntshob mu, a ju z'a ghù kà me nse' là.

¹³ Mfen Persia lo ta tu me mum lé'njù ntshob ntshù' ṅam sammbàa; là Angél Mikaél mo' mèn netèt kamkam tse lo ywimt'àm, me ghô mbaṅ fenfen Persia.

¹⁴ Ndonni me se' soṅ o ju z'a nsi tsho num yu nzwit mèn ngelaṅ mànjam nà; nummbe njem ke nke' ndôt'a tshen ngelaṅ nà.

¹⁵ Mb'a ke ntshob men ntshob là me là, me ma' miag màm num tsha'a, ntswe ke tshob nu.

¹⁶ Tshù, mo' mèn z'a ghù ntshù bon mènntùn nà kwag nkub ntshu màm. Me gha' ntshu àm, ntshobe, ntshob mèn z'a tsin mbwe àm nà ndù: Tshùaben àm, njem kag fétwut num àm, njoṅ yàm ngù' fa mi.

¹⁷ Be me ngafa' Tshùaben àm ghù netshobte bag Tshùaben àm, ndùse neta ke' bèn mbe me, zwiag mi num àm n'a ndùke?

¹⁸ Ndùlala mèn z'a na' ngù ntshù mènntùn nà bèn nkwag àm, nso neta num àm.

¹⁹ A tshob me ndù: Kà bwôg sàm ju, o b'a mèn ze Nsi kô i là, fite be wù, fèn ntù, fèn ntù! Ndùs'a ke nke' ntshob me là, neta bèn nse' me, me tshob ndù: A bwô ndù Tshùaben àm tshobe, nummb'o so ngù' num àm.

²⁰ A tshob me ndù: O lèn ju z'a ghù me se' mbaṅ o là ké? Ndonni me tshwèt mbèn njam num nele' mfen Persia ntsho; mfen Javan nsi se' ndùse me nsi nèn nà.

²¹ Là, me nsi soṅ o ju ze bo kite mum ṅwa'ni nenùn nà. Sàm mèn ke ywimt'àm num tshen ben nà, mb'a nda' Mikaél mfen zin.