Apokalipse 7 - NTSHOB NSI

Ben netsho' tse bo kamànyam nà

¹ Yen nà lo be tshùa, me yen Angél kuà ndù bo tsin num ntôg tsha' nkuà, ntshob fetmbaṅ kuà tse nsitsha' ndù kà fetmbaṅ bèn nshùm num nsitsha'a, num dibantse, mba num sit tù lo.

² Me yen mo' Angél, a ko' fe nze bag ntumnyam, ndù a ghù sitam Nsi ntùn; a kua' nze neta, ntshob ba Angél kuà tse bo fà ngù' bo ndù bo ngù nukebwô tsha' mba dibantse là,

³ ndù: Kà bin ghù nukebwô tsha'a, ke dibantse, ke ba ntù lo, tà nkum ngelaṅ bag nsi te sitam num nkonse ghafa' Nsi yag là.

⁴ Me ju' njoṅ benntùn tse bo te sitam num bo là. Bo lo te sitam num ben ntsha' ntshob kuà bon kuà nkù ntùm njoṅ tunndà bon Israél fa.

⁵ Ntùm tunndà Yuda: Bo te sitam num ben ntsha' ntshob bàa gham. Ntùm tunndà Rubèn: Ben ntsha' bàa gham. Ntùm tunndà Gad: Ben ntsha' ntshob bàa gham.

⁶ Ntùm tunndà Aser: Ben ntsha' ntshob bàa gham. Ntùm tunndà Néftali: Ben ntsha' ntshob bàa gham. Ntùm tunndà Manasé: Ben ntsha' ntshob bàa gham.

⁷ Ntùm tunndà Siméon: Ben ntsha' ntshob bàa gham. Ntùm tunndà Lévi: Ben ntsha' ntshob bàa gham. Ntùm tunndà Isakar: Ben ntsha' ntshob bàa gham.

⁸ Ntùm tunndà Zabulon: Ben ntsha' ntshob bàa gham. Ntùm tunndà Yosèf: Ben ntsha' ntshob bàa gham. Ntùm tunndà Benjamin: Bo te sitam num ben ntsha' ntshob bàa gham.

⁹ Tshen nà lo be tshùa, tshù, me yen mo' bwoṅ benntùn yàm ze mèn ke' ku'ni nesiaṅ nà. Bo tum à ntùm njoṅ ngô fa, ntùm njoṅ tunndà fa, ntùm njoṅ nzwit fa, mba netèt njoṅ ntshob fa; bo tsin mbwe ko'fen mba mbwe mén njùmbwe, ndù bo ket kum fôgtab, ntshùb tshaten bu bo.

¹⁰ Bo kua' nze neta ntshob ndù: Yôg b'a njam Nsi yag z'a tswe num ko'fen nà, mba njam mén njùmbwe.

¹¹ Njoṅ Angél fa lo tsin bwe, ndiaṅ ko'fen mbume, boa ba ywèt benntùn mba tshu ntùn kuà, ngwùte nsi kabkab mbwe ko'fen, ngamte Nsi,

¹² ntshob ndù: Amén, nyàmte, nkuni, zenu, nelabte, ghamte, neta, mba ba ngù' be Nsi yag ngu'ngu'. Amén.

¹³ Mo' mèn netèt ywèn benntùn bùnte, ntshob me ndù: Tshen ben ni tse bo ket nkum fôgtab là b'a ba we?

¹⁴ Me tshob yi ndù: Tshùaben àm, o lène. A tshob me ndù: Tshen ben ni fe à ntùm nge' ndùb, bo sôg nkum mube, ngù a fôg ntùm lem mén njùmbwe.

¹⁵ A num ndùlala ze bo be mbwe ko'fen Nsi, nke mfa' yi mbwôgtshù mba tèttswe' ntùm ndà i là; mèn z'a tswe num ko'fen nà nsi te ntàb i num bo.

¹⁶ Nziku' ke nsi bèn ya yube, ntù tshob ke nsi bèn kù, lagnyam ke ndum nyam no ke nsi bèn ton yube,

¹⁷ nummbe mén njùmbwe z'a be netèt ko'fen nà nsi kém yube, a nsi tshagte yub mbaṅ tôntse yôg. Nsi nsi tshwétte ntsenyà num miag mube.