Apokalipse 6 - NTSHOB NSI

Nebétte sitam ntôge

¹ Tshù, ngelaṅ ze mén njùmbwe bétte mbwe sitam netèt tse sammbàa là, me ju' mo' netèt tshu ntùn kuà tshob mba nze fambaṅ nà ndù: Se'e!

² Tshù, mo' nyàmdiaṅ fôgtab tum; mèn z'a ko' num i là ghù ngoṅkét; bo fà tshe' yi, a nèn mba ngatshùa ntsho là, num netshùa ntsho.

³ Ngelaṅ z'a bétte mbatte bàa là, me ju' mbatte bàa netèt tshu ntùn kuà tshob ndù: Se'e!

⁴ Mo' nyàmdiaṅ tum ndù a ba mba mbwôg là; bo fà ngù' mèn z'a ko' num i là, ndù a sô fite ntùm njù, ndùlala ndù benntùn zwite wut tshob bo bo; bo fà ṅwi ndùb yi.

⁵ Ngelaṅ z'a bétte mbatte sitam tat là, me ju' mbatte tat netèt tshu ntùn kuà tshob ndù: Se'e! Tshù, mo' nyàmdiaṅ nesèn tum; mèn z'a ko' num i là lo ghù kilô bu i.

⁶ Me ju' mo' nze netèt tshu ntùn kuà tshob me ndù: Ntsi ngefet b'a ta' denario, ntsi ngwù tat b'a ta' denario. Mbe se' mba mfèt mba ndu' là, kà bagt'é.

⁷ Ngelaṅ z'a bétte mbatte sitam kuà là, Me ju' nze mbatte kuà netèt tshu ntùn kuà tshob ndù: Se'e!

⁸ Tshù, mo' nyàmdiaṅ nzwe'nzwe' tum, mèn z'a ko' num i là, lén se b'a vù, ngô fe ben tam njam i, bo lo fà ngù' bo num ta' bag tsha' ntshù' num bag tse kuà, ndù bo zwite benntùn ṅwi, nziku'u, vù boa nyàm tshwèt.

⁹ Ngelaṅ z'a bétte mbatte sitam tàn nà, Tshù, me yen ntù ben tse bo na' nzwite yub num nu ntshob Nsi mba num nu kwénta ze bo na' nkwé là, tum tômbwôg le'te Nsi.

¹⁰ Bo kua' nze neta ntshob ndù: Tàndà se nelàn mba ze nenùne, o nsi tsho'te, bèn yagte mba' lem tshag num ba nsitsha' à zit ngelaṅ à?

¹¹ Bo fà kum fôgtab mba we lo netèt bo, ntshob bo ndù bo bèn mfite num mo' mén ngelaṅ, tà nkum ngelaṅ shun fa' tshob mba fèt tshob tse bo nsi zwite yub mba bo là, nsi zwiagte njoṅ i fa là.

¹² Ngelaṅ z'a bétte mbatte sitam ntôg là, tsha' nyi'te kua' neta, lagnyam sèn mba bàm nzwe nesèn nà, njoṅ maṅwù fa tù' mba lem nà,

¹³ nsa mi a mfe kamànyam nà vùte nsi mba tshom ke tswe be ntsho' ngelaṅ fetmbaṅ ndùb shùm tù tshom nà,

¹⁴ kamànyam kiagte mba ṅwa'ni ze bo bote là, njoṅ mbat fa mba tètntse lo num yub dù';

¹⁵ fenfen nsitsha'a, ben ndùbndùb, ba tàndà ntsho, ghankàb, ben neta, mba zit nkuan no, mba zit ménla' lo, lem ntùm ngab, mba ntùm ndoṅ mi a num mbat là,

¹⁶ ntshob mbat mba ndoṅ ndù: Bin vù num bag, ndem yag mbwe mèn z'a tswe num ko'fen nà, ndem yag num yantù mén njùmbwe.

¹⁷ Nummbe lé'njù ndùb, lé'njù yantù yub se'e, we z'a ku'ni neyôg à?