Apokalipse 3 - NTSHOB NSI

Num ntse'te benkristô Sarda

¹ Kite mba Angél ntse'te benkristô Sarda: Tshù ju ze mèn z'a ghù Ywèt Nsi sammbàa mba nsa sammbàa tshob là li: Me lèn mfa' mu, ndèn ndù o ghù lén mènntùn, là, o kwù.

² Zi tshùalo, ghù tànntù num ju z'a ke' wù, là ntù' nekwù là. Nummbe me yen ndù mfa' mu ke' dun mbwe Nsi àm.

³ Ndùlala, kwimte mb'o na' nkwé mbèn nju' là, lé'é, kaṅ ntù o. Là, a be z'o ke' zi tshùalo là, mba me nsi se' mba ntshô là, o ke lèn ngelaṅ me nsi se' num o là.

⁴ Là, o ghù memo' ndèn mà Sarda mi bo ke' sagte nzwe tshob là, bag à bo nsi zin ntùm nzwe fôgtab, nummbe bo ku'ni.

⁵ Mèn z'a tshùa ntsho là nsi ket nzwe fôgtab be ndaṅndaṅ, me ke nsi bwete lén se ntùm ṅwa'ni yôg, me nsi kwé nta lén se mbwe Tàa mba mbwe ba Angél tse.

⁶ Mèn z'a ghù ntoṅ nà, a ju' ju ze Ywèt tshwèt ntshob ba ntse'te benkristô là.

Num ntse'te benkristô Filadélfia

⁷ Kite mba Angél ntse'te benkristô Filadélfia: Tshù ju ze mèn nelàne, mèn nenùne, mèn z'a ghù fùn David, mèn z'a be ngabe, mèn ke fùn, mfùne, mèn ke ghab, tshob là li:

⁸ Me lèn mfa' mu, tshù me te nzendà mbwe o nge, sàm mèn ke' ku'ni netam i tu, nummbe o ghù metsit neta, là ndé' ntshob màm, o ke' gha lén sàm.

⁹ Tshù, me nsi lo' tsemo' ben ntùm sinagogue Satan, tse bo num ntsiaṅ wut tshob ba Yuda, ke b'a yi là, bo num ntatte, tshù, me nsi ghù bo se'e, nkwim ntunkekwi' mub mbwe nku mu, ndèn ndù me lo kô o.

¹⁰ Nummbe o lé' ntshob màm ntùm nefènte, tu wul àm nsi lé' o num ngelaṅ nge' z'a nsi se' num njoṅ njù fa, laṅte nsitsha' là.

¹¹ Me nsi se' ndende; tshùb ju z'o ghù là, ndù kà sàm mèn kwé tshe' so.

¹² Mèn z'a tshùa ntsho là, mba me nsi lo' i, ghù ntom yi ntùm ndà yàm Nsi, a ke bèn ntume; me nsi kite lén Nsi àm num i, mba lén ngô Nsi àm, lén Yérusalém ze nswe z'a swe' kamànyam mbaṅ Nsi àm nà, mba lén sàm se nswe.

¹³ Mèn z'a ghù ntoṅ nà, a ju' ju ze Ywèt tshwèt ntshob ba ntse'te benkristô là.

Num ntse'te benkristô Laôdikia

¹⁴ Kite mba Angél ntse'te benkristô Laôdikia: Tshù ju ze mèn z'a be Amén, ngakwénta ze nenùne, ngatshob nenùne, neto'te nenabte njù Nsi, tshob là li:

¹⁵ Me lèn mfa' mu, ndèn ndù o ke' b'a fimèn ke dummèn no;

¹⁶ là mb'o be yubtemèn, ke be dummèn ke fimèn no là, me nsi ywi' o ntshu àm.

¹⁷ Nummbe o num ntshob ndù: Me b'a ngafu', me ghù ntshùate, ke bwoṅ sàm ju, là, o ke' lèn ndù o b'a njennge', ngalon kondèn, mbwôṅ, mfùmiag, ngazin tunntôg;

¹⁸ tshù ntag mi me fà wù li: Jun gol ze bo lànt'é ntùm mbwôg là me, ndù o tù' ngafu'; jun nzwe fôgtab me, nkele, ndù kà tuswe mb'o be tunntôg là bèn ntum num miag benntùn; jun mfèt me, njo' miag mu yi, ndù o yen nze.

¹⁹ Me num ntshobte mbèn ndab ben tse me num nkô yub là. Ndùlala, kù ntù, kaṅ ntù o.

²⁰ Tshù, me nsi tsin nzendà, ke'te; a be ze mèn ju' nz'àm, ngab nzendà là, mba me nsi tsho ndà i, me mba yi jù ju, yi mba me jù ju.

²¹ Mèn z'a tshùa ntsho là, me nsi ghù bag yi tswe num ko'fen sàm, ndaṅndaṅ mba tu wul àm na' ntshùa ntsho, ntswe bag Tàa num ko'fen se là.

²² Mèn z'a ghù ntoṅ nà, a ju' ju ze Ywèt tshwèt ntshob ba ntse'te benkristô là.