Apokalipse 2 - NTSHOB NSI

Num ntse'te benkristô Efésô

¹ Kite Angél ntse'te benkristô Efésô: Tshù ju ze mèn z'a tshùb nsa sammbàa ntùm bu i ze zwim, nke nzin netèt ndambo sammbàa tshob li:

² Me lèn mfa' mu, ndèn fa' so se neta mba yu nefènte; me lèn ndù o ke' kô neyen ben kebwô; o lo laṅte ben tse bo num ntsiaṅ wut tshob ghantum, ke b'a yi là, o lo yen ndù bo b'a ghatatte.

³ O lo kagtùn, o lo fènte nge' num lén sàm ke bot.

⁴ Là yantù ze me ghù num o là b'a ndù o ghua' mbwe nkôni o.

⁵ Ndùlala, kwimte dù' z'o vù bwe là, kaṅ ntù o, bèn mfa' mbwe mfa' mu. Ntag ndùlala mba me nsi se' wù, mba me nsi lo' lambo so num dù' i, a be z'o ke' kaṅ ntù o là.

⁶ Là, o ghù a bwô, nummbe o bàn mfa' ba Nikôlaô, mfa' mi mba tu wul àm num mbàn nà.

⁷ Mèn z'a ghù ntoṅ nà, a ju' ju ze Ywèt tshwèt ntshob ba ntse'te benkristô là. Mèn z'a tshùa ntsho là, mba me nsi ghù a jù ntàm tù yôg s'a be ntùm Paradis Nsi là.

Num ntse'te benkristô Smirna

⁸ Kite mba Angél ntse'te benkristô Smirna. Tshù ju ze mbwe mèn mba miagt'é, mèn z'a na' nkwù, mbèn ntù' ntùn tshob li:

⁹ Me lèn nge' o mba bwoṅ o, là, o b'a ngafu'; me lèn tshabte ben tse bo num ntsiaṅ wut tshob ba Yuda, ke b'a yi là, là bo b'a sinagogue Satan.

¹⁰ Kà bwôg nge' ts'o nsi yen nà. Tshù, Satan nsi ma' tsemo' ben netèt bin ntùm ndàtsha, ndù laṅte se' bin; bin nsi yen nge' ntùm lé'njù gham. Be mèn nenùn tà nkum lé'njù vù, tu wul àm me nsi fà tshe' yôg wù.

¹¹ Mèn z'a ghù ntoṅ nà, a ju' ju ze Ywèt tshwèt ntshob ba ntse'te benkristô là. Mèn z'a tshùa ntsho là, mba mbatte vù bàa ke nsi kwag i.

Num ntse'te benkristô Pèrgamô

¹² Kite mba Angél ntse'te benkristô Pèrgamô. Tshù ju ze mèn z'a tshùb ṅwi netshùag njam bàa tshob là li:

¹³ Me lèn dù' z'o be ntswe là, a b'a dù' ze ko'fen Satan be là, là, o tshob lén sàm, o ke' gha bamntù num àm, mba ntùm tse lé'njù Antipa, ngakwénta màm ze nenùne, ze bo zwi i netèt bin, dù' ze Satan be ntswe là.

¹⁴ Là me ghù yantù num o num tsemo' nu, o ghù ben tse bo tshùb netswite Balaam z'a na' ntswite Balak nebùn bon Israél ywi', ndù bo fèt mbàb jule'te nsi neto, mbèn nkat là, netèt bin.

¹⁵ Be ndaṅndaṅ mba tu wul o ghù ben tse bo tshùb netswite ben Nikôlaô là.

¹⁶ Ndùlala, kaṅ ntù o! Ntag ndùlala mba me nsi se' wù ndende, mba me nsi lo' ṅwi z'a ntshu àm nà, ma' yub yi ntsho.

¹⁷ Mèn z'a ghù ntoṅ nà, a ju' ju ze Ywèt tshwèt ntshob ba ntse'te benkristô là. Mèn z'a tshùa ntsho là mba me nsi fà mànnà z'a lem nà yi, fà mba kwango' fôgtab yi, se bo kite lén nswe num bwe là, lén se sàm mèn ke' lèn, k'a ke nda' mèn z'a kwé là.

Num ntse'te benkristô Tiatira

¹⁸ Kite mba Angél ntse'te benkristô Tiatira: Tshù ju ze Mén Nsi, mèn ze miag mi be mba ngwatmbwôge, nku mi fute tùn se bo ton mbwôg là, tshob là li:

¹⁹ Me lèn mfa' mu, ndèn nkôni o, bamntù o, yu nefa'a, yu nefènte, ndèn njam mfa' mu mi yàm ntshùa mi mbwe.

²⁰ Là yantù ze me ghù num o là b'a ndù o num mfaṅ Jézabèl, yen mènnzwi là z'a num ntsiaṅ wul i ngatshob ntshob Nsi netèt bin, a nke ntswite, nke ntatte ghafa' tshàm ndù bo kale, mbèn mfèt mbàb jule'te nsi neto.

²¹ Me lo faṅ ngelaṅ yi ndù a kaṅ ntù i, là, a ke kô nekaṅ ntù i num nu kat z'a be ngù là.

²² Tshù, me nsi yab i kun ngokèt, ma' ben tse bo à bo num ngù màndà là ntùm nge' ndùb, a be ze bo ke' kaṅ ntù tshob num mfa' mi là.

²³ Me nsi zwite bon tse ntùm vù; njoṅ ntse'te benkristô fa nsi lèn ndù a b'a me bèn nke njen tun ba zwe' mba tun ba ntù, me nsi fà mba we lo netèt bin be ndaṅndaṅ num mfa' mine.

²⁴ Là, bin benkristô, tse bin Tiatira, tse bin ke' ghù yen netswite là, ke lèn tsham Satan, mba bo num ntshob là , me tshob bin ndù, Me ke' te lèt num bin.

²⁵ Nda' ndù bin tshùb tànntù num ze bin à ghù là, tà nkum ngelaṅ me se' là.

²⁶ Mèn z'a tshùa ntsho, ndé' mfa' màm tà nèn miagte là, me nsi fà ngù' netô ngô yi;

²⁷ a nsi lo' kôg tùn tshagte yub yi; a nsi be'te yub mba nkab tsha' là,

²⁸ mba mba tu wul àm kwé i Tàa là, me nsi fà mba sa nkebnjù yi.

²⁹ Mèn z'a ghù ntoṅ nà, a ju' ju ze Ywèt tshwèt ntshob ba ntse'te benkristô là.