Apokalipse 17 - NTSHOB NSI

Babilon kattù mènnzwi

¹ Mo' ta' i netèt Angél sammbàa tse bo tshùb ntu' sammbàa là se'; ntshob me ndù: Se'e, me nsi la'te netsho'te ntsha kattù mènnzwi ze ndùb z'a tswe num ntse ndùb là wù.

² Fenfen nsitsha' lo kat bo à bo, ba ntùm njù bum ndu' ntùm ndu' kal i.

³ A kel àm ntùm ywèt nèn yi kônkwa. Me yen mo' mènnzwi ndù a tswe num nyàm meba, z'a dun ba lèn tshabte là, ngù tu sammbàa mba ndô mi gham nà.

⁴ Mènnzwi là ket nzwe meba ze tanjoṅ, ntaṅ gol, loṅ tanjoṅ, mba ntôgntse; a lo ghù ntu' gol bu i ndù a dun nesagte mba ṅu' kal i;

⁵ bo lo kite mo' lèn num nkonse i, mo' tsham: Babilon ze ndùb, mà ba kattù mba ba ṅu' nsitsha'a.

⁶ Me yen mènnzwi là ndù a bum lem ben nelàn mba lem ghakwénta Yésu. Me be yen i, ntshàm neshu.

⁷ Angél tshob me ndù: O tshàm à numke? Me nsi soṅ o tsham mènnzwi mba se nyàm z'a kel i là, nyàm z'a ghù tu sammbàa mba ndô gham nà.

⁸ Nyàm z'o yen nà lo be, a ke' bèn mbe; a nsi tum ntùm ghem njam nsi, nèn ntùm nebi, ba ntùm njù tse bo ke' kite ndèn mub ntùm ṅwa'ni yôg fe ngelaṅ nenabte njù là, nsi be yen nyàm tshàme, nummbe a lo be, a ke' bèn mbe, mbe ndù a ke nsi bèn be.

⁹ Zenu z'a ghù là b'a bwe. Tu sammbàa b'a mbat sammbàa tse mènnzwi tswe bwe là,

¹⁰ a bèn mb'a fenfen sammbàa. Tse tàn vù, mo' ke'e, mo' ke' yoṅ nse'e; ngelaṅ z'a nsi se' là, mb'a bwô ndù a tswe num mo' mén ngelaṅ.

¹¹ Nyàm z'a na' mbe, z'a ke' bèn mbe là, b'a mbatte fome, a b'a netèt tse sammbàa, a nèn à ntùm nebi.

¹² Ndô gham mi o yen nà b'a fenfen gham tse bo ke' yoṅ nkwé nufen nà, là bo nsi kwé ngù' fenfen num ta' nyam boa nyàm.

¹³ Bo ghù à nkwate ntshù', bo nsi fà yub neta mba yub ngù' nyàm.

¹⁴ Bo nsi le' mén njùmbwe ntsho, mén njùmbwe tshùa yube, nummbe a b'a Tshùaben ba tshùaben, mba mfen fenfen; ben netsine, ben netsho'o, ben nenùne, nsi be bo à bo.

¹⁵ A tshob me ndù: Ntse mi o yen kattù mènnzwi tswe num bwe là b'a nzwit, bwoṅ benntùn, ngôngô mba ba ntshobe.

¹⁶ Ndô gham mi o yen nà mba nyàm nsi bàn kattù mènnzwi, lagte tshu tse, te i tunntôg, fèt mbàb wul i, ton i ntùm mbwôge.

¹⁷ Nummbe Nsi lo nànte ntù tshob ndù bo zwiagte nkwatenu mi, ngù nkwate ntshù', mfà nufen yub nyàm tà nkum ngelaṅ ntshob Nsi nsi bumte là.

¹⁸ Mènnzwi z'o yen nà b'a ngô ndùb z'a ghù nufen num fenfen nsitsha' là.