Apokalipse 16 - NTSHOB NSI

Nge' sammbàa num nsitsha'a

¹ Tshù, me ju' nze neta tum Ndà Nsi, ntshob Angél sammbàa ndù: Bin nèn mfètte ntu' yantù Nsi sammbàa num nsitsha'a.

² Mbwe i nèn, mfètte ze ntu' num nsitsha'a, mo' keko' kebwô, se ngùtni, tshùb benntùn tse bo ghù lèn nyàm num bo, nke ngamte neto i là.

³ Mbatte bàa fètte ze ntu' num dibantse. A tù' lem, mba tse fe mèn nà, njoṅ tshu ntùn fa ts'a be ntùm dibantse là kwùte.

⁴ Mbatte tat fètte ze ntu' num ba ta'ntse mba num ba tumnsi ntse. Bo tù' lem.

⁵ Me ju' Angél ba ntse tshob ndù: O b'a mèn netsine, wù z'o be, z'o na' mbe là, mèn nelàne, nummbe o keb ntsha tshen tshu là,

⁶ nummbe bo lo fètte lem ben nelàn mba ghatshob ntshob Nsi, o fà lem bo ndù bo nu, boku'ni.

⁷ Me ju' tômbwôg le'te Nsi tshob ndù: Tshùaben Nsi ngatô njù, ṅ, yu netsho'te ntsha b'a nenùne, mbe netsine.

⁸ Mbatte kuà fètte ze ntu' num lagnyam. Bo fà ngù' yi ndù a ton benntùn ntùm mbwôge;

⁹ mo' nedum ndùb ton benntùn, bo tshabte lén Nsi z'a ghù ngù' num tshen nge' là là, ke kaṅ ntù tshob num nefà ghamte yi.

¹⁰ Mbatte tàn fètte ze ntu' num ko'fen nyàm; nufen se tù' njame, nge' ghù benntùn to' nefèt lém sobe.

¹¹ Nge' mba nkeko' ghù bo tshabte Nsi z'a kamànyam nà, ke kaṅ ntù tshob mum mfa' mube.

¹² Mbatte ntôg fètte ze ntu' ntùm Efrat ta'ntse ndùb, ntse mi njum ndù bo nabte manze fenfen tse bo nsi fe bag ntumnyam nà.

¹³ Me yen ywètkebwô tat tum ntshu Ngamnyu, ntshu nyàm mba ntshu ngatshob ntshob Nsi ze tatte ndù bo fute ba metu'.

¹⁴ Bo b'a ywètkebwô tse bo num ngù tshu netshàme, tse bo num nèn mbaṅ fenfen njoṅ njù fa, ndù bo tse'te yub num ntsho lé'njù ndùb, lé'njù Nsi ngatô njù là.

¹⁵ Tshù, me tshwèt nse' mba ntshô là, mènfen b'a mèn z'a zi tshùalo nke ndé' nzwe tse ndù k'a zin tunntôg, nda'te nu tuswe là.

¹⁶ Bo tse'te yub ntùm dù' ze bo ke ntsiaṅ Armagédon, ntùm ntshob Héber là.

¹⁷ Mbatte sammbàa fètte ze ntu' ntùm mfùag. Mo' nze neta tum ntùm Ndà Nsi, ko'fen, ntshob ndù: A ku'u!

¹⁸ Ba beba'mbaṅ, ba nze, mfambaṅ tum, tsha' nyi'te neshu, nga, fe mba mènntùn be num nsitsha' là, tsha' ke' to' nyi'te ndùlala.

¹⁹ Ngô ndùb ghabte bag tat, ngô ghakeban Nsi vùte. Bo kwimte Babilon ze ndùb mbwe Nsi ndù bo fà ndu' zwentù yantù Nsi yi.

²⁰ Njoṅ ngô tètntse fa kù, njoṅ mbat fa bi.

²¹ Mo' nywinmbaṅ mba loṅ nà tum mfe kamànyam, ngwù num benntùn. Nge' yen nywinmbaṅ nà ghù benntùn tshabte Nsi, nummbe yen nge' là b'a ze ndùb neshu.