Apokalipse 15 - NTSHOB NSI

Ntu' yantù Nsi sammbàa

¹ Me yen mo' ju netshàm ze ndùb tum mfe kamànyam: Angél sammbàa tshùb nge' sammbàa ts'a b'a miagte tse là, nummbe yantù Nsi nsi tshùa njam bo bumte.

² Me yen mo' ju a be mba dibantse nke njente njam bàa, ndù a bwete bo mbwôge me yen ben tse bo tshùa njam neto i mba njoṅ lén se ntsho là, tsin num dibantse yente njam bàa, ndù bo ghù loṅ Nsi;

³ bo yob kwi Mosé, ngafa' Nsi, mba kwi mén njùmbwe, ntshob ndù: Tshùaben, Nsi ngatô njù, mfa' mu b'a mi ndùb mba mi nekuni; mfen ngôngô, manze tsho b'a tse netsine, mbe tse nenùne.

⁴ Tshùaben, we z'a ke nsi bwôg o, be ke ghamte lén so à? Nummbe o b'a mèn nelàn tù' o, nummbe njoṅ ngôngô fa nsi se' vù nsi mbwe o, nummbe tsho netsho'te ntsha tswite wut tshobe.

⁵ Tshen nà lo be tshùa, tshù, Ndà Nsi, ntàb kwénta te nge mfe kamànyam;

⁶ Angél sammbàa tse bo tshùb nge' sammbàa là tum ntùm Ndà Nsi, ndù bo ket ṅwa'ṅwa' nzwe mebwô ze nelàne, ngù kob gol num ndàntù yub.

⁷ Mo' ta' i netèt tshu ntùn kuà fà ntu' gol sammbàa ba Angél sammbàa ndù a dun yantù Nsi z'a be ntùn ngu'ngu' là.

⁸ Ndà Nsi dun nzembwôg mi a tum ntùm nkuni Nsi mba ntùm neta i là, sàm mèn ke ku'ni netsho ntùm Ndà Nsi tà kum ngelaṅ nge' sammbàa ts'a be ba Angél sammbàa nsi bumte là.