Apokalipse 13 - NTSHOB NSI

Nyàm tu sammbàa

¹ Tshù, me yen mo' nyàm tum ntùm dibantse ndù a ghù ndô mi gham mba tu sammbàa, ndot fen gham be num ndô mi, ndèn tshabte be num tu tse.

² Nyàm ze me yen nà fute nzwimàntô, nku mi be mba mi tshàmnje' là, ntshu i be mba ze ngwayit là. Ngamnyu fà neta yi, ko'fen se mba ngù' i yi.

³ Me yen mo' tu i ndù a tsil à vù vù, keko' tu i là yate. Njoṅ njù fa nke ntshàm njam njam.

⁴ Bo ghamte Ngamnyu, nummbe a lo fà ngù' nyàm; bo ghamte nyàm ntshob ndù: We z'a be mba nyàm à? We z'a ku'ni nema' ntsho bo yi à?

⁵ Bo fà ntshu yi ndù a tshob ntshob ko'tewut, mba ba tshabte, bo fà ngù' yi ndù a fa' se fa' num maṅwù ntshob bàa ṅam nkuà.

⁶ A gha' ntshu i ntshob tatte num Nsi, ntshabte lén se mba ntàb i, mba ben tse bo num ntswe kamànyam nà.

⁷ Bo bam yi ndù a ma' ben nelàn ntsho, ntshùa yube, bo fà ngù' yi num njoṅ tunndà fa, njoṅ nzwit fa, njoṅ ntshob fa, mba num njoṅ ngô fa.

⁸ Njoṅ ba ntùm njù fa nsi ghamt'é, ben tse bo ke' kite lén sob fe ngelaṅ nenabte njù, ntùm ṅwa'ni yôg mén njùmbwe ze bo na' nse tô i là.

⁹ A be ze mèn ghù ntoṅ nà, a ju'!

¹⁰ A be ze mèn b'a ngandàtsha là, mba bo nsi ma' i ndàtsha, a be ze mèn nsi kwù ṅwi là, mb'a bwô ndù bo zwi i ṅwi. Nefènte mba bamntù ben nelàn b'a bwe.

Nyàm ndô bàa

¹¹ Tshù, me yen mo' nyàm ko' ntùm tsha'a, ndù a ghù ndô mi mbàa mi a fute mi mo' mén njùmbwe là, nke ntshob mba mo' Ngamnyu là.

¹² A ghù njoṅ ngù' mbwe nyàm fa, nke mfa' yi mbwe i, ngù tsha' mba ba ntùm njù ghamte mbwe nyàm ze mfaṅ i na' njate là.

¹³ A ghù tshu netshàm tse ndùbndùb, ngù mbwôg swe' mfe kamànyam, nse' num nsitsha'a, mbwe benntùn,

¹⁴ a tshùa njam tshu netshàm tse bo fà ngù' yi ndù a ghù mbwe nyàm nà, ntatte ba ntùm njù, ntshob ba ntùm njù ndù bo nabte neto nyàm z'a ghù mfaṅ ṅwi, mbe ntùn nà.

¹⁵ Bo fà ngù' yi ndù a fà ywèt neto nyàm ntshobe, mba ndù bo zwite njoṅ benntùn fa tse bo ke' ghamte neto nyàm nà.

¹⁶ A ghù njoṅ benntùn fa, bônke' mba dùbdùb, ghankàb mba bwoṅbwoṅ, bonla' mba kuan, kwé lèn num bu yub ze zwim ke num nkonse yub lo,

¹⁷ ndù kà sàm mèn jun, ke swèn, a be z'a ke' ghù lèn, lén nyàm ke njoṅ lén se lo là.

¹⁸ Zenu b'a bwe. Mèn z'a ghù zenu là siaṅte njoṅ lèn nyàm; a b'a njoṅ mènntùn: Njoṅ i b'a ntshob ntôg bon ntôg nkù ntôge.