Apokalipse 12 - NTSHOB NSI

Mènnzwi Ngamnyu

¹ Mo' ju netshàm tum mfe kamànyam, mo' mènnzwi ndù a ma' lagnyam num i, nte nku mi num maṅwù, nte tshe' tu i ndù a ghù nsa ntshob bàa gham;

² a lo be jùm, nke nkua'a, ndù a tshwèt ndab wul i ntùm ya nebwe.

³ Mo' mbatte ju netshàm tum mfe kamànyam, tshù, a na' mb'a mo' Ngamnyu ndùb ndù a b'a mba mbwôg là, ngù tu tse sammbàa mba ndô mi gham, ndot fen sammbàa lo be num njoṅ tu tse fa.

⁴ Nkun i soṅ ta' bag nsa ntshù' num bag tse tat mi a mfe kamànyam nà, ma' yub num nsitsha'a. Ngamnyu tsin mbwe mènnzwi z'a ke mbwe là, ndù a mi mén i ngelaṅ z'a nsi bwe i là.

⁵ A bwe mén mandum, z'a lo' kôg tùn tshagte njoṅ ngô fa yi là, Bo tshùb mén i, nèn yi mbaṅ Nsi, mbaṅ ko'fen se.

⁶ Mènnzwi là kù, nèn kônkwa, ntùm dù' ze Nsi nabte yi là ndù bo kém i bwe mum lé'njù bon ntôg ntshob bàa ntsha' mbùm.

⁷ Ndùlala ntsho vù mfe kamànyam; Mikaél boa Angél tse nke nde' Ngamnyu ntsho, Ngamnyu boa Angél tse le' ntsho,

⁸ là bo lo ke be ben neta, yub dù' ke bèn mbe mfe kamànyam,

⁹ bo ma' Ngamnyu ndùb nsi, yi njwèn nyu, ze bo ke ntsiaṅ i Diable, Satan, ngatatte njoṅ njù fa là, bo ma' i num nsitsha'a, ma' i bwe boa Angél tse.

¹⁰ Me ju' mo' nze neta tum mfe kamànyam, ntshob ndù: Ndonni, yôg, neta, mba nufen b'a tse Nsi yag, ngù' be ze Kristô i, nummbe bo ma' ngabote fèt tshag nsi, mèn z'a ke mbote yub mbwe Nsi yag mbwôgtshù mba tèttswe' là.

¹¹ Bo lo tshùa i ntsho njam lem mén njùmbwe mba njam ntshob kwénta mube, bo lo ke kô yôg sob tà nèn nkum num vù.

¹² A ndùlala, kamànyam, bin ṅwate, ben tse bo num ntswe ntùm bwe là ṅwate. Tsha' mba dibantse, nge' num bin, nummbe Satan swe' nse' la' bin, ndù a dun yantù ndùb, a lèn ndù ngelaṅ ke' bèn njàm yi.

¹³ Ngamnyu be yen ndù bo ma' i num nsitsha'a, nke nta' mènnzwi z'a na' mbwe mén mandum nà.

¹⁴ Bo fà mbàb ghammàtat ndùb mbàa mènnzwi, ndù a fùt nèn kônkwa, dù' ze bo kém i mo' ngelaṅ, ba ngelaṅ, kam ngelaṅ; ngùanesà num miag nyu là.

¹⁵ Nyu sô ntse ntshu i mba ta'ntse ndùb là, nkag njam mènnzwi ndù a kel i ntùm ta'ntse.

¹⁶ Là tsha' ywimte mènnzwi, tsha' gha' ntshu i mi ta'ntse ze Ngamnyu sô ntshu i, nkag là.

¹⁷ Ngamnyu ya ntù mènnzwi nèn ma' nzwil i z'a tù' là ntsho, ben tse bo num nze ntshù' Nsi, ngù kwénta Yésu là.

¹⁸ A tsin num nkwa dibantse.