Apokalipse 11 - NTSHOB NSI

Ghakwénta bàa

¹ Bo fà nka'nesoṅ me ndù a fute kôg, ntshob ndù: Lo tù, mfi' ndà Nsi, tômbwôg le'te Nsi mba ben tse bo num ngamte Nsi ntùm bwe là.

² Là mbe se' mba ntshundà ndà Nsi z'a njù là, faṅ i là, kà fi' i, nummbe bo lo fà i ghakelèn Nsi, bo nsi nyiaṅte ngô nelàn nku num maṅwù ntshob bàa ṅam nkuà.

³ Me nsi fà ghakwénta màm bàa, bo nsi ket nke'bàm, tshob ntshob Nsi mum lé'njù bon ntôg ntshob bàa ntsha' mbùm.

⁴ Tshen nà b'a nten mbàa, mba ndambo mbàa mi a be ntsin mbwe Tshùaben nsitsha' là.

⁵ A be ze mèn kô neghù nukebwô bo là, mba mbwôg a' tum ntshu bo, nkù ghakeban tshobe; a be ze mèn kô neghù nukebwô bo là, mb'a bwô ndù bo zwi i be ndaṅndaṅ.

⁶ Bo ghù ngù' nefùn kamànyam ndù kà mbaṅ lo ntùm lé'njù tse bo tshwèt ntshob ntshob Nsi là; bo ghù ngù' num ntse, nku'ni nekaṅ ntse a tù' lem, nku'ni nekag nge' nzenze num nsitsha'a, mba zit ngelaṅ no ze bo kô là.

⁷ Ngelaṅ bo nsi miagte mub kwénta là, nyàm nsi ko' ntùm ghem njam nsi, tum ma' ntsho; a nsi tshùa yube, zwite yube.

⁸ Fe tshob nsi be num manze ngô ndùb ze bo be ntsiaṅ ntùm ntshob Ywèt ndù Sodom mba Egipto là; a b'a dù' ze bo kwimte Tshùaben yub bwe là.

⁹ Benntùn, ntùm nzwit, ntùm tunndà, ntùm ntshobe, ba ntùm ngô nsi yen fe tshob mum lé'njù tat kam, bo ke nsi bam ndù bo yab fe tshob ntùm fi.

¹⁰ Ba ntùm ngô nsi tsiaṅte num bo, tswe ntùm neṅwate, bo nsi ke tumte ba nda' bo bo, nummbe tshen ghatshob ntshob Nsi bàa là lo ghùtni ba ntùm njù.

¹¹ Là lé'njù tat kam lo be tshùa, Ywèt yôg ts'a fe Nsi là tsho num bo, bo tsin tù num nku mube, bwôg ndùb tshùb ben tse bo ke njen yub là.

¹² Bo ju' mo' nze neta swe' kamànyam, ntshob bo ndù: Bin ko' nse' nsen ni. Bo ko' ntùm ndot nèn kamànyam, ghakeban tshob nke njen yube.

¹³ Be kua' yen nyam nà, tsha' nyi'te kua' neta, ta' bag ngô ntshù' num bag tse gham vù; ntùm yen tsha' nenyi'te là, benntùn ntsha' sammbàa lo kwù. Ben tse bo tù' là bwôg neshu, mfà ghamte Nsi kamànyam.

¹⁴ Mbatte nge' bàa tôg; tshù, mbatte nge' tat se' ndende.

Mbatte nta sammbàa

¹⁵ Mbatte Angél sammbàa tô nta: Ba nze ndùbndùb tshob mfe kamànyam ndù: Nufen njù tù' se Tshùaben be mba Kristô i, a nsi be mfen num ngu'ngu'.

¹⁶ Ywèn benntùn ntshob kuà ṅam mbàa tse bo tswe mbwe Nsi ntùm nko'fen mub là, vù nsi kabkab, ngamte Nsi,

¹⁷ ntshob ndù: Bag nyàmt'o, wù Tshùaben Nsi, ngatô njù, wù z'o be, z'o na' mbe là, nummbe o kwé neta o ze ndùb, o b'a mfen.

¹⁸ Ghakelèn Nsi ya ntù, yantù o se'e, ngelaṅ netsho'te fe ben ku'u; ngelaṅ nefà ntsho'fa' ghafa' tsho ghatshob ntshob Nsi, ben nelàne, ben tse bo num mbwôg lén so là, bônke' mba dùbdùb, ku'u; ngelaṅ nebagte ben tse bo num mbagte tsha' là ku'u.

¹⁹ Ndà Nsi gha' nte nge mfe kamànyam; Koṅ Kàn se tum ntsin ntùm ndà Nsi i; ba beba'mbaṅ, ba nze, mfambaṅ be, tsha' nyi'te, nywinmbaṅ yàm vù.