Amos 9 - NTSHOB NSI

Miagte njem z'a kum tàn nà

¹ Me yen Tshùaben ndù a tsin num tômbwôg le'te Nsi, a tshob ndù: Lab tu ntom ba', ndù a nyi'te tà nèn nkum tun bwe. Lo' ndab njoṅ tu tshob fa yi, a tshette. Me nsi lo' ṅwi miagte tshé' tse yi. Sàm mèn ke nsi tum ntshu vù.

² Bo tsho be ntùm ngô fe ben mba bu àm nsi soṅ yub bwe tum yi; bo ko' nèn be mfe kamànyam mba m'a' lo' yub nswe' yi mfe bwe.

³ Bo lem be mfe tu mbat Karmél mba me nsi diag yub bwe tshùb yube. A be ze bo lo num miag màm, nèn bam dibantse là, mba me nsi tshob nyu ntse a tshôg yub bwe.

⁴ A be ze bo nèn ndà kuan, mbwe ghakeban tshob là, mba me nsi ma' yub num ntshùag ṅwi, a zwite yube. Me nsi te lag num bo, neghù nukebwô ke b'a num neghù numebwô.

⁵ Tshùaben Nsi tàndà ntsho, kwag tsha' k'a nyi'te, njoṅ benntùn fa tse bo be tswe num bwe là b'a nsivù. Tsha' be nko' yoṅ ntshù' mba ta'ntse là, mbèn nkôg mba ta'ntse Egipto là.

⁶ Tshùaben b'a lén mèn z'a be nkut dù'ntswe mfe kamànyam, nte nta i num nsitsha' là. A be ntsiaṅ ntse mi a dibantse là, nsa yub num nsitsha'a.

⁷ Tshùaben tshob ndù: Bon Israél, bin ke' be m'a mba bon Etiopia là ké? Me lo ghù Israél tum mà Egipto, ba Filistia tum Kaftor, ba Aram tum Kir ké?

⁸ Tshù, me Tshùaben Nsi, te miag màm num nufen z'a fàn nu là. Me nsi biagt'é num nsitsha'a; mba tà ndùlala me ke nsi biagte tunndà Yakob fa. Tshùaben bèn ntshobe.

⁹ Tshù, me tshwèt nsa'a, m'a' nyi'te tunndà Israél netèt njoṅ ngôngô fa, mba bo be nyi'te ke'te, sàm lag ju ke tum ngwù nsi là.

¹⁰ Ghaghù nukebwô tse bo ntùm yàm nzwit là nsi kwù à num ntshùag ṅwi, tshù, bo be ntshob ndù: Nge' ke nsi ghebte num bag, a ke nsi yab mbu num bag.

Nebèn nabte ngô Israél

¹¹ Mum sen lé'njù là, me nsi bù'te nke' ba' David z'a vù là, kabte ntô mi, bèn bù'te fam i te tù. Me nsi kul i k'a be mb'a na' mbe mo' ngelaṅ nà;

¹² ndùlala ndù bo jù ndà tshé' ba Edom mba tsemo' ngôngô fa, tse bo na' ntsiaṅ lén sàm bo là. Tshùaben bèn ntshobe, a nsi ghù ndù tshen tshu là bumte.

¹³ Tshùaben tshob ndù: Tsemo' lé'njù tshwèt nse'e, tse ngadù' nà nsi tèt ngatsho' tshu fèn, ngatshab ndu' tèt ngabwe ju fèn nà. Ndu' nsi ké num ba mbat swe'e, naṅ num njoṅ nkônga fa.

¹⁴ Ndùlala me nsi lo' kuan yàm nzwit mèn Israél bèn yi njam; bo nsi bèn kut ngô tse bo sate là, bèn tswe ntùm bwe; bo nsi bwe nkùa, nu ndu' mi; bo nsi bwe nka', jù ntàm mi.

¹⁵ Me nsi te yub num tshob tsha'a; sàm mèn ke nsi bèn tsho' yub num tshob tsha' tse me fà bo là. Tshùaben Nsi o bèn ntshobe!