Amos 8 - NTSHOB NSI

Njem mbatte kuà: Ntsi ntàmtù

¹ Tshùaben Nsi lo' yen njem ni nse' yi mbwe àm. Tshù, me yen ta' ntsi ntàmtù.

² A tshob me ndù: Ke z'o yen Amos? Me bùnte ndù: Me yen ta' ntsi ntàmtù. Tshùaben tshob me ndù: Ze nemiagte nzwil àm Israél te nsi, ṅwage. Me ke nsi bèn lagte yi.

³ Nkwi mi a ke ntum ntshwèt là nsi b'a netsham zwe mum sen lé'njù là. Tshùaben Nsi bèn ntshob ndùlala. Bo nsi ghua' fe ben yàm ntùm ntshu mi' njoṅ dù' fa.

Miagte njem z'a kum tàn nà

⁴ Bin ju' yen nu li, bin tse bin be nyiaṅte njennge' nku, nke mbiagte ben nebétni mum ngô là.

⁵ Bin be ntshob ndù: Ntshùa ṅwù nsi tôg à ndùke bag swèn ngefel à. Sabbat nsi mi à ndùke, ndù bag tsho' nkandà à? Bag nsi sébte éfa, kwi'te ntshu ntàne. Bag nsi ghù mfùm num nkilô ndùlala ndù bag fùte.

⁶ Bag nsi lo' nkàb jun bwoṅbwoṅ yi, lo' nketo' nku mbàa jun njennge' yi; ndùlala bag nsi swèn mba ntsha' ngefele.

⁷ Tshùaben lo' ghamte Yakob ntshob nsaṅlaṅ bwe, a ke nsi lagte mba sàm fa' sob se ntshù'.

⁸ A nsi tshùa num tu bo tsha' nyi'te. Njoṅ ba ntùm ngô fa ke nsi b'a nsivù num yen nu là ké? Ngô nsi tèn bwoṅ ko' mba koṅntse là. A nsi ko'o, bèn kôg mba ta'ntse Egipto là.

⁹ Tshùaben Nsi tshob ndù: Mum sen lé'njù là, me nsi ghù lagnyam bi njagnyam, me ghù njam sèn num tsha' mbwôgtshù.

¹⁰ Me nsi ghù min njùa kaṅ ntù' nsivù, min nkwi nsi tù' ntsenyà vù. Me nsi taṅ bàm vù tun njoṅ zin fa. Me nsi kom nyiaṅ num tu tsine. Me nsi ghù yen nsivù là be mba nsivù nkwimén ntshù' là, njoṅ i fa z'a tù' là be mba ta' lé'njù zwentù là.

¹¹ Tshùaben Nsi tshob ndù, tsemo' lé'njù bwe nse'e, tse me nsi tum nziku' mum ngô là. Ke b'a kekua bàn mba ntù nekù num ntse, là, nzi mb'a nekù ntù neju' ntshob Tshùaben.

¹² Bo nsi be tshakendà nelo num mo' dibantse nèn nkum num mo' nelo mfe tu nèn nkum bag ntumnyam. Bo nsi ke nèn bag bag diag ntshob Tshùaben bwe. Là bo ke nsi yen i.

¹³ Mum sen lé'njù là, mbwômbwô ngonngon boa nshumnshum nsi kwù nzi ntse.

¹⁴ Bo be ndo' nukebwô Samaria nkàn mfe yi, nke ntshob ndù: Nsi o te ku i num nenàfi me Dan! A bwô ndù nzin Ber-Shéba lo' la'. Là, bo nsi vù nsi ke bèn nku'ni nelo.