Amos 7 - NTSHOB NSI

Njem mfà num nebagte Israél; mbwe njem Amos: Ngamntàn

¹ Tshù, Tshùaben Nsi lo' yen njem ni nse' yi mbwe àm. A ghù ngamntàn nke ntumte, ndùse nenà bèn nto' netob là; a lo be be ndù bo a keb tse nenà mfen.

² Mba ngamntàn ke mfèt nenà num nsitsha' ke faṅ lèn i là, me tshob ndù: Tshùaben Nsi, b'o ke lagte ndùlala ké? Be Yakob bèn njôg à ndùke? A bot ntshùate.

³ Ntù Tshùaben fite num yen nu là, a tshob ndù yen nu là ke bèn mbe.

Mbatte njem bàa: Mbwôge

⁴ Tshùaben Nsi lo' yen njem ni nse' yi mbwe àm. Tshù, Tshùaben Nsi lo' mbwôg naṅ ntsha yi num bo. Mbwôg kù ghem ndùb, nkù tshwèt.

⁵ Me tshob ndù: Tshùaben Nsi tsin ndùlala. Be Yakob bèn njôg à ndùke? A bot ntshùate.

⁶ Ntù Tshùaben fite, Tshùaben Nsi tshob ndù yen nu là ke nsi be mba yen yoṅ i li.

Njem z'a kum mbatte tat là

⁷ A *gi*lo' yen njem ni nse' yi num miag màm. Tshù, Tshùaben tsin num kumba' ndù bo taṅ ndeb bwe, ndù a tshùb mba wataplaṅ bu i.

⁸ Tshùaben tshob me ndù: Ke z'o yen Amos? Me bùnte ndù: Ta' wataplaṅ. Tshùaben tshob ndù: Me nsi yab wataplaṅ netèt nzwil àm Israél; me ke nsi bèn lagte sàm nu yi.

⁹ Bo nsi sate njoṅ tse mbwe' Isak fa ts'a kônga là; njoṅ tse mbwe' Israél fa nsi vù fam. Me nsi lo' ṅwi lo yi nsi num tunndà Yéroboam.

Amos bo ngale'te Nsi Amasia

¹⁰ Amasia, ngale'te Nsi Bétél, tum bo tshob Yéroboam, mfen Israél ndù: Amos ṅu' ku i num o ntùm tunndà Israél. Ngô ke' bèn nefènte tse njoṅ ntshob mi fa. Tshù ju ze Amos be ntshob li:

¹¹ Yéroboam nsi kwù à num ntshùag ṅwi, bo bèn ndo' Israél nèn yi ndà kuan, tà ngùanesà mbaṅ ze ngô.

¹² Amasia tshob Amos ndù: Ngayen njem, yen njem, tum nsen ni nèn mà ngô Yuda, njù yu bàn bwe, mbèn ntshob ntshob Nsi à bwe.

¹³ Là mbe se' mba Bétél là, o ke nsi bèn tshob ntshob Nsi bwe, nummb'a b'a dù' nelàn z'a b'a ze mfen nà, mbe ndà fen.

¹⁴ Amos bùnte ntshob Amasia ndù: Me ke' b'a ngatshob ntshob Nsi, ke be nshum ngatshob ntshob Nsi. Me b'a ngabéb nyàmna', mbe ngaféte ntù fènngab.

¹⁵ Là Tshùaben lo lo' àm njam nyàm tse me ke mbéb là, ntshob me ndù: nèn ntshob ntshob Nsi nzwil àm Israél!

¹⁶ Ndonni ju' ntshob Tshùaben, wù z'o tshwèt ntshob ndù kà me tshob ntshob Nsi num Israél, ke tshob nge' num tunndà Isak là.

¹⁷ A ndùlala Tshùaben tshob ze ndù: Nzwi o nsi kat be kua' ntùm ngô. Nshumnshum tsho mba ngonngon tsho nsi vù num ntshùag ṅwi, bo bèn ntaṅ ndeb ndo' ngabte tsho tsha' yi. Tu wul o nsi kwù à num tsha' ts'a sagte là, bo bèn ndo' Israél nèn yi ndà kuan, tà ngùanesà mbaṅ ze ngô.