Amos 6 - NTSHOB NSI

A b'a nge' num ghankàb mba num ben ndùbndùb mà Israél

¹ Nge' num tu benntùn tse bo tswe tshob mà Sion, nke njôg mum fite là. Tse bo tswe num mbat Samaria ke ke mbwôg là. Tshen kamkam nà netèt mbwe tum ngô netèt ntumntum, tse tunndà Israél tshwèt ntam njam bo là!

² Bin tshùa Kélné njene, bin nèn tà nkum mà Hamat ze ndùb, nswe' nèn mà Gat ju ba Filistia njene: Bin kwate ndù bin be mebwô ntshùa tshen nufen nà ké? Tshob tsha' yàm, nzi ntshùa tsin ké?

³ Bin kwate ndù bin kù'te lé'njù nge' ntshag ngùanesà. Bin tshwèt ngù nufen nefètte lem se' nsém ndende.

⁴ Bo tshwèt mfite tshob mum nkunndà nsô nsen, nsate wut tshob mum kunndà mube, nke mfèt njùmbwe tse bo sô netèt bwoṅ mbwe là, mba mfot mfô mi bo sô kin nà.

⁵ Bo be mbu' mbu tun nze loṅe; nke nabte bon tshu nebu' sa yi mba David là.

⁶ Bo be nu ndu' ntùm màmà ntu', nke nse' wut tshob mfèt mebwô, ke nywin tshob mba bo sate tunndà Yosèf là.

⁷ A ndùlala, bo nsi lo' yub nèn yi ndà kuan, te yub mbwe kuan; nze zwi nsi mi ntshu tshen ghafèt tshu là.

⁸ Tshùaben Nsi, tàndà ntsho tshob ndùlala, nsaṅlaṅ bwe ntshob ndù: Me ke' kô neyen ghamte Yakob, nke mbàn tse ntshwèt. Me nsi swèn ngô boa tshu ts'a ntùm bwe là.

⁹ A be ze ben gham be ntùm ta' ndà là, mba bo nsi kwù.

¹⁰ Ndùse mo' mèn ntùm tunndà nsi lo' ta' mèn tone, sô mvôg fe ben mum ndà là, a nsi tshob mèn z'a be to'ndà là ndù: Mo' bèn nke' nsen nà mbaṅ o ké? Yen mèn nà nsi bùnte ndù: Sàm ju. A bèn ntshob ze ndù: Mi ntswe! A ke' yoṅ mb'a ngelaṅ netsi lén Tshùaben ni.

¹¹ A nsi ghù ndà ndùb vù, ghù ndà nke' kôg naṅ nsi, nummbe Tshùaben bèn nke nsa'a.

¹² Nyàmdiaṅ be nkù nde num loṅ ké? Be bo lo' ba nyàmna' ndù' i yi ké? Là bin be ndo' nu ndaṅndaṅ nkaṅ tsheb yi, ndo' nunetsin nkaṅ zwetshù'tshù' yi.

¹³ Bin be ntsiaṅte num ju banban, nke ntshob ndù: A ke yag neta bèn ngù kà bag ntù' ben ndùbndùb ké?

¹⁴ Tshùaben Nsi tàndà ntsho tshob ndù: Tunndà Israél, a ndùlala me nsi ghù mo' ngô lo nsi num bin, ngùtni zin neto' ntshu ngô Hamat tà nèn nkum fub ntsitmbaṅ z'a kônkwa là.