Amos 5 - NTSHOB NSIAmos làn vù num Israél 1 Tunndà Israél, bin ju' men ntshob li mi me tshwèt ntshob num bin nà, men ntshob là b'a ndèn vù. 2 Ngon Israél vù, a ke nsi bèn nelo, a là z'a nyit num tsha' là, sàm mèn ke bwe z'a bù' i nsi là. 3 Nummbe tshù mba Tshùaben Nsi tshob li: Ngô z'a ke ntum benntùn ntsha' mbùm tshwèt ntsho là, nda' benntùn nkù bèn mbèn njam; ngô z'a ke ntum benntùn nkù tshwèt ntsho là, nda' benntùn gham bèn mbèn njam, me tunndà Israél. Ke vù ke yôg lo 4 Nummbe tshù mba Tshùaben tshob tunndà Israél li: Bin diag àm mba bin nsi yôge. 5 Là kà bin diag àm à ndà Nsi Bétél, kà bin bèn nèn à dù'ntswe Guilgal, kà bin tshùa à Ber-Shéba. Nummbe Guilgal nsi be nkuan Béthél nsi tù' dù' mfànnu; bo biagte Bétél. 6 Bin diag Tshùaben ndù bin yôge. Ntag ndùlala mb'a nsi vù num tunndà Yosèf mba mbwôg là; a nsi kù i, sàm mèn ke tum Bétél mbiagte. 7 Bin be ndo' nu ndaṅndaṅ ngù zwe tshù'tshù' yi, ma' nunetsin nsi nyiaṅte nku. 8 A lo nabte tswe'nsa mba maṅwù ntsiaṅ ndù Pliade bo Orion, ndo' njam nkaṅ mfôgnjù yi, ngù mbwôgtshù sènte mba tèttswe' là. nsa njoṅ i fa num nsitsha'a. Lén se b'a Tshùaben. 9 A be ngù la' ben neta vù fam, mbèn nsa mba mba' mub mi neta. 10 Bo be mbàn mèn z'a tshètte nu ndaṅndaṅ ndà ntsha là. Bo be ntshèt mèn z'a be ntshob nunetsin nà. 11 Ndùlala, mba bin nyiaṅte mbwoṅ nku, mfé' ju num ze ngefele, ndo' ndoṅ netshebte nkut mba' yi là, bin ke nsi tswe bwe. Bin nsi ywit nkùa ts'a gham nà, là bin ke nsi nu ndu' mube. 12 Nummbe me lèn ndù njabnge' min yàm, nukebwô tsin ke mbag à be nebage; bin b'a ghakeban nunetsine, nke nkwé nda' ndùse bwoṅbwoṅ se' ndà ntsha là, bin nke nta' yube. 13 A ju z'a ghù a nke mbe num lèn tshen ngelaṅ ni nzenu tswe ntshu mi' là; a b'a nummbe tshen ngelaṅ ni bag neshu. 14 Bin diag à numebwô ke b'a nukebwô. ndùlala ndù bin yôge. A tshùa ndùlala Tshùaben Nsi tàndà ntsho be bin à bo, mba tu wut tsin be ntshob là. 15 Bin bàn nukebwô, nkô numebwô. Bin ke ngù nunetsin bèn nke nsa' ndà ntsha. Mo' ndù Tshùaben Nsi tàndà ntsho, nsi ko ndèn tshé' ben Yosèf. 16 A ndùlala Tshùaben Nsi, tàndà ntsho, Tshùaben tshob ndù: Bo nsi ke làn num njoṅ dù' fa, ke ntshob num njoṅ manze fa ndù: Wé! Wé! Bo nsi tsiaṅ ghadù' nà num nsivù, ntsiaṅ mba bènnzwi ghalàn vù ndù bo se' ndàn vù. 17 Vù nsi be ntùm njoṅ nkùa fa, ndùlala me nsi tshùa netèt bin naṅ ntsha tu bin. Tshùaben bèn ntshob ndùlala. Lé'njù Tshùaben nsi se' là, b'a nge' 18 A b'a num ben tse bo tshwèt mbéb ndù lé'njù Tshùaben se' là. Ke ze bin tshwèt mbéb lé'njù Tshùaben à? A nsi b'a njame, ke b'a nelàne. 19 Bin nsi be mba mèn z'a tshwèt nkù ngwayit, mbumte bo nzwimàntô là, bin nsi be mba mèn z'a bèn njam ndà i, njé'te mbaṅ ba', nyu tshôg i là. 20 Lé'njù Tshùaben ke b'a njam ké? A ke b'a nelàne. A ke' b'a nesèn ké? A tshwèt nké'é. 21 Me bàne, ngwag min njùa. Me ke' kô neju' nsém tsin ntse'te. 22 A be ze bin fà tshu neton a kù fafa me; mfà mba tshu bwôntù là, mba me ke nsi tsiaṅte num bwe; mba mfô nzit tse bin be ndo' nde't'àm yi là, me ke nsi lo' mba sàm ju là. 23 Lo' ntshu'te nkwi mu tsin yi nesà mbaṅ àm, kà me bèn ju' nze kwi se bin tshwèt mbu' me num loṅ nà. 24 L'a bwô ndù nu ndaṅndaṅ be mba fetntse là, nunetsin be mba ta'ntse z'a ke' be nzwimte là. 25 Tunndà Israél, bin lo fà ju nele't'àm ke nenaṅ ndu' nsi lo num ngu'njù ṅam nkuà tse bin be kônkwa là ké? 26 Là, bin lo ket Sakut mfen zin, mba Kéwan neto tsine, nsa ba nsi tsin, tse bin na' nabte zin tu là. 27 Bin lèn ndù bin nsi ket nsi tsin nà nèn yi ndà kuan Damas. Tshùaben ze lén se be Nsi tàndà ntsho là bèn ntshob ndùlala. |
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
Bible Society of Cameroon