Abdia 1 - NTSHOB NSI

Nkùn z'a fe Tshùaben nà

¹ Njem ze Abdia yen nà. Tshù mba Tshùaben Nsi tshob num Edom ni: Tshùaben lo tshag nkùn bag, ntshob ndù: Bin lo tù, be tamte ma' Edom ntsho.

² Tshù, me nsi lo' o ghù metsit ngô yi netèt ngôngô. O nsi tù' ju tuswe ze ndùb.

³ Ka'te z'a ntù o là tshag o ngùanesà. Wù z'o be ntswe ntùm tô loṅ, nke ntswe nsi num dù' ṅaṅa là, o be nke ntshob ntùm ntù o ndù: We z'a nsi tèn àm ma' num tsha'a?

⁴ Là me Tshùaben tshob ndù: A be z'o ko' nèn tà mfe tù mba ghammàtat bebabsa' là, a be z'o te nkàn o tà mfe netèt nsa là, mba me nsi tèn o mfe bwe ma' num tsha'a.

⁵ A be ze tshô, ghalag dù' se' ndà o tèttswe' là, mba bo nsi lagt'o be! Mba bo nsi lo' tshu njoṅ z'a ku' num bo là. A be ze ghakàb ntàm tù ndu' tsho mum nà o là, mba bo ke nsi faṅ sàm ju ze be bo bèn nkàb ngelaṅ mànjam nà.

⁶ Tshù mba bo ta' Esau njene! Bo yen tshunkàb tse ts'a na' ndem nà.

⁷ Njoṅ tsho shun fa ta' o tà nèn nkum ndù ngô, shun tsho lo lamt'o, ntô o. Ben tse bo be njù mum ndà o là lo bùn o njwi', là lag so ke tsho bwe!

⁸ Tshùaben tshob ndù: Me nsi biagte ghazenu mà Edom, biagte zenu num mbat Esau mum sen lé'njù là.

⁹ Téman, tsho ghama' ntsho nsi tàn ntùm bwôg, nummbe bo nsi biagte njoṅ benntùn fa tse bo ke ntswe num mbat Esau là ngelaṅ nezwite benntùn.

¹⁰ A tshùa num nefètte lem z'o ghù num tunndà mfèl o Yakob là, tuswe nsi ko o, bo biagt'o matmat.

¹¹ A lo be lé'njù s'o tsin mbwe i, lé'njù se mfàm ke ndo' ze ntshu ntsho nèn yi ndà kuan nà, lé'njù se mfàm ke ntsho num tse nzendà, ndùse bo ke ngabte Yérusalém boa tshu là, tu wul o lo be bwe ndaṅndaṅ mba mo' mèn netèt bo là.

¹² A ke' bwô ndù o lôte lé'njù ngùtni bo lé'njù nge' mfèl o nyu' zwi. Kà tsiaṅte num nge' bon Yuda, ke tsiaṅte mum lé'njù se bo sate yub là; kà gha' ntshu o ntshabte yub mum lé'njù nge'!

¹³ Kà tsho ntùm tse nsém yàm nzwit mèn mum lé'njù se bo tshwèt nsat'é là, kà lôte ngùtni tse nke nyu' zwi mum lé'njù se bo tshwèt nsat'é là, kà yab bu num tshunkàb tse mum lé'njù se bo tshwèt nsat'é là.

¹⁴ Kà tum ntsin mfagte manze nebiagte ben tse tse bo tshwèt nkù là. Ke fà ben tse tse bo ke' ntùn nà mum lé'njù nge'!

¹⁵ Nummbe lé'njù Tshùaben ghebte, a lo nsi num njoṅ ntumntum fa. Bo nsi ghù num o à mb'o na' ngù num tsemo' benntùn nà. Ngùninu mu nsi vù num tu o.

¹⁶ Ndaṅndaṅ mba bin na' nu ndu' num mbal àm ze nelàn nà, be ndaṅndaṅ njoṅ ngôngô fa nsi nu ndu' ke tsin; bo nsi nu, bèn kaṅ tswe mba ndùse bo ke' to' be là.

¹⁷ Ben bo tum ntshu vù là nsi be num mbat Sion, mbat Sion nsi be nelàne; tunndà Yakob nsi bèn kwé ngô yub ben tshen nà tse bo na' ndo' là.

¹⁸ Tunndà Yakob nsi be mbwôge, tunndà Yosèf be lambwôge. Là tunndà Esau nsi b'a béne. Bo nsi te mbwôg num i, kù i, sàm ju ke nsi tù' num tunndà Esau. Nummbe Tshùaben tshob ndùlala.

¹⁹ Ba ntèn nsi lo' mbat Esau, ba tômbo' lo' ngô ba Filistia; bo nsi lo' ngô Efraim mba ngô Samaria. Benjamin nsi lo' Galad.

²⁰ Kuan ntshu ntsho bon Israél nsi lo' ngô ze ba Kanaan be ntswe bwe là, tà nèn nkum mà Sarepta, kuan Yérusalém tse bo be Sefarad là, nsi lo' ngô ts'a mà ntèn nà.

²¹ Bo tse bo yôg là nsi be ko' mbat Sion ke yob ngu' là; bo nsi sa' mbat Edom; nufen nsi b'a ze Tshùaben.