2 Yohané 1 - NTSHOB NSI

Tsha'te

¹ Me ngakwé mbwe, me kite yen ṅwa'ni li à Mà ze Nsi tsho' i là, mba bon tse tse me num nkô yub ntùm nenùne; a ke b'a nda' me, là njoṅ benntùn fa tse bo na' ndèn nunenùn nà,

² num nunenùn z'a ghô num be, ze bag à bin bo nsi ghô yoṅ ntshù' là.

³ Kondèn, nkôni mba fite nsi be be njam Nsi Tà mba njam Yésu Kristô Mén Tà, ntùm nenùne, mba ntùm nkôni.

Bin zin ntùm nenùn mba ntùm nkôni

⁴ Me lo tsiaṅte neshu mba me na' njen tsemo' bon tshu, bo nke nzin ntùm nenùne, mb'a be ntùm ntshù' mi bag na' nkwé Tà là.

⁵ Mà, me le't'o ndonni ndù bag à bin ke nkôni be be, ke b'a ndù me kit'a mo' ntshù' nswe wù, là, a b'a ntshù' mi be ghù fe neto'te là.

⁶ Nkôni b'a ndù bag à bin zin ntùm ntshù' mi. Yen ntshù' là ze bin na' nju' fe neto'te là, là ndù bin zin ntùm bwe.

Bin zete num ghatswite tse tatte

⁷ Nummbe ghatatte yàm tum, nse' ntùm njù, bo ke' be bam Yésu Kristô z'a se' ntùm mbàb wut là. Tshù ngatatte là, tshù ngakeban Kristô là!

⁸ Bin zete num tu wut tsine, ndù kà bin bi tshu tse be na' mfa' là, là ndù bin kwé ntsho'fa' mi a dun nà.

⁹ Mba we lo z'a nèn ngùanesà, ke ghô ntùm netswite Kristô là, ke' ghù Nsi; mèn z'a ghô ntùm yen netswite là là, ghù Tà mba Mén.

¹⁰ A be mèn se' bin, ke fà yen netswite là bin nà, kà bin lo' i ntùm ndà zin, ke bèn ntshob yi ndù: Bag tsha't'o.

¹¹ Nummbe mèn z'a tshob yi ndù me tsha't'o là, mba bo yi tamte ntùm mfa' mi mi kebwô.

¹² Mba mba me ghù tshu yàm netshob bin nà, me ke' kô nelo' ntse ṅwa'ni nkite yi num fe ṅwa'ni, là me tshwèt nywinte nese' la' bin, bag à bin tshobte se se, ndù tsiaṅte be dune.

¹³ Bon ngon màan ze Nsi tsho' i là tsha't'o.