2 Timôtio 2 - NTSHOB NSI

A bwô neyen nge' num lén Kristô

¹ Mén àm, ndùlala ta ntùm kondèn z'a be num Kristô Yésu là.

² Tshu ts'o na' nju' me mbwe ghakwénta yàm nà, fà ben nenùn tse bo ku'ni netswite tsemo' ben nà.

³ Bag wù tamte njen nge' mba mbwô soyé Kristô Yésu là.

⁴ Sàm ngama' ntsho ke' be fà wul i num tshu njù, a be z'a kô nebwô mèn z'a lo' i mba ngama' ntsho là.

⁵ A be ze mèn maṅ mba nde là, mb'a ke kwé tshe'ngu'u, a be z'a ke' kù nde mb'a bwô là.

⁶ A bwô ndù ngadù' nà bwôgmbwe mfa' neshu kà ntsho' tshu.

⁷ Ju' ju ze me tshob là! Nummbe Tshùaben nsi fà zenu wù num njoṅ tshu fa.

⁸ Kwimte Yésu Kristô z'a bam num vù ndù a tum à ntùm nzwit David, mba yàm nkùn mebwô tshob là.

⁹ Me tshwèt njen nge' num i, kà bo kul àm mba ngaghù nukebwô là, là bo ke' kut ntshob Nsi.

¹⁰ A ndùlala, me tshwèt mfènte njoṅ i fa num ben tse Nsi tsho' yub là, ndùlala ndù mba bo yub kwé yôg s'a be num Kristô Yésu là, bo nkuni mi a tswe yoṅ ntshù' là.

¹¹ Men ntshob li b'a nenùn ndù: A be ze bag à bin bo kwù là, mba bag à bin bo nsi yôge.

¹² A be ze bag à bin fènte là, mba bag à bin bo nsi tô; a be ze bag à bin gha i là, mb'a nsi gha be,

¹³ a be ze bag à bin ke' bam nà, mb'a b'a be mèn nenùne, nummbe a ke' ku'ni negha tu wul i.

Zete num tantshu mba num ghe'te

¹⁴ Kwimte yen nà bo, ndo' Nsi mba nkwénta là, ndù kà bo ta ntshu banban, yen nà ke' ywimte, là, a num mbagte ben tse bo num nju' i là.

¹⁵ Kagtùn ndù o be tsin mbwe Nsi, mbe mèn z'a tshùa laṅte là, ngafa' z'a ke' ghù tuswe là, ngatshob ntshob nenùn ndaṅndaṅ.

¹⁶ Kù tshô kebwô, tshô banban, nummbe ben tse bo num nsa i là, be nèn mbwe ntùm newag Nsi neshu,

¹⁷ ntshob mub nke mfèt wut mèn mba mbànnzin nà, Himènéô mba Filitô num netèt bo,

¹⁸ bo kag manze nenùne, nke ntshob ndù nebam num vù à se'e, bo kaṅ bamntù tsemo' ben.

¹⁹ Mba ndùlala, tseba' Nsi ze neta tsin tù ndaṅndaṅ, ndù Nsi san i yen sitam ni ndù: Tshùaben lèn tse ben, mba ndù: Mba we lo z'a nsi tsi lén Tshùaben nà, gha nuketsin!

²⁰ Nda' nkab gol ke silba lo ke bèn nke mbe ntùm ndà ndùb, là mba mi ntù ke tsha' lo; memo' b'a mi nku'ni, memo' be mi tuswe.

²¹ A be ze mèn sô tshen tshu kebwô là num i là, mb'a nsi be kab nku'ni nelàne, z'a ywimte tàndà là, kab ze bo nabt'é num njoṅ mfa' mebwô fa là.

²² Kù ghe'te nguanmèn, diag nunetsine, bamntù, nkôni, fite bin à njoṅ ben tse bo num ntsiaṅ Tshùaben ntùm ntù nelàn nà.

²³ Gha tantshu femni mba kagni, ndèn ndù a num nkag ntsha.

²⁴ Là, a ke' bwô ndù nkuan Tshùaben be ngakag ntsha, là, a bwô ndù a be mèn nefite, nku'ni netswite, mbe ngafènte,

²⁵ ntshobte ben tse bo à bo ke' ghù nkwate ntshù' là, ntùm fite, mo' ndù Nsi ghù nefà nekaṅ ntù bo, ndù bo lèn nenùne, ngom wut tshobe,

²⁶ ntum ntùm ywi' Satan z'a tshùb yub là, ndù bo tsho ntùm nekô yen mèn din.