2 Timôtio 1 - NTSHOB NSI

Tsha'te

¹ Me Paulo ngantum Kristô Yésu njam ze nekô Nsi, num nka'ni yôg s'a be num Kristô là,

² me kite yen ṅwa'ni li à Timôtio mén àm ze nkôni. Kondèn, nkôni, fite, se' njam Nsi Tà mba njam Kristô Yésu, Tshùaben be.

Num nekagtùn num nkùn mebwô

³ Me labte Nsi ze me num mfa' yi ntùm nzentù nelàn mba ba tà tshàm nà, nummbe me num ntsi lén so ke tsin, tèttswe' mba mbwôgtshù ntùm nde'te Nsi màm;

⁴ me tshwèt nkù ntù neyen o, me kwimte ntsenyà mo, ndù me dun tsiaṅte.

⁵ Me ke' nkwimte bamntù o ze nenùne, a lo bwôgmbwe ntswe num màan ze ndùb Lôis mba màan Eunika, me nywinte ndù a tshwèt mbèn ntswe mba num o yu.

⁶ A ndùlala, kwimte nekwé'te ju kondèn Nsi z'a be num o ntshùa njam neyab mbu ze me yab num o là.

⁷ Nummbe Nsi lo ke fà à Ywèt nefi be, là a fà à Ywèt neta, Ywèt nkôni mba Ywèt zenu be.

⁸ Ndùlala, kà ko tuswe nekwé nta Tshùaben be, ke ko tuswe num àm, ngandàtsha i, là bag wù tamte njen nge' num nkùn mebwô njam neta Nsi,

⁹ z'a na' njôg be, ntsiaṅ be ntùm netsiaṅ nelàne, ke b'a mum mfa' be, là num ko' nkwatenu mi mba kondèn i z'a na' mfà be num Kristô Yésu fe tà ndùke lo là.

¹⁰ A la't'é ndonni, tshù mb'a la't'é li: Ngayôg be Kristô Yésu lo se'e, mbiagte vù, njam nkùn mebwô, njab yôg mba nebe ke kwù mbwe nka',

¹¹ Nsi lo yab àm ndù me be ngatshob yen nkùn mebwô là, ngantum mba ngatswite.

¹² A num ndùlala ze me tshwèt njen nge' là, là tuswe ke' ko àm, nummbe me lèn mèn ze me bam i là, ndèn kua' mebwô ndù a b'a mèn neta z'a ku'ni nelem bu' sàm num sen lé'njù là là.

¹³ Ke ndo' mfi' num ntshob nelàn mi o na' nju' me, ntùm bamntù mba ntùm nkôni z'a be num Kristô Yésu là.

¹⁴ Lem mbwô bu' njam Ywèt Nelàn ts'a be ntswe num be là.

¹⁵ O lèn ndù njoṅ ba Asia fa tam àm mvèn yub, Figelô mba Hèrmôgéné num netèt bo.

¹⁶ A bwô ndù Tshùaben ko ndèn tunndà Onésifôrô nummbe a tswe'te ntù àm yoṅ yàme, ke ko tuswe num nkù tshàm,

¹⁷ là, a lo yoṅ mbe kum Roma, ndiag àm kua' ndende njen àm.

¹⁸ A bwô ndù Tshùaben bam ndù a yen kondèn mbaṅ Tshùaben ntùm sen lé'njù là. O lèn njoṅ mfa' fa mi a na' mfa' Efésô là kua' mebwô, ntshùa mba we lo.