2 Tésalônikà 2 - NTSHOB NSI

Ngelaṅ mànjam

¹ Fèt tshag, mbe se' mba ze nese' Tshùaben be Yésu Kristô mba nebumte be bag à bin bo là, bag le'te zine,

² kà bin nyi'te ndende ntùm nkwate zin, ke vôgte, ke num ntshob Ywèle, ke num mo' ntshobe, ke num mo' ṅwa'ni ze bo tshob ndù a fe à bag lo, mba lé'njù Tshùaben à se' là.

³ Kà sàm mèn fùte zin num bwe. Là, a bwô ndù negha Nsi bwôgmbwe nse'e, ngabagte ntshù', mèn nebi tswite wul i;

⁴ a b'a ngakeban, mèn z'a nsi ko'te wul i mbwe njoṅ tshu fa tse bo ke ntsiaṅ yub nsi ke tse bo ke ngamte yub lo là, a nsi te diaṅ ntùm Ndà Nsi, lo' tu wul i mba Nsi là.

⁵ Bin ke' kwimte ndù me lo tshob tshen tshu là bin, ngelaṅ me na' mbe la' bin nà ké?

⁶ Ndonni, bin lèn ju z'a tshùb i ndù a tswite wul i à num ze ngelaṅ nà.

⁷ Nummbe a to' fa' num nu nebagte ntshù', nda' ndù a bwô mèn z'a tshùb i tà nkum ndonni là bi.

⁸ Num yen ngelaṅ nà, nebagte ntshù' nsi tswite wul i, Tshùaben Yésu lo' Ywèt ntshu tse mbagt'é yi, ghù a tù' ju banban, ngelaṅ z'a nsi se'e, tswite wul i ntùm nkuni mi là.

⁹ Ze nese' ngabagte ntshù' nsi b'a njam fa' Satan ntùm njoṅ mfa' neta fa, ntùm ba nsa, ntùm ba nu netshàm tse tatte,

¹⁰ mba ntùm fùte njoṅ nuketsin fa, num ben tse bo tshwèt mbi, nummbe bo ke' kwé nkôni nunenùn ndù a yôg yub là.

¹¹ A ndùlala, Nsi tum neta nefàn manze bo ndù bo bam tatte,

¹² ndùlala ndù a tsho'te njoṅ benntùn fa tse bo ke' bam nenùne, là njab ntù yub num nuketsin nà.

¹³ Fèt tshag, bin tse Tshùaben kô zin nà, a bwô ndù bag ke ndabte Nsi num tu bin njoṅ ngelaṅ fa, nummbe Nsi lo tsho' zin fe neto'te num yôg ntùm nelàn Ywèle, mba ntùm bamntù nenùne.

¹⁴ A num ndùlala, a lo tsiaṅ zin njam nkùn mebwô yag, ndù bin kwé nkuni Tshùaben be Yésu Kristô.

¹⁵ Fèt tshag, ndùlala bin tshùb wut tsine, ngù tànntù num tshu tse bin zi'te bag, ke num ntshu, ke ntùm nekite lo là.

¹⁶ A bwô ndù tu wut Tshùaben be Yésu Kristô mba Nsi Tà be, z'a kô yag ntùm kondèn i mfà nefitentù z'a tswe yoṅ ntshù', mba nenywinte ze mebwô bag là,

¹⁷ fite ntù tsine, mfà tànntù bin ntùm njoṅ mfa' fa mba ntùm njoṅ ntshob mebwô fa.