2 Samuél 8 - NTSHOB NSI

David tshùa Filistia, Moab, Siria, Edom ntsho

¹ Yen nà lo be tôge, David le' ba Filistia ntsho, ntshùa yube, nkwé tètla' mum mbu mube, bo ke bèn mbèn nke ntô.

² A le' ntsho boa ba Moab, ndo' nkù mfi' yub yi, mbe mfi' yub ndù bo nôte num tsha'a; a fi' nkù bàa num nezwite yube, mbèn mfi' yub nkù z'a dunte là num nefaṅ yub ntùn. Ba Moab bam nte' David, nke mfà ntshub yi.

³ David le' Hadadézer nshum Tsoba ntsho, ndùs'a ke nèn te ze netô mbaṅ dù' z'a ghebte num ta'ntse Efrat là.

⁴ David lo' ghako' nyàm bon sammbàa ntsha' boa benntùn ntsha' ṅam mbàa, soyé tse bo tshwèt nzin nku là. A ghù bo kebte nga nku nyàmdiaṅ tse bo ke nsoṅ nkalig là, k'a faṅ a nda' tse be bo soṅ nkalig nkù là.

⁵ Ba Siria tse bo be Damas là se' ywimte Hadadézer mfen Tsoba, David zwite ben ntsha' ntshob bàa ṅam mbàa netèt ba Siria.

⁶ David tete ba mbàn ntsho taṅ Siria z'a Damas là. Ba Siria bam nte' David, nke mfà ntshub yi. Tshùaben lo ke mbéb David mba yà lo dù' z'a nèn nà.

⁷ David lo' ntshètntsho gol mi ghafa' Hadadézer ghù là nèn yi Yérusalém.

⁸ Mfen David bèn ndo' ntùn meba yàm Bétak mba Bérotsi, ntusô Hadadézer.

⁹ Toi mfen Hamat ju' mbe David lo tshùa ze ntshu ntsho Hadadézer fa ntsho,

¹⁰ ndùlala ntum Yoram nshum i mbaṅ mfen David ndù a nèn ntsha't'é, nyàmt'é mb'a kam Hadadézer ntsho kà ntshùa i là. Nummbe Toi na' mb'a tshwèt ntsho bo Hadadézer. Yoram lo' nkab gol, nkab silba boa mi ntùn meba nèn yi.

¹¹ Mfen David fà tshen tshu là Tshùaben, ndaṅndaṅ mba silba, bo gol z'a na' nkwé ngôngô fa ts'a tshùa yub ntsho là;

¹² Siria, Moab, tse nshum Ammon, ba Filistia, ba Amalék mba num ntsha' z'a lo' Hadadézer nshum Rehob mfen Tsoba là.

¹³ Ndùse David tshùa ba Siria ntsho kà nke mbèn njam nà, a bèn nko'te lén se tù, nzwite ba Edom ntsha' ntshob fom gham ntùm tômbo' ngwa.

¹⁴ A te mbàn ntsho njoṅ dù' fa Edom. Njoṅ ba Edom fa bam nte' David. Tshùaben lo ke mbéb David mba yà lo dù' z'a nèn nà.

Ghafa' David tse ndùbndùb

¹⁵ David tô Israél, ngù nu ndaṅndaṅ bo nunetsin njoṅ ze ngô fa.

¹⁶ Yoab nshum Tseruya na' mbèn nke ntô ba soyé; Yosafat nshum Akilud be ngalé' njoṅ ṅwa'ni fa;

¹⁷ Tsadok nshum Akitub bo Akimélék, nshum Abiatar be ngafà tshule'te; Seruya na' mb'a ngakite;

¹⁸ Benaya nshum Yéhoyada be mfen ba Kérét boa ba Pélét tse bo ke mbéb David là; tse nshum David na' mb'a mbwe kamkam mbaṅ mfen.