2 Samuél 6 - NTSHOB NSI

David ket Koṅ Kàn Kirjat-Yearim nèn yi Yérusalém

¹ David bèn ntse'te njoṅ neta soyé ba Israél fa, bo tum benntùn ntu ntsha' ṅam ntat.

² David boa ngô tse bo be mbaṅ i là tam nze nèn Baala-Yuda, nket Koṅ Nsi bwe nko' nse' yi. Bo lo ke ntsin mbwe Koṅ ntsiaṅ Tshùaben tàndà ntsho z'a be ntswe netèt ba Kérubim, mfe num Koṅ nà.

³ Bo yab Koṅ Nsi num kalig nswe, nsô ntum yi ndà Abinadab z'a be num kônga là. Uzza bo Akyo tse nshum Abinadab bèn nke ntshagte kalig nswe.

⁴ Ndùlala bo sô i ndà Abinadab nèn yi num kônga; Uzza nke nzin mbaṅ Koṅ Nsi, Akyo nke nzin mbwe Koṅ.

⁵ David boa tunndà Israél fa lo ke mbu' tshu mbwe Tshùaben. Bo lo' à tshu nebu' ju yi tse bo lo' ntshwèn bù nkom yi là: Ndoṅ nse', ndoṅe, ba lammbé, ba mbelàbe, boa ba netsha'a.

⁶ Ndùse bo zin nkum dù' netsham nsa Nakon nà, Uzza tshag bu i num Koṅ Nsi ntshùb i, nummbe ba nyàmna' lo ke ngù a nke mbene.

⁷ Yantù Tshùaben kam num mfànnu mi. Uzza kwù dù' i mbaṅ Koṅ Nsi.

⁸ David ya ntù mba Tshùaben keb ze ntsha Uzza ndùlala là. Bo yab lén yen dù' là ndù Péréts-Uzza tà nse' nkum sènni.

⁹ David bwôg Tshùaben sen lé'njù là, ntshob ndù: Koṅ Tshùaben ghù netsho ndà àm tshàm ké?

¹⁰ A ke kô nelo' Koṅ Tshùaben nèn yi la' i ntùm tusô David. A ghù bo lo' nèn yi ndà Obèd-Edom ze Gat.

¹¹ Koṅ Tshùaben tswe ndà Obèd-Edom ze Gat ṅwù tat, Tshùaben tam ntse naṅ mbotni num njoṅ tunndà Obèd-Edom fa.

¹² Bo se' ntshob mfen David ndù: Tshùaben tam ntse tunndà Obèd-Edom, ntam ntse mba num ke lo z'a ghù là, num nu Koṅ Nsi. Ndùlala David tam nze, ngù Koṅ Nsi lo ndà Obèd-Edom nko' nèn tà tusô David, nko' à kua' netèt tsiaṅte yàme.

¹³ Bo nke mfà tshule'te ta' nyàmna' bo ta' fot mfô s'a tshote là ndùse ben bo ket Koṅ Tshùaben zin nku ntôg là.

¹⁴ David lo ke nyiaṅ mbwe Tshùaben kua' njoṅ ze neta fa, ndù a ket kum nesag se bo num nket ngelaṅ fa' là num i; bo lo' à nzwe mebwô ntam kum nà yi.

¹⁵ David boa njoṅ tunndà Israél fa lo' Koṅ Tshùaben nko' yi à ntùm tshu'te tsiaṅte, mbe ko' nke ntô ba nta.

¹⁶ Ndùse Koṅ Tshùaben ke ntsho ntùm tusô David là, Mikal ngon Saulo lôte tônda njen mba mfen David tshwèt nyiaṅe, nke ntsho' mfe tù mbwe Tshùaben nà, ngwag i ntùm ntù i.

¹⁷ Bo lo' Koṅ Tshùaben nse' njab num ze dù', ntùm ntàb ze David na' ntaṅte nete i bwe là. David ton ba nyàm mbwe Tshùaben, mfà tshule'te tse nefà me bam.

¹⁸ Ndùse David miagte neton ba nyàm mba nefà tshule'te tse nefà me bam nà, a tam ntse ngô num ze tu Tshùaben tàndà ntsho.

¹⁹ Yen nà be tôg a ghabte tshu ngô, njoṅ bwoṅ ba Israél fa, bandum boa bènnzwi, mfà tu' bàn, tu' mbàb bo ke' makela' nkun mba zit mèn no. Ngô bèn njam, mba we lo ntùm ze ndà.

²⁰ David bèn ndà i num netam ntse ze tunndà. Mikal ngon Saulo tum mbumte bo yi, ntshob ndù: Mfen Israél so mo' lén ndùb tu wul i sènni. A la'te wul i mbwe ghafa' tse bènnzwi tse bo ke mfa' ghafa' tse, tse bandum nà tunntôg, ngù mba kua' mèn banban nà.

²¹ David bùnte Mikal ndù: A b'a mbwe Tshùaben z'a na' ntsho' àm ngua' tàan bo tunndà i, num nete àm mfen num ze nzwit mèn, num Israél là. A b'a mbwe yi Tshùaben ze me nyiaṅ nà.

²² M'a' bèn nda'te wul àm mba mèn banban nà ntshùate, ndù me tù' ju banban mba kua' num màm miag, mba tà ndùlala ghafa' tse bènnzwi ts'o tshwèt ntshob là nsi ke mfà be nku'ni me.

²³ Nda' ndù Mikal ngon Saulo lo ke ghù mén tà nkum lé'njù s'a kwù là.