2 Samuél 5 - NTSHOB NSI

David mfen Yuda mba ba Israél fa

¹ Njoṅ nzwit ba Israél fa nèn mbaṅ David Hébron ntshob yi ndù: Tshù bag li, bag b'a ben tsho.

² A lo be mba tà mbwembwe, ndùse Saulo be mfen be là, o na' mbèn nke ntshagte Israél mbèn ndo' i mbèn yi njam. Tshùaben lo tshob wù ndù o nsi béb ze nzwit mèn Israél, be mfen ba Israél.

³ Ndùlala njoṅ ghakwé mbwe ba Israél fa nèn mbaṅ mfen mà Hébron, mfen David wat kàn boa bo bwe mbwe Tshùaben. Bo yo' David ndo' i ngù mfen yi ntùm ngô Israél.

⁴ David lo be jù fen ndù a ghù ngu'njù ṅam ntat, ntô num ngu'njù ṅam nkuà,

⁵ ntô num ngu'njù sammbàa ṅwù ntôge, nke ntswe Hébron; a bèn ntô Israél bo Yuda ngu'njù ntshob tat ṅam ntat, nke ntswe Yérusalém.

Bo ta' ba Yébusia, nkut dù'ntswe David Yérusalém

⁶ Mfen David boa ben tse kam ntsho Yérusalém. Ba Yébusia tse bo ke ntswe bwe là tshob David ndù: B'o ke tsho nsen ni, nummbe nda' ba mfùmiag boa ba nke'kèt nsi tshèl o. Yen nà bagt'a ndù: Be wù David ke zi ntsho nsen ni.

⁷ Là David bwôgmbwe ndo' tusô Sion se bo kut ntsham ntsiag là, a tù' se tusô David.

⁸ David tshob num sen lé'njù là ndù: Mba we lo z'a nsi zwite ba Yébusia là, nsi ma' tshen nke'kèt là boa tshen mfùmiag là ntùm fube, nummbe bo b'a ghakeban David. A ndùlala bèn ngù kà bo nke ntshob men ntshob li ndù: Ke mfùmiag, ke nke'kèt lo ke nsi tsho ntùm yen ndà li.

⁹ David nke ntswe mà ntùm la'kam dù' z'a ke ntsiaṅ ndù: Tusô David là. A be ghubte, a bèn nkut memo' mba' neto' ndùnsi Millo mbèn yi njam mum tusô.

¹⁰ Nufen David tù' ke nzi nèn mbwe nummbe bo Tshùaben Nsi tàndà ntsho bèn mbe.

¹¹ Hiram mfen Tiro tum benntùn David, ntum ntshwèn sédra, ghako' tuba' boa ghatshua'te ndoṅ, bo kut ta' ba' David.

¹² David lèn ndù Tshùaben tshwèt ngù fen se nke ngum num i, mba ndù a tshwèt mbù'te ze nufen num nu nzwit mèn i Israél.

¹³ David bèn ngù tsemo' màndà tse, mbèn nso tsemo' bènnzwi Yérusalém ndùs'a fe Hébron nà. Bo bwe nshumnshum boa ngonngon yi.

¹⁴ Tshù ndèn bon tse bo bwe yi Yérusalém ni: Shammua, Shobab, Natan, Salomon,

¹⁵ Yibar, Elishua, Nefég, Yafia,

¹⁶ Elishama, Eliada, bo Elifélét.

Bo ton ba Filistia ntsho

¹⁷ Ba Filistia ju' ndù bo yo' David fen num njoṅ ba Israél fa, ndùlala bo ko' nèn num i. Bo soṅ David yen nu là, a lo nèn dù' bo kut ntsham ntsiag là.

¹⁸ Ba Filistia kum, nsa ntùm tômbo' ben Refaim.

¹⁹ David bètte Tshùaben nu ntshob ndù: Me nsi ko' nèn num ba Filistia ké? O nsi swèn yub mum mbu màm ké? Tshùaben bùnte David ndù: Ko'o, m'a' swèn yub mum mbu mu.

²⁰ David nèn Baal-Peratsin dù' z'a tshùa yub ntsho là. A bèn ntshob ndù: Tshùaben sate ghakeban tshàm mbwe àm, bo nèn à mba ntse num nèn nà. A ndùlala ze bo tswi lén dù' là ndù Baal-Peratsin nà.

²¹ Bo ghua' neto tshob bwe, David boa ben tse lo' nèn yi fa.

²² Ba Filistia bèn nko' nsate ntùm tômbo' Refaim mo' yoṅ i.

²³ David bètte Tshùaben nu, Tshùaben tshob ndù: O ke nsi ko' à mbwe bo, o nsi tum num bo à njamnjam, o nsi tum num bo à se se, mbwe ntù mbù.

²⁴ Ndùs'o nsi ju' nze ntshùa ju mfe num tshaṅ mbù là, mb'a bwô ndù o nànte, nummb'a b'a Tshùaben bèn nke nzin mbwe o num nebiagte ntshu ntsho ba Filistia.

²⁵ David ghù ju ze Tshùaben tshob yi là, ntshùa ntshu ntsho ba Filistia neto' Guéba nèn nkum Guézer.