2 Samuél 4 - NTSHOB NSI

¹ Ndùse nshum Saulo Ish-Boshet ju' ndù Abner kwù Hébron nà, mbu mi yub, ntù ba Israél nywin neshu.

² Nshum Saulo lo ghù fenfen ntshu ntsho bàa, lén mo' be Baana, lén mo' bèn mbe Rékab; bo na' mb'a tse nshum Rimmon ze Béerot, ndù a tum a netèt tse nshum Benjamin, nummbe bo na' nke ndo' Beérot à mba ze dù' Benjamin nà,

³ mbe ndù ba Beérot lo kù nèn Guittaim dù' bo ke' bwe tà nse' nkum sènni là.

⁴ Yonatan nshum Saulo lo ghù ta' nshum i ndù à b'a nke'kèt num nku mi; a lo ghù ngu'njù tàn, ndù tshô fe Yizréel nse' mbe Saulo bo Yonatan kwù là; nz'é lo' i nkù yi, mb'a ke nànte nekù là, mén nà vù nsi kà ntù' nke'kèt. Lén se b'a Mefiboshet.

⁵ Tse nshum Rimmon ze Beérot Rékab bo Baana nèn ndà Ish-Boshet nka mbwôgtshù, ndùs'a ke mfite njagnyam nà.

⁶ Bo tsho ntùm ndà mba bo tsho lo' à nsa là, ndab i num bam se; yen nà be tôg Rékab bo Baana mfèl i tum nkù.

⁷ Ndùlala bo tsho ndà ndùs'a ke mfite num kunndà se ntùm to'ndà i là, ndab i num bam se nzwi i, nkeb tu i. Bo lo' tu i nzin be tèttswe' ntùm nze z'a tômbo' là.

⁸ Bo lo' tu Ish-Boshet nèn mfà David Hébron, ntshob mfen ndù: Tshù tu Ish-Boshet nshum Saulo ngakeban o z'a ke nya' tu o li; Tshùaben yagte mba' tshùaben mfen àm sènni num Saulo bo nzwil i.

⁹ David bùnte Rékab bo Baana mfèl i, tse nshum Rimmon ze Beérot ndù: Tshùaben z'a na' njôg àm num njoṅ fa'te fa là b'a ntùn.

¹⁰ Mèn z'a se' soṅ àm Tsiklag mbe Saulo kwù là lo kwate mb'a soṅ àm tshô mebwô, là me ghom i bwe nzwi i, mfà nkàbfa' tshô i yi;

¹¹ ndonni ze ghatshùagntù mba bin zwi ta' mèn netsin ntùm ndà i, num kunndà se là, me nsi be ke bètte zin lem tse ntshùate, mbiagte zin num nsitsha' à ndùke?

¹² David tshob ben tse ndù bo zwi yube; bo keb mbu mub boa tu yube, ntaṅ yub mbaṅ diaṅnkat ntse Hébron. Bo lo' tu Ish-Boshet, ntshoṅ ntùm fi Abner Hébron.