2 Samuél 24 - NTSHOB NSI

Nesiaṅ benntùn bo keya'

¹ Yantù Tshùaben bèn nkam num Israél, a tènte David num bo ntshob ndù: Nèn nsiaṅ ba Israél boa ba Yuda.

² Ndùlala mfen David tshob Yoab tàndà ntsho z'a be mbaṅ i là ndù: Nèn nsiaṅ njoṅ nzwit Israél fa neto' Dan nèn nkum Ber-Shéba. Bo siaṅ benntùn me, ngù me lèn njoṅ ze bo be ndonni là.

³ Yoab bùnte mfen ndù: A bwô ndù Tshùaben Nsi o ghù ze nzwit mèn yàm ntshùa mba bo be là yoṅ nkù, miag tshùaben mfen àm yene. Kua' ke z'a ghù tshùaben àm kô neghù yen nu l'à?

⁴ Mfen saṅlaṅ num nu z'a tshob Yoab boa ba tàndà ntsho là; Yoab boa ba tàndà ntsho lo mbaṅ mfen nèn nsiaṅ ba Israél.

⁵ Bo dut Yordan, nte mbàn Aroer, num bag tusô zwim s'a be netèt tômbo' s'a Gad là. A na' mb'a mbaṅ Yaezer.

⁶ Bo nèn ntùm ngô Galad mba ntùm ngô Taktim-Hodshi. Bo nèn Dan-Yoan mba ntùm dù' ts'a ghebte Sidon nà.

⁷ Bo nèn tusô Tiro se bo kut ntsham ntsiag là, mba ntùm ntusô ba Hévia boa ba Kanaan. Bo miagt'a nelo bag Yuda z'a ntèn nà nko' nkum Ber-Shéba.

⁸ Bo zin ntùm njoṅ ngô Israél fa ndùlala, mbe kum Yérusalém ndù bo tswe maṅwù bwe'e lé'njù ṅam mbàa.

⁹ Yoab lo' njoṅ benntùn tse bo siaṅ nà nse' mfà mfen. Tshen ben nà b'a tse bo ku'ni nele' ntsho là. Ba Israél tum benntùn ntsha' nkù fome.

¹⁰ David ju' ntù i nke ntam ndùs'a miagte nesiaṅ benntùn nà. Ndùlala a tshob Tshùaben ndù: Me fàn nu kua' neshu mba me ghù yen nu là là. Tshùaben, ndonni a bwô ndù o lagte mfànnu ngafa' o, nummbe me ghù yen nu l'a ntùm femni!

¹¹ Njù be làn Tshùaben tshob ngatshob ntshob Nsi Gad ze ngayente David ndù:

¹² Nèn ntshob David ndù: Tshù Tshùaben tshob mbe me dù wù mb'a yab nge' mbwe o tat, nke mbètte mb'o tsho' ta' i bwe, a lo' ndab o yi.

¹³ Gad nèn mbaṅ David, ntshob yi ndù: Tshù mba Tshùaben bètte li: O kô a ngu'njù nziku' sammbàa ntùm yu ngô, ke maṅwù tat neke nkù yi mbwe tsho ghakeban tse bo nsi yab njam o, ke lé'njù keya' tat ntùm yu ngô à? Ndonni tsho'o, nsoṅ àm mba me nsi bùnte mèn z'a tum àm nà.

¹⁴ David bùnte Gad ndù: Me b'a ntùm sobni ndùb! A bwô ndù be vù à ntùm mbu Tshùaben, nummbe kondèn i b'a mà ze ndùb. Là, a ke' bwô ndù me vù à ntùm mbu benntùn!

¹⁵ Ndùlala Tshùaben tshag keya' ntùm ngô Israél, neto' nkebnjù nèn nkum ngelaṅ z'a yab là; nelo Dan nèn nkum Ber-Shéba, benntùn kwùte ntùm ngô ntsha' ṅam sammbàa.

¹⁶ Mba Angél ke ntshag bu i num Yérusalém nesat'é là, Tshùaben fém num yen kebwô là, ntshob Angél z'a ke mbiagte ngô là ndù: A ku' ndùlala! Sô bu o ndonni! A lo be be ndù Angél tsin mbaṅ dù' netsham nsa Aravna, ze Yébusia.

¹⁷ David yen Angél z'a ke nzwite benntùn ntùm ngô là, ntshob Tshùaben ndù: Tshù, me ghù nukebwô. A b'a me bèn mbe ngafànnu; ke ze tshen ben ni ghù yub à? A bwô ndù o bù' bu à num àm mba num tunndà tàa!

¹⁸ Gad *gi*nèn mbaṅ David sen lé'njù là ntshob yi ndù: Ko' nèn nkut ta' tômbwôg Tshùaben num dù' netsham nsa Aravna ze Yébusia.

¹⁹ David ko' nèn ndaṅndaṅ mba Tshùaben tshob ndù a tshob yi là.

²⁰ Aravna lôte, njen mfen boa ghafa' tse, bo nke nse' mbaṅ i. Aravna tum nse' mbumte bo mfen ngwù nsi mbwe i kabkab num tsha'a.

²¹ Aravna tshob ndù: Numke tshùaben mfen àm nse' mbaṅ ngafa' i à? David bùnte ndù: Me se' jun à dù' o z'o num ntsham nsa bwe là kut ta' tômbwôg Tshùaben bwe, ndùlala ndù a sô nge' z'a be mum ngô là.

²² Aravna tshob David ndù: A bwô ndù tshùaben mfen àm lo' dù' netsham nsa bwe, mfà tshule'te bwe mb'a ko' ntù i là. Tshen nyàmna' li bo a' ton yube, ndo' nkalig boa tshu ts'a bwe là ngù ntshwèn yi.

²³ Aravna fà njoṅ i fa mfen. Aravna tshob mfen ndù: A bwô ndù nu tsho bwô Tshùaben Nsi o!

²⁴ Là mfen tshob Aravna ndù: Nga, me kô nejun wù, mfà njoṅ nkàb i wù. Mbèn mbe, me ke' kô neton tshule'te ts'a ke' ghù njoṅ i là Tshùaben Nsi àm. David jun dù' netsham nsa boa nyàmna' ndô nkàb silba ṅam ntàn.

²⁵ David kut ta' tômbwôg Tshùaben bwe. A ton ba nyàm bwe, mfà tshule'te tse nefà me bam. Ndùlala ntù Tshùaben fite num ngô, nge' tum ntùm ngô Israél.