2 Samuél 23 - NTSHOB NSI

Miagte ntshob David

¹ Tshù miagte ntshob David li: Tshù ntshob David nshum Isaï, ntshob David mèn ze Nsi lo' i ngù mèn ndùb yi là. David b'a mèn ze Nsi Yakob yo' i là. David b'a ze nganabte nkwi Israél.

² Ywèt Tshùaben be ntshùa num àm ntshob nu. Ntshob mi num num lém sàm.

³ Nsi Israél tshob nu. Gholoṅ Israél tshob me ndù: Mèn z'a be ntô benntùn ntùm nunetsine, nke ntô benntùn ntùm nebwôg Nsi là,

⁴ ng'é b'a mba làn nkebnjù, ndùse nyam tum nke ntà là, mb'a mba lèn nkebnjù ze ndot ke' be bwe là; nyam be ngù ntàm ntse nke nké' num nenà ndùs'a tum nkebnjù là.

⁵ Tunndà àm ke' b'a ndùlala mbwe Nsi ké? Tshù, bag yi lo wat kàn s'a tswe matmat là. Sen kàn nà b'a se ntùn, nke nkabt'àm kua' mebwô.

⁶ Là ghatshùagntù b'a mba njô tse bo num ngua' là, tse bo ke' bèn mbe kwag bu là;

⁷ mèn num be kwag yub ntshùb ta' tùn bu i ke mfàn kô lo, bo bèn nton yub mbwôg à kua' dù' i.

Tse nduku David

⁸ Tshù ndèn ba neta nduku tse bo ke mfa' David li. Yosheb-Bashébet ze Takkemon, mo' mèn netèt ba tàndà ntsho. A lo sab kô num benntùn nkù fome, mbiagte yub nda' yoṅ ntshù'.

⁹ Mèn z'a batte là be Eléazar nshum Dodo, nshum Akoki. A na' mb'a mo' mèn netèt ghama' ntsho tat tse boa David le' ba Filistia tse bo tse'te nema' ntsho, ba Israél sô wut yub nkù nèn num ba ntshùa mbat là.

¹⁰ A lo nsi nzwite ba Filistia ntùnntùn, ntùn netùn kà mbu mi yub, ntàn num ṅwi i. Tshùaben bù' bu i ntshu' Israél sen lé'njù là. Ngô bèn njam, nèn njam Eléazar nda' num nelag ntsha' ben tse bo kwùte là.

¹¹ Mèn z'a be mbatte tat là be Shamma nshum Agué, ze Harar. Ba Filistia lo tse'te Léki. Mo' kam tsha' lo be bwe ndù nkun dun bwe; ngô lo ke nkù num miag ba Filistia nke nène.

¹² Shamma tum ntsin netèt nà, ntshètt'é, ntshùa ba Filistia ntsho. Tshùaben bù' bu i ntshu' Israél sen lé'njù là.

¹³ Ben tat netèt fenfen ṅam ntat swe' num ngelaṅ netsho' tshu, nèn mbaṅ David ntùm ngabloṅ z'a Adullam nà. A na' mb'a ndùse mbàn ba Filistia na' mbe ntùm tômbo' ba Refaim nà.

¹⁴ David na' mb'a ntùm se tusô se bo kut ntsham ntsiag là, mbe ndù ba Filistia ghù ta' dù' Bétléhém.

¹⁵ David ghù nkwate ntù i, ntshob ndù: Be we ghù me nu ntse mi a tum tôntse s'a be nzendà Bétléhém à?

¹⁶ Ndùlala ben tat, ba neta nduku dut tèt mbàn ba Filistia, ntu' ntse ntùm tôntse z'a be nzendà Bétléhém nà. Bo lo' nse' yi mbwe David, mfà yi; là David ke kô nenu, mfètte mbwe Tshùaben.

¹⁷ Ntshob ndù: Tshùaben, tshag nkwate neghù lèn yen nu là ngùanesà num miag màm! Be me nu lem tshen ben ni bo nèn swèn tu tshob là ké? David ke kô nenu ntse. Tshù ju ze tshen ba neta nduku tat là ghù là.

¹⁸ Abishai mfèt Yoab, nshum Tseruya na' mb'a mfen tshen ben tat là. A sab kô se num benntùn nkù tat nzwite yube; lén se ju'ni netèt ben tat là.

¹⁹ A na' mb'a mèn ndùb netèt ben tat, mbe mfen yub; nda' ndù ke kote mbwe benntùn tat.

²⁰ Benaya nshum Yéhoyada, nshum mo' mandum Kabtséel, lo be bwe ndù a dun nzenze fen, lén se bèn nju'ni num ntsho ts'a le' là. A yi na' mbèn nzwi tse nshum Ariél bàa tse bo ghù neta mba ngwayit là Moab. A yi bèn mbèn nswe' nèn tôntse mo' lé'njù nywin mbaṅ be là, nzwi ta' ngwayit z'a be bwe là.

²¹ A lo lab mo' tonte ze Egipto z'a ghù ta' kô bu i là; a lo lo' kôg nswe' nèn yi num i, nkwé kô bu ze Egipto kà ndo' nzwi i yi.

²² Tshù ju ze Benaya nshum Yéhoyada na' ngù là; lén se ju'ni netèt ba neta nduku tat.

²³ A na' mb'a mèn ndùb netèt ben ṅam ntat; là ke kote mbwe benntùn tat. David lo yab i ntùm se kum ntag se tsham.

²⁴ Ba neta nduku ntùm ntsho: Asaél mfèt Yoab. Elkanan nshum Dodo ze Bétléhém.

²⁵ Shamma ze Harod. Elika ze Harod.

²⁶ Héléts ze Palet. Ira nshum Ikkesh, ze Tékoa.

²⁷ Abiézer ze Anatot. Mebunnai ze Husha.

²⁸ Tsalmon ze Akoak. Maharai ze Nétofa.

²⁹ Héleb nshum Baana ze Nétofa. Ittai nshum Ribai ze Guibéa tusô nshum Benjamin.

³⁰ Benaya ze Piraton. Hiddai ze Nakalé-Gash.

³¹ Abi-Albon ze Araba. Azmavét ze Barkum.

³² Eliaba ze Shaalbon. Béné-Yashen. Yonatan.

³³ Shamma ze Harar. Akiam nshum Sharar ze Arar.

³⁴ Elifélét nshum Akashai, nshum mo' mèn Maaka. Eliam nshum Akitofél ze Guilo.

³⁵ Hetsrai ze Karmél. Paarai ze Arab.

³⁶ Yigueal nshum Natan, ze Tsoba. Bani ze Gad.

³⁷ Tsélék mèn Ammon. Naharai ze Beérot, z'a na' nke ntshùb tse tshu ntsho Yoab nshum Tseruya là.

³⁸ Ira ze Yeter. Gareb ze Yeter.

³⁹ Uria mèn Hit. Bo tamte fa ntum benntùn ntshob sammbàa ṅam ntat.