2 Samuél 22 - NTSHOB NSI

Kwi David ndùs'a tum ntshu ghakeban tse là

¹ David yob sen kwi li Tshùaben ndùs'a na' ntshu' i mum mbu njoṅ ghakeban tse fa mba bu Saulo là,

² ntshob ndù: Tshùaben b'a sàm gholoṅ, mbe yàm ndàlem, mbe ngatshu' àm.

³ Nsi b'a sàm gholoṅ dù' me num mfon ndàlem bwe là. A b'a yàm tshètntsho, mbe neta z'a num njôg àm nà. A b'a ngatshètt'àm, mbe ngatshu' àm. Ngayôg àm, o num ntshètt'àm num nu nefètte lem.

⁴ Me num ntsiaṅ Tshùaben, a yôg àm mbu ghakeban tshàm. Ghamte be Tshùaben.

⁵ Nummbe koṅ vùkob lo lam àm mbume, koṅ nesate dù' lo ya' num tu àm.

⁶ Ba nkù tufi lo diaṅ àm mbume, nkù vùkob lo kab mbu num àm.

⁷ Me lo tsin ntùm nge' àm ntsiaṅ Tshùaben, me lo tsiaṅ Nsi àm num ywimte. A lo tsin ntùm dù'ntswe i nju' nz'àm, nkua' màm nèn tà nkum num ntoṅ mi.

⁸ Tsha' lo vètte, nyi'te, tun kamànyam lo kumte, bo vètte, nummb'a lo ya ntù.

⁹ Nzembwôg lo ke ntum ntùm mfaṅ ntselag mi, mo' tonkèt mbwôg nke ntum ntshu i, ba nge'mbwôg ts'a ghe' là nke ntum bwe.

¹⁰ A ben kamànyam, nswe'e. Mo' bwoṅ ndot be tun nku mi.

¹¹ A lo ko' num ba kérubim nke mfùle. A lo ke ntum num mbàb fetmbaṅ.

¹² A lo ghù njam lam i mbum mba ta' ntàb là, ba ntu' ntse diaṅ i mbume, boa ndot ts'a sèn nà.

¹³ Nkuni mi à ke mbe mbwe i là lo ke nsô nge'mbwôge.

¹⁴ Tshùaben tsin mfe kamànyam ntshag là se tù, mèn z'a tà mfe tù là ghù bo ju' nz'é;

¹⁵ a ma' nkét ndo' nsate ghakeban tshàm yi, nkag fambaṅ ndo' ndu' yub yi nsi.

¹⁶ Koṅ dibantse fà wul i tù, bo yen tun njù shù tù, nummbe Tshùaben tam bu i, num tshu'te ywèt ts'a tum mfaṅ ntselag mi là.

¹⁷ A lo tsin mfe tù ntshag bu i ntshùb àm, nsô àm ntùm ntse ndùbndùb.

¹⁸ A lo tshu' àm bu ngamaṅt'àm z'a ta neshu là, mbu ghakeban tshàm tse bo ta ntshùa àm nà.

¹⁹ Ghakeban lo kab mbu num àm num lé'njù nge' sàm, nda' ndù Tshùaben bèn mbe yàm ndàlem.

²⁰ A lo ywimt'àm ntùm ntobni, njôg àm, nummb'a num nkô àm.

²¹ Tshùaben lo ghù m'a nummbe me b'a mèn netsine, a lo tam ntse me nummbe me b'a mbu'u.

²² Me lo ze ntshù' Tshùaben, ke ta tu mbwe Nsi àm.

²³ Me lo tshùb njoṅ ntshù' mi fa, me lo ke tam ntag mi ku.

²⁴ Me be tshàm a ke lo' mbwe i, me bèn mbéb wul àm num nukebwô.

²⁵ Ndùlala Tshùaben lo ghù m'a nummbe me b'a mèn netsine, nummb'a lèn ndù me b'a mbu' num miag mi.

²⁶ O num mbe ngabamntù bin ngabamntù, mbe mèn nenùn bin nèn nenùne.

²⁷ O num mbe mèn nelàn bin mèn nelàne, mbe mèn kebwô bin mèn kebwô.

²⁸ O num njôg nzwit ngafà wut nsi, nke ndo' miag mu nkôg ghako'tewut yi.

²⁹ Tshùaben, o b'a yàm nka'. Tshùaben be nké' ntùm yàm njame, nsat'é.

³⁰ O num mfà ngù' me, me lo' nto' ghakeban tshàm yi, mfà mba' me ndù me lo' mfam yub yi nsi.

³¹ Tse manze Nsi bwô neshu, ntshob Tshùaben tsho nyàm; a ke mb'a tshètntsho num njoṅ benntùn fa tse bo num njab ntù num i là.

³² Nummbe mo' Nsi ke bwe k'a ke nda' Tshùaben. Mo' gholoṅ ke bwe k'a ke nda' Nsi yag.

³³ A b'a Nsi bèn mbe kua' yàm neta ndàlem, a bèn nke ntshagt'àm num manze ndaṅndaṅ.

³⁴ A num ngù nku màm fùag nsi mba mi nkwinyàm nà, nke nte àm num ntshùa mbale.

³⁵ A num nzi'te mbu màm ntsho, mbu màm nke ndù' ngoṅkét tùn meba.

³⁶ O num mfà so tshètntsho yôg me, me tshùa njam bwôntù o ntù' mèn ndùb.

³⁷ O num nke ngù nku màm ta nsi bo ke tshùb àm, me ke tiag ngwù nsi.

³⁸ Me te njam ghakeban tshàm, mbe m'a' biagte yube. Me ke bèn njam ke be ndù me biagte yub fa.

³⁹ Me biagte yube, mbe'te yube, be bo ke bèn ndo nsi; bo vùte nsi tun nku màm.

⁴⁰ O num nso neta num àm num ntsho. O num ngù ghamaṅt'àm tam nsi mbwe àm.

⁴¹ O num ngù ghakeban tshàm so nde mbwe àm, me biagte ben tse bo num mbàn àm nà.

⁴² Bo num ndôte mbaṅ bo, sàm mèn ke tum z'a yôg yub là. Bo num ntsiaṅ Tshùaben, nkua'a, là, a ke bùnte bo.

⁴³ Me num nkute yub mba mbab tsha' là. Me num ntse' yub nku, nyiaṅ yub mba netob mi à be num manze là.

⁴⁴ O num njôg àm bu yàm nzwit mèn z'a kam ntanta là, ndo' àm ngù mfen ngôngô yi; nzwit mèn ze me ke' lèn i là bam nte' me.

⁴⁵ Tse nshum ngùn tshwèt mbatt'àm. Bo num nju' ntshu àm kua' neshu.

⁴⁶ Tse nshum ngùn bi fènntù, nke mvètte ndùse bo tshwèt ntum njam tshob dù' neta tse bo kut ntsham ntsiag là.

⁴⁷ Tshùaben te ku i num nenàfi! Ghamte be gholoṅ àm! A bwô ndù bo ghamte mbèn nyàmte gholoṅ sàm s'a num njôg àm nà.

⁴⁸ A b'a Nsi, yàm ngayagte mba'a. A num ngù me nke ntô benntùn.

⁴⁹ O num ngù me ko' tu ghamaṅt'àm me Nsi. O num ntshu' àm bu ghafètte lem.

⁵⁰ Ndùlala me nsi nyàmt'o netèt ngôngô me Tshùaben. Me nsi yob kwi ghamte lén so yi.

⁵¹ A num ntshu' mfen i yàm yàme, nke nko ndèn mèn z'a yo' i là; ngù ndùlala David bo tunndà i njoṅ ndù fa.