2 Samuél 19 - NTSHOB NSI

David bèn njam Yérusalém

¹ Ndùlala ndém mfen keb. A lo nèn ntùm to'ndà z'a be tù nzendà là ntswe bwe nkua'a. A be zin nke ntshob ndù: Nshum àm! Nshum Absalom! Nshum àm Absalom! Me lo mbe ke kwù yu dù' numke! Nshum àm! Nshum Absalom!

² Mèn nèn ntshob Yoab ndù: tshù mfen nà z'a tshwèt nkua'a, nke ndàn num nshum i Absalom nà.

³ Ndùlala neyob ngu' kaṅ ntù' vù nelàn sen lé'njù li netèt ngô, nummbe ngô lo ju' ndù mfen tshwèt nsobni neshu num nu nshum i z'a kwù là.

⁴ Ndùlala ngô bèn njam tusô kua' ntùm tuswe mba soyé tse bo kù tshwèt ntsho là.

⁵ Mfen lo kabte se i nke nkua' neta nke ntshob ndù: Nshum àm Absalom! Nshum àm Absalom, nshum àm!

⁶ Yoab tsho ntùm to'ndà dù' ze mfen be là ntshob yi ndù: O lo' tuswe nkabte ghafa' tsho yi sènni, ndù sènni bo yôg o, njôg tsho nshum boa tsho ngon, zwi tsho boa màndà tsho.

⁷ O num nkô ben tse bo num mbàn o là, nke mbàn ben tse bo num nkô o là, nummb'o la'te bag sènni mbe fenfen ke ghafa' lo ke tse bwe num yu tu; me lèn ndonni mbe Absalom lo mbe ntùn, njoṅ yag fa kwù mba yen nà bwô o neshu.

⁸ Ndonni a bwô o lo nsi ntum ntshob nu ghafa' tsho. Nummbe me lo' lén Tshùaben nu ngu yi ndù a be z'o ke' tum nà, mba sàm mèn ke nsi be njam o yen tèttswe' li; lèn ndù mba yen nà nsi bag num o tshùate njoṅ nge' fa ts'a tsho o fe tsho lé'njù nshum tà nse' nkum sènni là.

⁹ Ndùlala mfen lo nsi tswe ntshu nsém. Bo tswi nkùn ngô ntshob ndù: Tshù mfen ni z'a tswe ntshu nsém nà. Ngô fa tum nse' mbwe mfen. A lo be be ndù ba Israél kù, mba we lo nèn ntùm ze ntàb.

¹⁰ Ntùm njoṅ tse nzwit Israél fa, ngô nke nta ntshu nke ntshob ndù: Mfen lo tshu' yag mum mbu ghakeban tshage; a na' mbèn njôg yag mum mbu ba Filistia; ndonni a kù la' mbwe Absalom.

¹¹ Tshù là, Absalom ze be na' njo' i ndù a tô be là kwù tshwèt ntsho. Numke bin ke tshob mfen David bèn njam à?

¹² Ju ze bo ke ntshob là tam toṅ mfen. Ndùlala mfen David tum bo nèn ntshob ghafà tshule'te, Tsadok bo Abiatar ndù: Bin tshob ghakwé mbwe ba Yuda, ntshob bo ndù: Ndù bin nsi b'a njam benntùn num neywimt'àm ndù me bèn ntshwèt ké?

¹³ Bin b'a fèt tshàm, mbe lem tshàm, mbe mbàb wul àm. Numke bin mbèn mbe njam benntùn nelo' mfen mbèn yi njam à?

¹⁴ Mfen David tshob ndù bo tshob Amasa ndù: O ke b'a lem tshàm, mbe mbàb wul àm ké? A bwô ndù Nsi yab nge' num àm, a be z'o ke' tù' tàndà ntsho àm njoṅ ndù fa, ndo' ze dù' Yoab là.

¹⁵ Ntshob David sob ntù njoṅ ba Yuda fa kua' mebwô, bo tum nkùn yi ndù a bèn njam boa ghafa' tse.

¹⁶ Mfen bèn njam nse' tà nkum Yordan; ba Yuda nèn Guilgal mbumte bwe boa mfen, ngù a dut Yordan.

¹⁷ Shimei nshum Guéra, mèn Benjamin ze Bakurim nànte nswe' nèn boa ba Yuda mbumte boa mfen David.

¹⁸ A lo ghù ben Benjamin njam i ntsha' mbùm, bo Tsiba mèn z'a ke mfa' ndà Saulo là, nshumnshum ntshob tàn gham boa ghafa' Tsiba ṅam mbàa. Bo dut Yordan mbwe mfen.

¹⁹ Sitima se bo yab mfen nà kel i boa tunndà i ndut yi. Ndùse mfen ke ndut Yordan nà, Shimei nshum Guéra vù nsi mbwe i,

²⁰ ntshob mfen ndù: Kà tshùaben àm kwate mfànnu màm. Kà tshùaben mfen àm kwimte ndù ngafa' i me lo tut'é lé'njù s'a ke ntum Yérusalém nà. A ke' bwô mfen bèn nte lag num bwe.

²¹ Nummbe ngafa' o me lèn nukebwô àm. Tshù, me b'a mbwe mèn sènni, me ze me tum ntùm tunndà Yosèf nebumte bag tshùaben mfen àm nà.

²² Ndùlala Abishai nshum Tseruya tshob ndù: Yen nà b'a ju ze be bo faṅ Shimei ke zwi i num bwe là ké?

²³ Là David tshob ndù: A ze be nu ke ndù nshumnshum Tseruya? Numke bin ntù' ghamaṅt'àm sènni à? Be bo zwi ta' ze Israél sènni ké? Me ke' lèn ndonni ndù me bèn mbe mfen Israél ké?

²⁴ Ndùlala mfen tshob Shimei ndù: Me ke nsi zwi o! Mfen nu ngu yi num yen nu là.

²⁵ Mba Mefiboshet nshum Saulo swe' nèn mbumte ze bo mfen. A lo ke to' sôg nku mi, ke kom nyiaṅ ntshu tse, ke sôg nzwe tse fe lé'njù se mfen tum nèn nà tà nkum lé'njù s'a bèn njam ntùm fite là.

²⁶ Ndùs'a nèn mbwe mfen Yérusalém nà, mfen tshob yi ndù: Mefiboshet, numke be na' mbe ke bèn nèn à?

²⁷ A bùnte ndù: Tshùaben mfen àm, ngafa' àm lo fùt'àm, nummbe ngafa' o me, ze me b'a nke'kèt là lo tshob ngafa' àm ndù a nabte yàm kekwèn me ko' num bwe nèn bag mfen k'a nga tse.

²⁸ A lo bèn ngù ndàm num àm mbaṅ wù tshùaben mfen àm. Nda' ndù wù tshùaben mfen àm b'a mba ta' Angél Nsi là. Tù' ghù mba ke lo z'a ko' ntù o là.

²⁹ Nummbe njoṅ benntùn fa ntùm tunndà tàa b'a ben ts'a bwô bo zwi yub là num miag tshùaben mfen àm. Mba tà ndùlala, o lo yab ngafa' o me netèt ben tse bo ghù njù num téblé so là. Me ke' lèn mo' ju z'a be me bèn ndon mfen àm yi là.

³⁰ Mfen tshob yi ndù: Ntshob mu bèn njwimte ke? M'a' tshob ndù bin, wù bin Tsiba nsi ghabte tsha'a.

³¹ Mefiboshet tshob mfen ndù: A bwô ndù a lo' mba njoṅ i fa, nummbe nu ntùn b'a ndù tshùaben mfen àm bèn njam ndà i ntùm fite.

³² Barzillai ze Galad lo Roguelim nswe' ndut Yordan bo mfen, nèn ntshag i tà yoṅ Yordan.

³³ Barzillai lo ywèn neshu, ngù ngu'njù ṅam fome. A na' mbèn nke ntomte mfen ndùs'a ke ntswe Mahanaim nà, nummb'a na' mb'a kua' ngaju ntshùate.

³⁴ Mfen tshob Barzillai ndù: Tam njam àm bag wù nène, me nsi kém o Yérusalém, la' àm.

³⁵ Là Barzillai bùnte mfen ndù: Me nsi bèn yôg num ngu' si' kà nke nko' nèn bag mfen Yérusalém à?

³⁶ Me ghù ngu'njù ṅam fom ndonni. Be me bèn ndèn ju mebwô ke ze kebwô lo ké? Be ngafa' o me bèn ndèn ndùm ju ze me jù ke ze me nu lo là ké? Be me bèn nju' nze ghayob tshu tse bandum ke tse bènnzwi lo ké? A ywimte ke ndù ngafa' o me bèn mbe lèt wù tshùaben mfen àm à?

³⁷ Mbèn mbe, mfen yôg nke ngù yen mebwô li me ndù à kua' numke? Ngafa' o me nsi nèn tshag o nda' neyoṅ Yordan kà bène.

³⁸ A bwô ndù ngafa' o me bèn njam, nkwù ntùm sàm tusô, mbaṅ tufi tàa bo màa! Là tshù ngafa' o Kimham nà, a nsi dut bo tshùaben mfen àm; a bwô ndù o ghù mba ke lo ze ntù o kô là yi.

³⁹ Mfen tshob ndù: Mb'a bwô bag Kimham dule. Me nsi ghù mba ke lo z'a bwô o là yi; mba ke lo z'o lon me là, me nsi fà wù.

⁴⁰ Ndùse ngô dut Yordan nà, mfen bèn ndut ze là, mfen tate Barzillai, nyàmt'é. Barzillai bèn njam la' i.

⁴¹ Mfen nèn ze Guilgal, Kimham nèn ntshag i. Njoṅ ba Yuda fa boa ta' kam ba Israél lo ghù mfen dut Yordan.

⁴² Là njoṅ ba Israél fa ghebte mbaṅ mfen ntshob yi ndù: Numke fèt tshag ba Yuda ndo' mfen, tunndà i bo ben David ndo' ndut Yordan yi à?

⁴³ Ba Yuda fa bùnte ba Israél ndù: Bag ghù ndùlal'a nummbe mfen b'a yag mèn. Yen nà ya ntù zin numke? A jun yen mebwô là bag ké k'a fà mo' nda' bag num bwe à?

⁴⁴ Ba Israél bùnte ba Yuda ndù: Mfen b'a yag kua' ndaṅndaṅ mb'a be zin nà. David bèn mb'a yag mèn ntshùa zine. Bag ke na' mbe mbwe benntùn nebètte ndù mfen bèn mbèn njam ké? Ba Yuda lo' tshùagntù ntshob nu yi ntshùa ba Israél.