2 Samuél 18 - NTSHOB NSI

Ntsho netèt David bo mén i Absalom. Bo zwi Absalom

¹ David tsha' ben tse bo be njam i là, ngabte yub tse tse, ntsha' mbùm boa nkù, njabte ghatô num bo.

² David ghabte ngô nkam ntat, njab Yoab num ta' kam, njab Abishai nshum Tseruya num mo' kam. Abishai b'a mfèt Yoab. A yab Ittai ze Gat num mo' kam i. Mfen tshob ngô ndù: Mba me nsi tum bag bin.

³ Là ngô tshob ndù: Nga, b'o ke tum! Nummb'a be ze bag ke nkù là, mb'a ke b'a bag ze bo nsi diag là; tu wul o b'a mba ben ntsha' gham netèt bag là. Ndonni a bwô ndù o tum à tusô kà nse' njwimte yage.

⁴ Mfen bùnte bo ndù: M'a' ghù mba ke lo z'a bwô zin nà. Ndùlala mfen tum ntsin ntshu nsém ndùse ngô ke ntum nkù nkù boa ntsha' mbùm nke nèn nà.

⁵ Mfen tshob Yoab, Abishai bo Ittai ndù: Bin tshùa num nkôni ze bin ghù num àm nà, mbe ke nèn num ménnshum Absalom neta neta! Ngô fa ju' ju ze mfen tshob njoṅ fenfen fa num nu Absalom nà.

⁶ Ngô tum nèn tshwèt nema' ba Israél ntsho. Ntsho tôg à ntùm fèn Efraim.

⁷ Ghafa' David tshùa ba Israél ntsho bwe. Benntùn kwùte num sen lé'njù là ntsha' ṅam mbàa, sen lé'njù là b'a se nevù ntsho se ndùb.

⁸ Ntsho lo' njoṅ dù' fa ntùm ngô, ben tse bo kwùte fèn nà yàm ntshùa tse bo kwù ṅwi là sen lé'njù là.

⁹ Absalom be vôg ndù a vù mbu ben David. A na' mb'a num nyàm ze kekwèn bo nyàmdiaṅ bèn mbwe i là. Nyàm tsho bam mo' térébintô ndù nkaṅ mi fate, nyiaṅtu tse ghô num nkaṅ térébintô, a ghet bwe, nku mi tàn tù, nyàm z'a be num bwe là tôg nèn tse.

¹⁰ Mo' mèn z'a yen nà nèn ntshob Yoab ndù: Tshù Absalom ni me yen ndù a ghet bam mo' tù térébintô là.

¹¹ Yoab tshob mèn z'a lo' tshô nse' yi là ndù: O yen i à! Numk'o mbe ke zwi i kua' dù' i à? O fe ngù ndùlala mba me fà ndô nkàb silba wù gham bo ta' kob.

¹² Là yen mèn nà tshob Yoab ndù: Me lo ngù be ndô nkàb silba ntsha' mbùm bu àm mb'a be me ke yab bu àm num nshum mfen; nummbe bag lo ju' ju ze mfen na' ntshob wù, Abishai mba Ittai là. A lo tshob ndù: Mba we lo zete num ménnshum Absalom.

¹³ Me lo njab bu num i ntùm mfùm nzwi i, mba mfen ke tag ke lèn, tu wul o ke bèn ngù yu netshètt'àm.

¹⁴ Yoab tshob ndù: Me ke' bèn ngù ngelaṅ nebagte bag wù. A lo' nkô ntat, nsob Absalom yi kua' ntù i, ndù a ke' à ntùn, num tù térébintô dù' z'a ghet là.

¹⁵ Bonnshum gham tse bo ntshùb tshu ntsho Yoab là diaṅ Absalom mbume, ndab i nzwi.

¹⁶ Yoab ghù bo tô nta, ngô bèn njam, ke bèn neta' ba Israél. Yoab tshèt yub ndùlala.

¹⁷ Bo lo' fe Absalom ma' ntùm mo' tô netèt fèn ndo' mo' loṅ ndùb là nkabte ntshu bwe. Mba zit ze Israél lo kù mbèn ntùm ze ntàb.

¹⁸ Ndùse Absalom ke' ntùn nà, a ghù bo kut ta' ju ntùm tômbo' mfen num lén se; nummb'a lo ke ntshob ndù: Me ke' ghù nshum, z'a be a tù' bo nke ndo' nkwimte lén sàm yi là. Absalom yab lén se num yen ju là z'a ghù bo kut là, lén Absalom bèn nke' bwe tà nkum mba sènni.

¹⁹ Akimaats nshum Tsadok tshob Yoab ndù: Faṅ me kù nde nèn nsoṅ mfen mbwô tshô, ndù Tshùaben yôg i mum mbu ghakeban tse.

²⁰ Yoab tshob yi ndù: A ke b'a wù bèn lo' ba tshô nèn yi sènni; o nsi lo' tshô nèn yi à mo' lé'njù ghua, ke b'a sènni, nummbe nshum mfen kwù.

²¹ Yoab tshob Kushi ndù: Nèn nsoṅ mfen ju z'o yen nà. Kushi vù mbwe Yoab, ndo nkù nde.

²² Akimaats nshum Tsadok bèn ntshob Yoab ndù: A mbe be ndù ke lo o faṅ me kù nde njam Kushi. Yoab tshob ndù: Nshum àm, numk'o nkô nekù nde à? A be o ke nejù bin yen nkùn nà.

²³ Akimaats bèn ntshob ndù: A be be ndù ke lo mba me kô nekù nde. Yoab tshob yi ndù: Kù nde! Akimaats kù nde ntshùa num nze z'a tômbo' là nkwé mbwe Kushi.

²⁴ David na' mb'a nsi dù' z'a tswe netèt nzendà bàa ts'a ke ntsho nsém nà. Ntom lo num tu nzendà nèn num kàbngô, ndôte dù' ndùs'a bù' miag mi là. A yen mo' mèn nke nkù nde tù' i nke nse'e.

²⁵ Ntom bu' ngoṅ, ntshob mfen. Mfen tshob ndù: A be z'a b'a tù' i là mb'a lo' à ba tshô nse' yi. Mèn nà nke nkù nde nse'e, nke ngebte be neghebte.

²⁶ Ntom bèn njen mo' mèn, a nke nkù nde nse'e, a bu' ngoṅ ntshob ngabéb nzendà ndù: Tshù mo' mèn ni a tshwèt nkù nde nse' tù' i là. Mfen tshob ndù: Mba yi lo' à ba tshô nse' yi.

²⁷ Ntom tshob ndù: Mbwe mèn ke nkù nde à mba Akimaats nshum Tsadok là. Mfen tshob ndù: A b'a mèn mebwô, a lo' à ba tshô ntùn nse' yi.

²⁸ Akimaats bu' ngoṅ ntshob mfen ndù: Njoṅ i fa b'a mebwô. A vù nsi mbwe mfen kabkab num tsha'a, ntshob ndù: Ghamte be Tshùaben Nsi o, z'a swèn ben tse bo ke mbù' bu yub nsi num tshùaben mfen àm nà.

²⁹ Mfen bètte ndù: Ménnshum Absalom tswe kua' mebwô ké? Akimaats bùnte ndù: Me lo nju' mo' tshu'te ndùse Yoab lo ntum ngafa' mfen bo kua' yàm tu wut là; nda' ndù me ke' lèn nu z'a nsi là.

³⁰ Mfen tshob ndù: Tsin mfe li li! Akimaats tsin mfe là là.

³¹ Kushi yoṅ nkum ze be kua' ndùse, ntshob ndù: A bwô tshùaben mfen àm ju' mebwô tshô! Sènni Tshùaben ghù nunetsin wù, ntshu' o mum mbu njoṅ benntùn fa tse bo ke mbù' tu nsi num o là.

³² Mfen bètte Kushi ndù: Ménnshum Absalom tswe mebwô ké? Kushi bùnte ndù: Me kwate mbe ju z'a ghù njoṅ ghakeban tsho fa là ghù mba yi ze. Yen ju là ghù njoṅ benntùn fa tse bo num nkwa kebwô num o là.