2 Samuél 17 - NTSHOB NSI

¹ Akitofél tshob Absalom ndù: Faṅ me tsho' benntùn ntsha' ntshob bàa gham! M'a' lo nsi, njab njam David yen tèttswe' li.

² M'a' kot'é ṅwag num i ndùs'a bot mbu mi yub là. Me nsi kag bwôg num bo, ben tse boa bo be là kù nène.

³ Me nsi lab mfen zwi i tù' i, lo' ngô se' fà wù. Mèn z'o tshwèt nya' tu i là nsi kwù njoṅ benntùn fa bèn njam ntèl o, ngô fa be ntùm fite yen ngelaṅ nà.

⁴ Men ntshob li bwô Absalom mba njoṅ ghakwé mbwe fa tse boa bo be là.

⁵ Mba tà ndùlala Absalom tshob ndù: Bin bèn ntsiaṅ Hushai ze Ark, be ju' mba ze tu wut nsi tshob ze là.

⁶ Hushai se' mbaṅ Absalom, a tshob yi ndù: Tshù mba Akitofél tshob li: Be a' ghù ju z'a tshob là ké ke nga à? Tshob yu mb'a bwô neghù là.

⁷ Hushai bùnte Absalom ndù: Ntag mi Akitofél fà yen yoṅ i li là ke' bwô.

⁸ Hushai tshob ndù: O lèn mba tàan boa ben tse num nta num ntsho là. O lèn ndù bo ke ntshùag à mba mbù tshwèt ze bo ghom bon tse là. Tàan b'a ngama' ntsho, a be a ke zi dù' ntshù' boa ngô.

⁹ Yen mb'a' lem ndonni ntùm mo' gheme ke ntùm mo' dù' lo. A be z'a yoṅ mbe to'te tsemo' ben vùte nsi netèt be là, mba tshô ke ghubte kà lo' la', benntùn ke ntshob ndù: Ben bo nèn njam Absalom nà tshwèt ngwùte ntsho.

¹⁰ Yen ngelaṅ nà mba neta nduku z'a ghù mba neta ntù ngwayit là nsi vù ntùm bwôg; nummbe ba Israél fa lèn ndù tàan b'a sa'nde'e, ndèn ndù ben tse bo njam i là b'a ba neta nduku.

¹¹ Màm ntag b'a ndù njoṅ ba Israél fa tse'te mbaṅ o, neto' Dan nèn nkum Ber-Shéba, njàm mba nkwango' mi a num nkaṅ dibantse là. Tu wul o kwé mbwe num ntsho.

¹² Be nsi zin kum num i mo' dù', tsho' vù num i mba meme' num ngwù num tsha' là. Yen ngelaṅ nà sàm mèn ke nsi tum kù, ke tu wul i lo, ke ben tse bo be njam i lo.

¹³ A be z'a kù ntsho ntùm ta' ngô là, mba ba Israél nsi lo' ba nkù nèn yi num sen tusô là, be soṅ tusô ma' i ntùm fube, tà mo' loṅ be ke bèn ngô num semo'o.

¹⁴ Absalom boa njoṅ benntùn fa Israél tshob ndù: Mi ntag Hushai ze Ark fà bu ntshùa mi Akitofél. Nda' ndù Tshùaben na' mbèn nkô nebiagte mi ntag Akitofél mi a be mi ntùn nà, num nelo' nge' nse' yi num Absalom.

¹⁵ Hushai tshob ghafà tshule'te Tsadok bo Abiatar ndù: Akitofél fà men ntag li Absalom boa ghakwé mbwe ntùm Israél, tu wul àm me tshob yàm bo ndù:

¹⁶ Ndonni a bwô bin tum bo nèn nte bu num David ntshob yi ndù: Kà zi ntùm ntômbo' mi a be kônkwa là, là nèn tà mbwe, mbwôg ndù kà mfen boa ngô z'a njam i là kwùte fa.

¹⁷ Yonatan bo Akimaats lo ke ntsin Roguel. Mo' ngafa' ze mènnzwi nke nse' ntshob tshô bo, bo nke nèn ntshob mfen David; nummbe bo lo ke ghù fènntù netsho tusô.

¹⁸ Mo' ménnshum yen yub nèn ntshob Absalom. Là ntu tshob bàa nèn ndende, nzin nkum Bakurim ntùm ndà mo' mèn z'a ghù tôntse ntshu ndà i là. Bo swe' ntsho bwe.

¹⁹ Mènnzwi là lo' kabte nkabte ntshu bwe, ndo' ngefet ze bo tswe' là nsate num kabte ndù kà bo bwôg sàm ju.

²⁰ Ghafa' Absalom tsho ntùm ndà, nèn mbaṅ mènnzwi là mbètt'é ndù: Akimaats bo Yonatan b'a yà? Mènnzwi là bùnte bo ndù: Bo dut ntse. Bo diag yub ke yen, mbèn njam Yérusalém.

²¹ Ndùse bo nèn nà, bonnshum nà ko' tôntse nèn nsoṅ mfen David tshô, ntshob yi ndù: Nànte nène, dut ntse ndende, nummbe Akitofél fà ntag kebwô num o ntshob ndù:

²² Ndùlala David boa ngô ze bo be njam i là lo nsi ndut Yordan; nyam lo be tum nkebnjù ndù bo yà dut fa, kà sàm yub mèn ke tù' njam z'a ke' dut Yordan nà.

²³ Akitofél be yen mba bo ke' zin a num mi ntag là, nabte kekwèn nène. A nèn la' i ntùm ko' se tusô. A tshob ze nu tunndà, nzwi wul i ze tu. Tshù mba Akitofél lo' nkwù yi là. Bo tshoṅ i ntùm fi tàab.

David ntùm ngô Mahanaim; Absalom ke njoṅ i zwi i

²⁴ David zin nkum Mahanaim. Absalom boa njoṅ ba Israél fa tse bo be njam i là dut Yordan.

²⁵ Absalom lo yab Amasa tàndà ntsho num ze dù' Yoab. Amasa na' mb'a nshum mo' mèn lén se Yitra, mèn Ismaél z'a na' ndo' Abigail ngon Nakash, mfèt Tseruya ze mènnzwi là. Tseruya na' mb'a mfèt mà Yoab ze mènnzwi.

²⁶ Ba Israél boa Absalom te mbàn ntùm ngô Galad.

²⁷ Ndùse David zin nkum Mahanaim nà, Shobi nshum Nakash, ze Rabba tusô bon Ammon se' mbwe i, boa Makir nshum Ammiél ze Lodebar, Barzillai ze Galad, ze Roguelim.

²⁸ Bo lo' nkunndà, nkob, nkab tsha'a, ngefele, nsa, mbab bàn, kena neka, nze', nkun nse' yi.

²⁹ Mbèn ndo' kena neka, ṅwa'a, mbùn mi à kut nta là, ba mbwe, boa nzit mfô mi à kut nta là nse' yi. Bo lo' tshen tshu là nse' mfà David bo ngô z'a be njam i là ndù bo jù; nummbe bo lo ke ntshob ndù: Yen nzwit mèn ni yen nge' kà ke tag, nziku' ya yube, bo bot, nzi ntse ya yub num kônkwa neshu.