2 Samuél 16 - NTSHOB NSI

Shun mba ghakeban David

¹ Ndùse David na' ntôgte ntshùa kônga metsili là, Tsiba ngafa' Mefiboshet se' mbwe i boa nkekwèn bàa ndù a kut tshu mvèn bo: Ntu' bàn nkù bàa, tsha ntàm tù ndu' tse bo yagte là nkù, ngù ntàm tù s'a be njàm nkwin njù là nkù, ngù ta' ntu' ndu'.

² Mfen bètte Tsiba ndù: O lo' ghù a kua' ke yi à? Tsiba bùnte ndù: Nkekwèn a' ywimte tunndà mfen neke nko' num bo; bàn boa ntàm tù nkwin njù be nelo' nkém ghuan benntùn yi; ndu' be num nefite ntù ben tse bo bot num kônkwa là yi.

³ Mfen bètte ndù: Mefiboshet mén nshum tàfa' o Saulo b'a yà? Tsiba bùnte mfen ndù: tshù, a ghô Yérusalém nke ntshob ndù: Tunndà Israél nsi ba' nufen tàa me sènni.

⁴ Mfen tshob Tsiba ndù: Mba ke lo z'a na' mb'a ze Mefiboshet là b'a yu. Tsiba tshob ndù: Me vù nsi mbwe o! A bwô me tum mènfen mbwe o me mfen àm, mbe tshùaben àm.

⁵ David zin tà nkum Bakurim. Mo' mèn tum ntùm tunndà bo nzwit Saulo, lén se Shimei, nshum Guéra, ṅwage. A nke nse'e, nke nso ndon,

⁶ nke ma' ndoṅ num David, boa njoṅ ghafa' mfen David fa. A be be ndùlala ndù ngô fa boa ba neta nduku be mbaṅ mfen, ntsinte bu zwim mba bu kwéb.

⁷ Shimei nke nso ndon tu i nke ntshob ndù: Ngafètte lem, tshùagntù mèn, lo nsen nà, lo nsen nà!

⁸ Tshùaben ghù lem tunndà Saulo z'o yi diaṅkwa se là vù tu o. Tshùaben fà nufen mum mbu nshum o Absalom. Tshù wù là ntùm nsobni me ngafètte lem.

⁹ Ndùlala Abishai nshum Tseruya tshob mfen ndù: Numke yen fe mbù li nke nso ndon tu mfen mbèn mbe tshùaben àm à? Me le't'o ndù o faṅ me nèn nkeb tu i.

¹⁰ Là mfen bùnte ndù: A ze be nu ke tse nshum Tseruya? A be ze Shimei so ndon tu àm nà, mb'a b'a Tshùaben bèn ntshob yi ndù a so ndon tu àm me David! Be we kagtùn mbètt'é ndù a ghù à ke ndùlal'a?

¹¹ David tshob Abishai boa njoṅ ghafa' tse fa ndù: Yen mbe kua' nshum àm z'a tum zwe' àm nà tshwèt nya' tu àm; a b'a yoṅ si' num yen mèn Benjamin ni à? Faṅ i là a so ndon tu àm, nummb'a b'a Tshùaben bèn ntshob yi.

¹² Be mo' ndù Tshùaben tam lag num yàm nsobni, ntshàm ndèn màm num ndon ze bo tshwèt nso tu àm sènni là.

¹³ David boa ben tse bèn ntam manze. Shimei nke nzin num tu mbale, mbaṅ David. A be zin nke nso ndon tu David, nke ma' ndoṅ num David, nke mfùag mbabe.

¹⁴ Mfen bo ngô z'a be njam i là zin nkum Ayefim mbole, mfite bwe.

¹⁵ Absalom bo ngô fa, mba njoṅ ba Israél fa tsho Yérusalém; Akitofél na' mb'a bo Absalom.

¹⁶ Ndùse Hushai ze Ark, nshun David kum mbaṅ Absalom nà, a tshob yi ndù: Mfen te ku i num nenàfi! Mfen te ku i num nenàfi!

¹⁷ Absalom tshob Hushai ndù: ndù à mb'o yab ntù o num nshun o là ké? Numk'o ndo mbe ke nèn bin nshun o à?

¹⁸ Hushai bùnte Absalom ndù: A b'a nummbe me kô ne b'a njam mèn ze Tshùaben bo ngô bèn ntsho' i là. M'a' tswe à bag mèn ze bon Israél bèn ntsho' i là.

¹⁹ Mba ndùlala, m'a' fa' à we? A ke b'a nshum i ké? Me nsi fa' wù yu, mba me na' mfa' tàan nà.

²⁰ Absalom tshob Akitofél ndù: A bwô bin tamte mbètte, ndèn mba be nsi ghù là.

²¹ Akitofél tshob Absalom ndù: Nèn mbaṅ ba màndà tàan ts'a faṅ ndù bo tù' nke mbéb ndà là. A nsi tshùa ndùlala ba Israél fa yen mb'o bag num tàan nà, a so neta ntùm mbu ben tse bo be njam o là.

²² Bo kut ta' ntàb Absalom num tuba', Absalom nèn mbaṅ tse màndà tàab kua' num miag ba Israél fa.

²³ Ntag mi Akitofél ke mfà yen ngelaṅ nà ghù mba' à mba mi tu wut Nsi bèn mfà là. Ntag mi Akitofél ke mfà David ke Absalom no là b'a be ndaṅndaṅ.