2 Samuél 14 - NTSHOB NSI

¹ Yoab nshum Tseruya yen mbe ntù mfen bèn njab num Absalom.

² A tum bo nèn Tékoa ndiag ta' ngazete mènnzwi bwe, a tshob yi ndù: Ghù mb'o tshwèt nywin nà, nket ba nzwe vù num o, kà bé'te mfèt. Be mba ta' mènnzwi z'a tswe ngelaṅ yàme, nke ndàn ta' mfe là.

³ O nsi nèn mbaṅ mfen tshobte bin yi. Yoab yab ntshob mi a bwô ndù a tshob là ntshu i.

⁴ Ndùlala mènnzwi z'a Tékoa là nèn ntshob nu mfen; a vù nsi kabkab num tsha' ntshob ndù: Yôg àm me mfen.

⁵ Mfen tshob yi ndù: A nu ke? A bùnte ndù: Me b'a mfôge, ndu àm lo kwù.

⁶ Ngafa' o me ze mènnzwi lo ghù nshumnshum bàa. Ntu tshob bàa lo kam ntanta, nzwe zwe', mèn z'a fagte yub là ke tum; ndùlala mo' lab mfèl i kà nzwi i.

⁷ Ndùlala njoṅ tunndà fa lo nsi num ngafa' o me ze mènnzwi nke ntshob ndù: Fà mèn z'a zwi mfèl i là! Bag kô nezwi i mb'a zwi mfèl i là; bag a' biagte mba njùndà. A be ndùlala mba bo a' biag metsit nesèn mbwôg z'a tù' me là, tshùa ndùlala biagte lén ndu àm num nsitsha'a.

⁸ Mfen tshob mènnzwi là ndù: Nèn ndà o, me nsi nabte yu nu.

⁹ Mènnzwi là z'a fe Tékoa là tshob mfen ndù: Mfen àm, mbe tshùaben àm, ntsha nsi vù a tu àm mba tunndà tàa; be mfen bo ze tunndà ke ju' tshob mo' sàm kebwô.

¹⁰ Mfen tshob ndù: A be ze mèn tshob nu num o là, o lo' i nse' yi mbwe àm, yen ngelaṅ nà mb'a ke nsi bèn tshob nu kwag o yi.

¹¹ Mènnzwi là tshob ndù: A bwô ndù mfen kwimte Tshùaben Nsi i, ndùlala ndù kà ngayagte mba' lem ts'a fètte là, kwi'te fam, mba ndù kà bo biagte nshum àm. Mfen David lo' lén Tshùaben nu ngu yi ntshob ndù: Me bù wù mbe ntàn nyiaṅtu nshum o ke vù nsi.

¹² Mènnzwi là tshob ndù: Tshùaben mfen àm, bam ndù ngafa' o ze mènnzwi tshob nu wù. Mfen bùnte mb'a tshobe.

¹³ Mènnzwi là tshob ndù: Numk'o ntàmte lèn yen nu li num nzwit mèn Nsi à? A be ze mfen tshob ndùlala là, mba kua' mba ze tu wut vù ntsha, nummb'a ke' tsiaṅ nshum i z'a kù la' là ndù a bèn njam.

¹⁴ A b'a kua' nenùn mbe be nsi kwù, be b'a mba ntse mi a sa tshwèt ke ku'ni nebèn ntse'te là; Nsi ke' be sô yôg à nesô, ke bèn nkô ndù nkùla' lo num miag mi à matmat.

¹⁵ Ndonni, a be ze me se' tshob tshen tshu li tshùaben mfen àm nà, mb'a b'a nummbe ngô kag fétwut num àm. Ndùlala ngafa' o me ze mènnzwi tshob ndù: M'a' tshob mfen, be mo' ndù mfen ghù ju ze ngafa' i ze mènnzwi me tshob là.

¹⁶ Kua' nenùn mfen a' ju' ju ze ngafa' i me ze mènnzwi nsi tshob là, ntshu' àm bu tshen ben tse bo tshwèt ndiag nebiagte yage, me bag nshum àm num ntsi' mi Nsi na' mfà ze nzwit mèn nà.

¹⁷ Ngafa' o me ze mènnzwi tshob ndù: Tshùaben mfen àm, a bwô ndù ntshob mu fà fite me. Nummbe tshùaben mfen àm b'a mba Angél Nsi là, ndù a ke' ta yi nelèn mebwô bo kebwô. A bwô ndù bin Tshùaben Nsi o bèn nke mbe njoṅ ndù.

¹⁸ Mfen bùnte ntshob mènnzwi là ndù: Kà lemt'àm nu ze me nsi bètt'o yi là. Mènnzwi là bùnte ndù: A bwô ndù tshùaben mfen àm tshobe!

¹⁹ Ndùlala mfen tshob ndù: Bu Yoab ke ntùm tshu ts'o tshob là ké? Mènnzwi là bùnte ndù: Me lo' yôg so nu ngu yi ndù sàm ju ke' tiag num ju ze mfen tshob là. A b'a kua' Yoab ngafa' o bèn mfà men ntshob li ntshu àm; a yi bèn mfà nu tse ngafa' o me ze mènnzwi lo netshob là me kà me ntshobe.

²⁰ Ngafa' o Yoab ghù ndùlal'a num nekaṅ njam nu a tù' b'a ze nswe, mbe nu ghua. Nda' ndù wù tshùaben àm b'a nzenu, kua' mba ta' Angél Nsi là, num neke ndèn mba ke lo z'a tshwèt ntôg num nsitsha' là.

²¹ Yen nà be tôg mfen tshob Yoab ndù: Ṅ, me kô neghù ndùlala; ndùlala nèn ndo' ménnshum Absalom nse' yi.

²² Yoab vù nsi kabkab num tsha'a, nyàmte mfen, ntshob ndù: Ngafa' o me lèn sènni ndù me tum mènfen mbwe o me tshùaben àm, nummbe mfen ghù kua' mba ngafa' i tshob là.

²³ Yoab lo nsi nèn Gueshur, ndo' Absalom bwe nse' yi Yérusalém.

²⁴ Là mfen tshob ndù: A bwô ndù Absalom nèn ndà i, a ke' bwô ndù a yen se àm. Absalom nèn ndà i, ke yen se mfen.

²⁵ Mo' mènntùn lo ke be ntùm ngô Israél ze lén se ju'ni, a bèn mbwô mba Absalom nà. Nelo tun ku i nèn nkum num tèt tu i sàm lo' lo ke be bwe.

²⁶ Ndùs'a kom tu i mb'a ke nkom i tamngu' là, nyiaṅtu tse sag, ndèle. Nyiaṅtu tse lo ke ndèt nguan kilô bàa, nku'ni njoṅ ze fen be ndèt yi là.

²⁷ Absalom lo ghù tse nshum tat, bo ta' ngon lén se Tamar. Tamar lo bwô neshu.

²⁸ Absalom tswe Yérusalém ngu'njù bàa, ke yen se mfen.

²⁹ A bètte Yoab ndù a tum i mbaṅ mfen; là Yoab ke kô nenèn mbaṅ i; Absalom bèn mbètt'é mbatte yoṅ bàa, Yoab ke kô nenèn mbaṅ i.

³⁰ Ndùlala Absalom tshob ghafa' tse ndù: Bin yen mbe nà Yoab b'a mbaṅ yàm; nsa num bwe kua' mebwô, bin nèn nte mbwôg bwe. Ghafa' Absalom te mbwôg num nà.

³¹ Yoab lo nèn mbaṅ Absalom ntùm ndà i, mbètt'é ndù: Numke ghafa' tsho nte mbwôg ntùm yàm nà à?

³² Absalom bùnte Yoab ndù: Me lo tum bo tshob wù ndù o se'e, nummbe me lo kô netum o mbaṅ mfen, o bètt'é me ndù me na' mfe Gueshur nse' nsen ni à numke di! Mebwô na' mb'a neghô bwe. Me tshwèt nkô nenèn mbwe mfen; a be ze me b'a ngafàn nu là mb'a bwô bo zwi àm!

³³ Yoab nèn mbaṅ mfen nsoṅ i yen nu là. Mfen tsiaṅ Absalom a se' mbaṅ i, ngwù nsi kabkab mbwe i num tsha'a. Mfen tate Absalom.