2 Samuél 10 - NTSHOB NSI

Mfen ben Ammon tute ghafa' David

¹ Yen nà be tôge, mfen tse nshum Ammon kwù, nshum i Hanun tô num ze dù'.

² David tshob ndù: M'a' la'te ntù mebwô num Hanun Nakash, nummbe mba tàab lo la'te num àm yàm. Ndùlala David tum ghafa' tse ndù bo nèn mfite ntù i num vù tàab. Là ndùse ghafa' David ṅwag ntùm ngô tse nshum Ammon nà,

³ fenfen tse nshum Ammon tshob tàfa' yub Hanun ndù: O kwate mbe David tum ben tse ghafite ntù bo se' ghù à nku'ni tàan ké? Bo ke se' tsha' à tusô kà sat'é ké? Tshen ghafa' David li ke' se' mbaṅ o tom à dù' ké? Bo nsi ghù ndùlala kà yôg kam ntsho.

⁴ Ndùlala Hanun ghom ghafa' David, ngù bo kom mo' bag nyiaṅ ntshu tshobe, nkebte nzwe tshob kua' tèt bwe tà nkum tun mfat mube. Yen nà be tôg a ta' yube.

⁵ Bo soṅ David ju z'a tum num ben tse là, a tum benntùn ndù bo nèn mbùmte boa bo, ntshob bo ndù bo ghô Yériko kà nyiaṅ ntshu tshob bit kà bo bèn njam. A lo be be ndù bo b'a ntùm mo' mà tuswe ndùb.

⁶ Tse nshum Ammon yen mbe bo ghù nu z'a bag nkuni là David. Ndùlala bo lo' benntùn ntsha' ṅam mbàa tse neta be bo là nke mbé yube; mfà ntsho'fa' bo; tshen ben nà tum netèt ba Siria tse Bét-Rehob boa ba Siria tse Tsoba, ndo' ben ntsha' mbùm ntùm se la' mfen Maaka, ndo' ben ntsha' ntshob bàa gham netèt ben Tob.

⁷ David ju' yen tshô là, ntum Yoab bo ntshu ntsho ba neta nduku num bo.

⁸ Tse nshum Ammon tum, nkab nsi num ntsho ntshu nsém; ba Siria tse Tsoba boa tse Rehob mba ba Tob boa ba Maaka lo' yub dù' mà tshwèt.

⁹ Yoab yen mb'a bwô nekam ntsho à njam mba mbwe. Ndùlala, a nèn netèt tse nduku Israél, ntsho' benntùn bwe nte yub njam ba Siria;

¹⁰ a yab mfèl i Abishai tàndà ntsho num tshé' ngô z'a tù' là, nte yub njam tse nshum Ammon.

¹¹ A tshob ndù: A be ze ba Siria tà ntshùa àm nà mb'o nsi se' ywimt'àm; mbe tse nshum Ammon ta ntshùa o là, mba me nsi se' ywimt'o.

¹² A bwô be ghù tànntù, nda'te fènntù mum ngô be mba num ntusô Nsi be. A bwô Tshùaben ghù mb'a bwô i là.

¹³ Yoab boa tse ben kù' nèn nkam ba Siria, bo kù mbwe i.

¹⁴ Ndùse tse nshum Ammon yen ndù ba Siria kù là, mba bo yub kù mbwe Abishai mbèn ntùm tusô. Yoab lo njam tse nshum Ammon mbèn njam Yérusalém.

¹⁵ Ba Siria be yen mba ba Israél tshùa yub ntsho là, nkùmte tshob soyé fa.

¹⁶ Hadadézer tum bo nèn ndiag ba Siria tse bo be mo' yoṅ ta'ntse là; bo zin nkum Hélam; Shobak tàndà ntsho Hadadézer na' mbèn mbe tu num bo.

¹⁷ Bo soṅ David, a tse'te ba Israél fa, ndut Yordan nèn Hélam. Ba Siria nabte wut yub mbumte boa David, nkam i ntsho.

¹⁸ Là ba Siria kù mbwe ba Israél. David biagte ntshu ntsho z'a ghù nkalig nkù sammbàa boa ghako' nyàm ntsha' ṅam nkuà là; nzwi mba Shobak tàndà ntsho, k'a kwù à kua' dù' i.

¹⁹ Njoṅ fen fa tse bo be njam Hadadézer là be yen mba ba Israél tshùa yub ntsho là, nso mbu boa Israél, mbam nte' yi. Ndùlala ba Siria ke bèn nkô neywimte tse nshum Ammon.