2 Samuél 1 - NTSHOB NSI

Kwi nsindàvù David num Saulo bo Yonatan

¹ Ndùse Saulo kwù là, David z'a lo netshùa ba Amalék ntsho là, bèn njam Tsiklag ntswe lé'njù bàa.

² A be mbatte lé'njù tat mo' mèn fe mbàn Saulo, ndù nzwe tse fagte, tsha' bèn ndun tu i nse'e. Ndùs'a kum mbwe David là, a vù nsi kabkab.

³ David bètt'é ndù: O fe à yà ? A bùnte ndù: Me tum à mbàn ba Israél kà nkù nse'e.

⁴ David tshob yi ndù: Soṅ àm nu z'a tum nà. A bùnte ndù: Ngô kù tshwèt ntsho, benntùn yàm kwùte; mba kua' Saulo bo nshum i Yonatan kwù.

⁵ David tshob ménnshum nà z'a lo' tshô nse' yi yi là ndù: O lèn à ndùke mbe Saulo bo nshum i Yonatan kwù à ?

⁶ Ménnshum nà z'a lo' tshô nse' yi yi là bùnte ndù: Me lo mb'a num mbat Guilboa; Saulo lo ntam kô se nsi ṅat bwe, nkalig boa ghako' nyàm tù' ke neyab mbu num i.

⁷ Ndùs'a lo nkaṅ wul i là, a yen àm ntsiaṅ àm. Me tshob ndù tshù me li.

⁸ Tu wul i tshob me ndù: O b'a we ? Me bùnte yi ndù me b'a ze Amalék.

⁹ A tshob me ndù: Kù'te nse' nzwi àm, nummbe netshaṅ tshwèt nshùmt'àm, mba mba yôg ke' num àm ndun nà.

¹⁰ Me kù'te nèn mbaṅ i, nzwi i, ndèn mebwô ndù a lo ntum ngwù be nsi mb'a' kwù. Ndùlala me lo ntsho' tshe' fen s'a tu i là, nsô kwa s'a be bu i là kà nke nse' fà tshùaben àm.

¹¹ David tshùb nzwe tse mfagte, njoṅ benntùn fa tse boa bo be là ghù be ndaṅndaṅ.

¹² Bo tswe nsi vù, nkua'a, ntswe nziku' tà nkum mfetnjù, ngù ndùlal'a num Saulo bo Yonatan nshum i, num nzwit mèn Tshùaben boa tunndà Israél tse bo kwùte num ntshùag ṅwi là.

¹³ David tshob ménnshum z'a lo' tshô nse' yi yi là ndù: o b'a ze yà? A bùnte ndù: Me b'a nshum ta' ngùn, ta' ze Amalék.

¹⁴ David tshob yi ndù: Numk'o lo mbe ke bwôg neyab bu num mèn ze Tshùaben yo' i là, kà nzwi i tsho à ?

¹⁵ David tsiaṅ mo' ta' mèn i ntshob yi ndù: Kù'te nse' nsen ni nzwi i. Mandum nà lab ze Amalék là nzwi i, a kwù.

¹⁶ David tshob yi ndù: A bwô ndù lem tsho nèn à be tu o, nummb'o bèn nkeb yu ntsha yu tu wut. Tu wul o tshob mb'o zwi mèn ze Tshùaben yo' i là!

¹⁷ David nabte kwi nsindàvù num Saulo mba num Yonatan nshum i,

¹⁸ ntshob bo zi'te njoṅ bon Yuda yi fa. A b'a kwi s'a ghù nze tse yàm nà, bo kit'é ntùm ṅwa'ni Mèn Netsine.

¹⁹ Neta bon Israél lo kwùte vùte num nkônga! Ba neta sa'nde' kwùte vùte ndù a ndùke?

²⁰ Kà tswi yen nkùn nà Gat, kà tshob yen tshô là num manze ts'a Askalon nà, mbwôg ndù kà ngonngon Filistia tsiaṅte, mbwôg ndù kà ngonngon ba kesiket yob ngu'u tshùa ntsho.

²¹ Tse mbat Guilboa! Kà meme' ke mbaṅ no bèn mbe num bin! Kà nà bèn mbe num bin ts'a ghù mfà mbwe ntàm mi num ju bwôntù là! Nummbe dù' ze bo na' ma' ntshètntsho ba sa'nde', tshètntsho Saulo là, bo ke' bèn neyo' nese' yub mfèt.

²² Mbwe lem ben tse bo sobte yub là, mbwe nzit ba neta nduku, ngoṅkét Yonatan lo ke be bèn tuntun, ṅwi Saulo ke ke mbèn njam banban.

²³ Saulo bo Yonatan lo ke nkôni neshu. Bo b'a ku ntshù' ntùm yôg, mb'a ku ntshù' ntùm vùkob. Bo lo fùag wut ntshùa ba sa'mbu'u, nta ntshùa ba ngwayit.

²⁴ Ngonngon Israél, bin làn Saulo! A lo ke ma' kuni nzwe ndob num bin, nke ntaṅte kwiwut gol num nzwe tsine.

²⁵ Ba neta soyé vùte nsi, bo zwite yub tshwèt ntsho. Yonatan nyit nsi num nkônga ndù à ndùke?

²⁶ Yonatan, mfèl àm, yen nu là kut ntù àm. O lo tanjoṅ me kua' neshu, ntanjoṅ me ntshùa nkôni bènnzwi.

²⁷ Ba neta soyé vùte nsi. Bo sate tshen ghafùag wut num ntsho li à ndùke?