2 Pétro 3 - NTSHOB NSI

Lé'njù Tshùaben

¹ Fèt tshàm tse nkôni, yen ni b'a mbatte ṅwa'ni bàa ze me kite bin nà; ntùm tshen ṅwa'ni là, me num nkam zin num miaglo ntùm ntag màm, ndù bin ghù zenu nelàne,

² nkwimte tshu tse ghatshob ntshob Nsi tse nelàn bwôgmbwe ntshob là, mbèn nkwimte ntshù' Tshùaben mba ngayôg be ze ghantum tsin tswite bin nà.

³ Bin bwôgmbwe ndèn ndù ghatshabte nsi se' ntùm tshabte num miagte lé'njù, bo nsi zin ntùm ghe'te yub,

⁴ tshob ndù: Lé'njù s'a nsi se'e, mb'a be ntùm nka'ni là yà? Nummbe fe ngelaṅ ba tà kwù là, njoṅ tshu fa b'a be mal i fe mba nenabte njù be là.

⁵ Là tshen ben ni ntùm yub nekô, lagte ndù kamànyam lo bwôgmbwe mbe, tsha' tum ntùm ntse, netèt ntse, njam ntshob Nsi;

⁶ njam tshen tshu là, njù yen ngelaṅ nà lo bi ntùm dibantse.

⁷ Là ndonni, be njam ntshob mbile, Nsi lem kamànyam mba tsha'a, ndé' yub num mbwôge, mum lé'njù netsho'te ntsha mba lé'njù nebagte ben tse bo ke' be ghamt'é là.

⁸ Fèt tshàm tse nkôni, a lo ke bwô bin lagte yen ni ndù: Ta' lé'njù ntshù' be mbe Tshùaben à mba ngu'njù ntsha' mbùm nà, ngu'njù ntsha' mbùm be mba ta' lé'njù ntshù' là.

⁹ A ke b'a ndù Tshùaben lèl à wut num nka'ni i, mba tsemo' ben tshwèt ntshob num yen lètwut là là, là, a ke nefènte num bin; a ke' kô sàm mèn bi, là, a kô ndù njoṅ benntùn fa ghô, nkaṅ ntù tshobe.

¹⁰ Là lé'njù Tshùaben nsi se' à mba ntshô là; ntùm sen lé'njù là, kamànyam nsi tôg ntùm fet neta, tshu njù ts'a tshwèt nkù là sate, tsha mba tshu tse bo fa' ntùm bwe là kù ntùm mbwôge.

¹¹ Ndùlala mba tshen tshu là nsi sate là, a lo mbwô ndù bin ghô ntùm yôg nelàne mba ntùm neghamte Nsi,

¹² nke mbébe, mbèn nke nànte lé'njù Nsi s'a nsi se' là, lé'njù ze kamànyam nsi sate ntùm mbwôge, tshu njù ts'a tshwèt nkù là zi ntse là.

¹³ Ndaṅndaṅ mb'a be ntùm nka'ni là, bag à bin tshwèt mbéb kamànyam nswe mba tsha' nswe, dù' ze nunetsin nsi tswe là.

¹⁴ Fèt tshàm tse nkôni, ndùlala bin be béb yen nà, nkagtùn ndù Nsi tèt zin ke ṅu'u, kelo', ntùm fite.

¹⁵ Bin lo' nefènte Tshùaben be mba yôg là, mba mfèt be ze nkôni Paulo, lo kite yen nà bin ntùm zenu ze bo na' mfà yi là.

¹⁶ A ju z'a be nkite ntùm njoṅ ṅwa'ni fa dù' z'a be ntshob tshen tshu là là, ntùm tshen ṅwa'ni là, tsemo' dù' ntùm bwe ta neju'u; benntùn tse bo ke' zi'te, ke bèn ngù tànntù là num mbagte ntun mi kebwô, mba bo be ngù num tsemo' ṅwa'ni là; bo ke ngù ndùlal'a num nko' yub nebi.

¹⁷ Fèt tshàm tse nkôni, ndùlala mba bin à lèn yen nà là, bin ghom wut tsine, mbwôg ndù kà ben kebwô soṅte zin njam tatte yub, bin tum ntùm tànntù zine,

¹⁸ là bin ku' ntùm kondèn mba nelèn Tshùaben be mba ngayôg be Yésu Kristô. Ghamte be yi fe ndonni tà nèn nkum miagte lé'njù. Amén.