2 Kronika 9 - NTSHOB NSI

Màmfen Séba nèn tsha'te Salomon

¹ Mfen Séba z'a na' mb'a mènnzwi là ju' bo nke nsoṅte nu mfà num Salomon, ndùlal'a se' num nelo' ba tànkùt ndaṅt'é yi. A se' Yérusalém bo mo' bwoṅ benntùn, mba bwoṅ kamél ndùbo ket mfèt nelamte, nket gol ndù a yàm neshu boa ndoṅ tanjoṅ. Mfen mènnzwi là tsho ndà Salomon, nsoṅ i njoṅ tshu fa ts'a ghù ntù i là.

² Ndùlala Salomon tote miag mi num njoṅ tshu fa ts'a bètte là; sàm ju mba ntshù' lo ke tshùa Salomon, ke sag i netote ntun mi mfen mènnzwi.

³ Ndùse mfen mènnzwi Séba yen njoṅ zenu Salomon fa bo ba' z'a kut là,

⁴ njen jujù z'a be num téblé se, dù'ntswe ghafa', fa' kamkam tse, boa nzwe ben tse bo ke mfa' yi là, ghama' ndu' tse boa nzwe tshobe, mbu' tuko' tse bo ke nko' bwe nèn ntùm ndà Tshùaben nà, ntù i tum,

⁵ a tshob mfen ndù: Njoṅ tshu fa me na' nju' ntùm ngô àm bo tshob mfà num o bo zenu o là na' mb'a kua' nenùne.

⁶ Me lo ke yoṅ nke mbam ntshob benntùn, mb'a ndonni ze tu wul àm se'e, ndo' kua' miag màm njen yi là. Nda' ndù nu tse bo soṅ àm nà ke' ku' mba nda' kam ze miag màm yen nà. Zenu o ya' nka', lén so bèn nju'ni ntshùa mba bo ke nsoṅte là.

⁷ Ghafen b'a ben tsho, ghafen b'a ghafa' tsho tse bo mbe mbwe o njoṅ ndù fa nke nju' zenu o là.

⁸ Ghamte be Tshùaben Nsi o, yi ze nu tsho bwô i, a te o num diaṅkwa se mba ze mfen Tshùaben Nsi o là! A tshùa mba Nsi o be nkô Israél, nkô ndù a tswe matmat là, k'a te o num mfen ndù o tô Israél, nke ngù nu ndaṅndaṅ bo nunetsine.

⁹ Mfen mènnzwi là fà gol mfen Salomon talaṅto bon bàa nkù, mfà mfèt nelamte yi kua' yàme, boa ndoṅ tanjoṅ. Bo lo ke bèn mfà mfèt nelamte mfen Salomon a yàm mba njoṅ mi mfen mènnzwi z'a Séba fà yi là.

¹⁰ Ghafa' Huram boa tse Salomon tse bo lo' gol mfe yi Ofir là, lo' mba ntshwèn sandal boa ndoṅ tanjoṅ nse' yi.

¹¹ Mfen lo' ntshwèn sandal nabte tuko' yi num ba' Tshùaben bo ba' mfen; ndo' mo' nabte ndoṅ nse' bo ndoṅ yi mfà ghayobkwi. Bo lo ke yoṅ nto' yen mfuni yen nu là ntùm ngô Yuda.

¹² Mfen Salomon fà mba ke lo ze mfen mènnzwi z'a fe Séba kô là yi, mba ke lo z'a bètte là, mfà tshu yi ntshùa ts'a lo' nse' yi, mfà mfen nà. Yen nà be tôg mfen mènnzwi bèn njam ntùm ze ngô boa ghafa' tse.

¹³ Gol z'a ke nse' Salomon mba sit lé'njù lo là na' mb'a talaṅto ntshob ntôg bon ntôg nkù ntôge,

¹⁴ kà njôg ngù z'a ke nsô bu ghatantàne, bo z'a ke ndo' tshuntàn njun yi là, z'a ke mfe fenfen Arabia boa ba ngomna ntùm ngô; tse bo ke ndo' gol bo silba nse' yi Salomon là.

¹⁵ Mfen Salomon lo' gol z'a tswe là nabte ntshètntsho ndùbndùb yi nkù bàa, ta' tshètntsho nke ndo' gol ndô nkàb nkù ntôge;

¹⁶ mbèn ndo' gol z'a tswe là nabte memo' ntshètntsho nke'nke' yi nkù tat, ta' tshètntsho nke ndo' gol ndô nkàb nkùtat. Mfen yab men ntshètntsho là ntùm ba' fèn Liban.

¹⁷ Mfen lo' sô nsennyàm nabte diaṅkwa ndùb yi, ndo' gol ntùn njo' i yi.

¹⁸ Diaṅkwa là lo ghù ndaṅ mi ntôge, bo ta' kamnko' gol ndù bo kwim i num diaṅkwa. Diaṅkwa lo ghù mbu mi mba num zit bag i lo; ngwayit bàa lo be mbaṅ mbu diaṅkwa,

¹⁹ ngù ngwayit ntshob bàa gham ndù bo tete yub num njoṅ ndaṅ diaṅkwa fa ndaṅndaṅe. Bo ke' yoṅ nto' ghù ndùlala num sàm mfen mba ntshù'.

²⁰ Bo lo lo' à gol nabte njoṅ tse ntu' mfen Salomon yi fa, ndo' à gol ntùn nabte njoṅ tshu téblé ba' fèn Liban yi. Bo lo ke lo' silba nabte sàm ju yi. Silba lo ke be mo' ju num ze ngelaṅ Salomon.

²¹ Nummbe mfen lo ghù nsitima mi a fe Tarsis, mi boa ghafa' Huram ke nse' là; a lo ke mbe kum ngu'njù tat nsitima fe Tarsis nse'e, ndù a ket gol bo silba, sô nsennyàm, ba nkanmaké boa paon (a b'a mo' tshaṅ saṅ se mbàb mi zi neshu, ngù nto'nto' là) nse' yi.

²² Mfen Salomon tshùa njoṅ fenfen nsitsha' fa num tshunkàb bo zenu.

²³ Njoṅ fenfen nsitsha' fa lo ke ndiag neyen Salomon, num neju' zenu ze Nsi yab tu i là.

²⁴ Mba we lo nke ndo' nda' nse' yi: Tshu tse bo lo' silba nabte yi là boa tse gol, ba nzwe, tshuntshùag, ba la, ba nyàmdiaṅe, boa nyàm tse kekwèn bo nyàmdiaṅ bèn mbwe là. Bo lo ke ngù ndùlala mba num zit ngu'njù lo.

²⁵ Salomon na' ghù nto'ndà ba nyàm ntsha' kuà num ba nyàm, boa nkalig ntsho mba ghako' nyàmdiaṅ ntsha' ntshob bàa gham z'a ghabte yub ntùm ba ntusô num neke mbéb dù', mfaṅ tsemo' mbaṅ mfen, mà Yérusalém nà.

²⁶ A lo ke ntô njoṅ fenfen fa, neto' num nta'ntse nèn nkum ngô ba Filistia, tà nèn nkum ndùnsi Egipto.

²⁷ Mfen ghù silba tù' ju banban Yérusalém ndaṅndaṅ mba ndoṅ nà; sédra bèn njàm mba ba fènngab ts'a be mbile, nke nku' ntùm tômbo' là.

²⁸ Tse nyàmdiaṅ Salomon na' nke mfe à Egipto.

²⁹ Tshé' mfa' Salomon, mbwe mi boa njam mfa' mi, bo kite ntùm ṅwa'ni ngatshob ntshob Nsi Natan, ntùm ntshob ngatshob ntshob Nsi Akiya ze Silo mba ntùm njem tse ngatshob ntshob Nsi Yéedo na' njen num Yéroboam nshum Nébat là.

³⁰ Salomon tô njoṅ ngô Israél fa ngu'njù ṅam nkuà. A na' nke ntswe à Yérusalém.

³¹ Yen nà be tôg Salomon nèn ntèt tà tse. Bo tshoṅ i ntùm tusô tàab David. Roboam nshum i jù fen num ze dù'.