2 Kronika 8 - NTSHOB NSI

Nzenze mfa' Salomon

¹ Ngu'njù ṅam mbàa be ku', Salomon kut ba' Tshùaben bo ko' ze ba';

² a kut ntusô mi Huram na' mfà yi là, ntete bon Israél bwe,

³ Salomon tshùa bag Tsoba, ma' Hamat ntsho, ndo' i.

⁴ A kut Tadmor kônkwa boa ntusô fa mi Hamat ke ndem tshu bwe là.

⁵ A kut Bét-Horon z'a mfe tu là bo Bét-Horon z'a tunnsi là, ntusô ndù bo kut ntsham ntsiage, ndù a ghù ba kum ba', ba nzendà boa ba fùn;

⁶ Baalat, njoṅ ntusô fa mi a ke ndem tshu bwe, ntusô mi a bèn ngù là, njoṅ ntusô nkalig fa, ntusô ghako' nyàm, bo mba ke lo z'a bwô Salomon nekut Yérusalém, Liban bo ngô z'a be ngatô bwe là.

⁷ Njoṅ tshé' ba Hit, ba Amor, ba Férésia, ba Hévia boa ba Yébusia fa, tse bo na' mbe ke tum à netèt nzwit Israél là,

⁸ njoṅ yen nzwit mèn ni a na' ntù' ntùm ngô, bon Israél ke biagte yub là, Salomon lo' yub ngù ghafa' nànfa' yi. Bo ke' à be yi tà nse' nkum sènni.

⁹ Salomon ke bam sàm mèn Israél fa' yi mba nkuan nà; nummbe bo na' mb'a ghama' ntsho, tse fenfen, tse tàndà ntsho, ghatshagte mi nkalig boa tse ghako' nyàm.

¹⁰ Fenfen tse mfen Salomon yab tu ngô ndù bo ke ndôte ngô là na' mb'a ntu bon tàn nkù bàa.

¹¹ Salomon ghù ngon Faraon ko' tusô David nse' ntùm ba' z'a kut là; nummb'a lo tshob ndù: Nzwi àm ke nsi tswe ntùm ba' David mfen Israél, nummbe dù' tse Koṅ Tshùaben tsho bwe là b'a nelàne.

¹² Ndùlala Salomon ton ba nyàm Tshùaben num tômbwôg Tshùaben, tômbwôg s'a nabte yi mbwe nzendà là.

¹³ A fà mba ke lo ze Mosé na' nkite num mba sit lé'njù lo, num ba Sabbat, ba ntshùa ṅwù, boa ba njùa là, yoṅ tse tat num tamngu', mum lé'njù jùa bàn ke te ywimte se, lé'njù jùa ba ngabnjù, bo lé'njù jùa ba ntàb.

¹⁴ A te nkamnkam ghafà tshule'te num fa' boa ben Lévi mb'a bètte nebe là, ngù à kua' mba tàab David na' njà tsiagte là. Ben Lévi nke ngamte Tshùaben, nke mfa' mba sit lé'njù lo mbwe ghafà tshule'te. A te ghabéb nzendà mba num zit nzendà lo, mba zit lo num yub kam i; nummb'a mba David mèn Nsi na' ntshob là.

¹⁵ Bo ke sô ju num ntshob mfen mfà num ghafà tshule'te boa ben Lévi, ke num sàm ju mba ntshù' lo, ke num nu z'a kwag tshunkàb lo.

¹⁶ Tshù mba fa' Salomon ke ntôg là, fe lé'njù nema' tun ba' Tshùaben tà nkum lé'njù ze bo miagt'é là. Ndùlala bo miagte nekut ba' Tshùaben.

¹⁷ Ndùlala Salomon nèn Esion-Guéber mba Elot, nkaṅ dibantse, ntùm ngô Edom.

¹⁸ Huram tum ghafa' tse tse bo lèn dibantse mebwô là, bo se' mfà ba nsitima yi. Bo nèn boa ghafa' Salomon Ofir, ndo' talaṅto gol bwe bon tàn nkù kuà nse' mfà mfen Salomon.