2 Kronika 6 - NTSHOB NSI

¹ Ndùlala Salomon tshob ndù: Tshùaben tshob mb'a' tswe ntùm njame.

² Ndùlala me kut ta' ba' z'a nsi be yu dù'ntswe là, dù' z'o nsi tswe bwe matmat là!

Netam saṅ la' Ndà Nsi nsi

³ Mfen kaṅ wul i nze dù' ze ntse'te bon Israél be là, naṅ mbotni num bo, ndù bo tsinte tù.

⁴ A tshob ndù: Ghamte be Tshùaben, Nsi Israél, ze tu wul i na' ntshob nu tàa David ntshu i là. Tu wul i tshwèt nzwiagte yen nka'ni là ntùm neta nke ntshob ndù:

⁵ Fe mum lé'njù se me na' nsô yàm nzwit mèn Israél mum ngô Egipto là, me ke' yoṅ ntsho' tusô netèt njoṅ nzwit Israél fa dù' ze bo nsi kut ba' bwe, lén sàm be bwe là; me ke' tsho' mènntùn z'a be mfen yàm nzwit mèn Israél là;

⁶ là me lo tsho' Yérusalém a be dù' ze lén sàm nsi tswe là, ntsho' David ndù a tô yàm nzwit mèn Israél.

⁷ Tshù, tàa David lo ghù nkwate nekut ta' ba' num lén Tshùaben Nsi Israél.

⁸ Là Tshùaben tshob ndù: Mb'o ghù nkwate nekut ta' ba' num lén sàm nà, o ghù a bwô mba yen nkwate là se' ntù o là.

⁹ Nda' ndù a ke b'a wù nsi bèn kut ba' me, là, nshum o z'a tum zwe' o là nsi bèn kut ba' num lén sàm.

¹⁰ Tshùaben zwiagte ntshob mi a na' ntshob là. Me lo tswe num ze dù' tàa David, ntswe num diaṅkwa ngô Israél, mba Tshùaben na' ntshob là, kà nkut ba' num lén Tshùaben Nsi Israél.

¹¹ Me nabte dù' ntùm bwe neyab Koṅ bwe, Koṅ se Kàn Tshùaben be bwe là. Kàn b'a s'a na' ngwat boa bon Israél là.

Salomon le'te Nsi mbwe benntùn

¹² Salomon lo nèn ntsin mbwe tômbwôg Tshùaben, mbwe njoṅ ntse'te bon Israél fa, mbù' mbu mi tù.

¹³ Nummbe Salomon lo ghù mo' ṅate dù', ndo' à tùn fôgtab nkut yi. A te yen ṅate dù' là netèt bam ntshundà; yen ju là ghù mbu mbàa kam num kum tse kuà fa, nèn tù ta' bu kam. Salomon tsin bwe, nte nkekwi' mi nsi mbwe njoṅ ntse'te bon Israél fa, ntshag mbu mi mfe kamànyam ntshob ndù:

¹⁴ O! Tshùaben Nsi Israél! Mo' Nsi ke bwe z'a fut'o là, ke mfe tù mfe kamànyam, ke mànsi num nsitsha' lo. O be ntshùb kàn bo kondèn o num ghafa' tsho tse bo be nzin mbwe o njoṅ ngô ntù yub fa là.

¹⁵ Ndùlala, o lo tshùb ntshob mi o na' ntshob ngafa' o, tàa David là. O tshwèt ndo' à neta nzwiagte nu z'a tum ntshu o là yi sènni.

¹⁶ Tshùaben Nsi Israél, lôte mba mo' nka'ni mi o na' nka' tàa David, ngafa' o là ndonni. O lo tshob yi ndù: B'o ke zi mbwoṅ njùndà o num màm miag, njùndà z'a nsi tswe num diaṅkwa ngô Israél là. A b'a nda' ndù bon tsho tse bandum zete num nzin mube, nke nzin mbwe àm ndaṅndaṅ mba tu wul o na' nzin mbwe àm nà.

¹⁷ Tshùaben Nsi Israél, a bwô ndù o zwiagte nka'ni mi o na' nka' tàa David, ngafa' o là.

¹⁸ A b'a kua' nenùn ndù be Nsi tswe num nsitsha' ké? Tshù là, kamànyam, njoṅ kamànyam fa kag num o, kà njôg mbe se' num yen ba' li ze me kut là!

¹⁹ Mba tà ndùlala, a bwô ndù Tshùaben Nsi àm kù' ntoṅ nju' le'te bo ze nema' mbu ngafa' i; a bwô ndù o ju' nz'é, o ju' le'te z'a tshwèt nde't'o yi sènni là.

²⁰ A bwô ndù miag mu te num yen ba' li, num yen dù' li z'o na' ntshob ndù lén so nsi be bwe là. A bwô ndù o ju' le'te ze ngafa' o tsin dù' mbit nke nde't'o yi là.

²¹ Netsho'o, bam ze nema' mbu ngafa' o bo ze yu nzwit mèn Israél ndùse bo nsi tswe num yen dù' li le't'o là! Ju' nze yub tà mfe tù, num dù'ntswe o mfe kamànyam, ju' nze yub ndagte mfà bo.

²² Mèn ghù nukebwô mfèl i, bo nànt'é ndù a nu ngu, nkàn mfe, a be z'a se' nkàn mfe mbwe tômbwôg wù Tshùaben, ntùm yen ndà li là,

²³ mb'a bwô ndù o tsin mfe kamànyam nju' nz'é, ngù num i mb'a bètte là. Tsho'te ghafa' tsho; naṅ ntsha tu ngafànnu, ngù ndù nzin mi vù à be tu i; ghù nunetsin mbu'u, ngù num i à mb'a b'a mbu' là.

²⁴ Ndùse yu nzwit mèn Israél nsi vù ntsho mbwe ngakeban, mb'a ta tu wù là, a be ze bo bèn njam ntèl o, mfà ghamte num lén so là, a be ze bo le't'o, ma' mbu wù ntùm yen ndà li là,

²⁵ mb'a bwô ndù o tsin mfe kamànyam ndagte nukebwô yu nzwit mèn Israél, ndo' yub mbèn yi njam ntùm ngô z'o na' mfà bo mba tà tshob là.

²⁶ Ndùse kamànyam nsi fùne, mbaṅ be ke lo, num nukebwô tse bo ghù num o là, a be ze bo le't'o num yen dù' li, mfà ghamte num lén so, ndo' mvèn yub ntam nukebwô tshob yi, mb'o ma'ni yub là,

²⁷ mb'a bwô ndù o tsin mfe kamànyam ndagte nukebwô ghafa' tsho bo yu nzwit mèn Israél. Tswite yub manze ntùn ze bo nsi ke zin num bwe là. A bwô yen ngelaṅ nà ndù o ghù mbaṅ lo num tsha' ts'o na' mfà yu nzwit mèn mba ntsi' là.

²⁸ Ndùse kekua, keya', bangùa, mbé', ngamntàn nzebà nsi be ntùm ngô, ndùse ngakeban nsi lo' yu nzwit mèn mum ze ngô, tsho mum tse nsém, ndùse nge' yàm ke ngokèt lo nsi be là,

²⁹ a be ze ta' mèn, a be ze njoṅ yu nzwit mèn Israél fa ke nde't'o, nke ma' mbu wù, mba we lo lèn ze mfaṅ, nyit mbu mi ntshag num yen ba' li là,

³⁰ mb'a bwô ndù o tsin mfe kamànyam ntùm dù'ntswe o ndagte mbèn njwimte. Ghù mba we lo mb'a bètte là, mba nzin mi be yi là; tu wul o lèn mba we lo, o bèn ndèn ntù njoṅ benntùn fa.

³¹ Bo nsi ke bwôg o njoṅ ngelaṅ fa ze bo nsi yôg ntùm ngô z'o na' mfà tà tshag là.

³² Ndùse ngùn z'a ke' tum à netèt yu nzwit mèn Israél nsi fe ngô z'a ngùanesà num nu lén so, nummbe bo nsi lèn ndù lén so b'a se ndùb, bu o be ze neta, laṅbu o be ndù a sage, se' le't'o ntùm yen ndà li là,

³³ mb'a bwô ndù o tsin mfe kamànyam, ntùm dù'ntswe o, mfà ju ze yen ngùn nà nsi lon wù là yi. A nsi tshùa ndùlala njoṅ nzwit benntùn fa nsitsha' lèn lén so, nke mbwôg i, ndaṅndaṅ mba yu nzwit mèn Israél là. Bo nsi lèn ndù bo be ntsiaṅ lén so mum yen ba' li ze me kut là.

³⁴ Ndùse yu nzwit mèn nsi tum nèn ma' ngakeban ntsho, zin à num manze z'o nsi la'te yi là, a be z'a le'te Tshùaben, nkaṅ se i nke ndôt'a tusô s'o na' ntsho'o, nke ndôt'a ba' ze me kut num lén so là,

³⁵ mb'a bwô ndù o tsin mfe kamànyam nju' le't'é bo ze nema' mbu, ngù nunetsin yi.

³⁶ A be ze bo ghù nukebwô num o nummbe sàm mèn ke bwe z'a ke' be ghù nukebwô là, o ya ntù num bo, mfà yub mum mbu ngakeban ndù a lo' yub nèn yi ndà kuan mum ze ngô ke yen ngô là sag, k'a ghebte lo.

³⁷ Bo tsho ntùm yen ngô ze bo be kuan bwe là, nkaṅ ntù tshob bwe, mbèn njam ntèl o ntùm ntù tshobe, ma' mbu wù ndà kuan ntshob ndù: Bag lo ghù nukebwô, bag lo fàn nu, bag b'a ghafànnu.

³⁸ A be ze bo se' wù ntù yub fa, zwiag sob fa ntùm ndà kuan bo be bwe, nde't'o, ndù bo tshwèt ndôte nze dù' ngô z'o fà tà tshobe, nze tusô s'o na' ntsho'o, nke ndôte ba' ze me kut num lén so là,

³⁹ mb'a bwô ndù o tsin mfe kamànyam, dù' ze dù'ntswe o be là, nju' le'te yub boa yub nema' mbu, ngù nunetsin num bo; ndagte nukebwô tse yu nzwit mèn ghù num o là.

⁴⁰ Wù Nsi àm, ndonni a bwô ndù o te miag mu, mbèn nkù' ntoṅ mu num le'te ze bo le't'o yi yen dù' li là.

⁴¹ Tshùaben Nsi, a bwô ndù o lo nsi ndonni, nse' num yu dù', dù' z'o fite là, bin Koṅ so, Koṅ nkuni mo. Tshùaben Nsi, a bwô ndù tsho ghafà tshule'te ma' yôg num bo, ben ts'o num nkô yub là tsiaṅte ntùm fu'!

⁴² Tshùaben Nsi, a ke' bwô ndù o tèn yu ngayo' mfèt. Kwimte kondèn z'o na' ngù num ngafa' o David là.