2 Kronika 5 - NTSHOB NSI

¹ Tshù mba Salomon miagte mfa' fa num Ndà Nsi là. Yen nà be tôge, Salomon lo' njoṅ tshu fa tse tàab David lé' là nse' yi:

Nete Koṅ Kàn Ndà Nsi

² Ndùlala Salomon tse'te njoṅ ghakwé mbwe bon Israél fa mbaṅ i mà Yérusalém, num neket Koṅ Kàn Tshùaben s'a be ntùm tusô David se lén se be Sion nà.

³ Njoṅ ba Israél fa tse'te mbaṅ mfen num nu jùa se bo ke njù num mbatte ṅwù sammbàa là.

⁴ Ndùse njoṅ ghakwé mbwe bon Israél fa ṅwag là, ben Lévi ket Koṅ.

⁵ Bo ket Koṅ bo ntàb mbumte boa njoṅ tshu fa' nelàn fa ts'a be ntùm ntàb là. Ghafà tshule'te boa ben Lévi na' mbèn nket Koṅ.

⁶ Mfen Salomon bo njoṅ mbumte bon Israél fa z'a tsiaṅ mbaṅ i là tsinte mbwe Koṅ. Bo fà mbwe boa nyàmna' yàm neshu, Kà mèn ke bèn nku'ni nesiaṅ ndèn njoṅ i.

⁷ Ghafà tshule'te ket Koṅ Kàn Tshùaben njab num ze dù', ntùm dù' nelàn mum ndà, ntùm dù' nelàn ntshùate, bam mbàb ba kérubim.

⁸ Mbàb ba kérubim lo sag tà nyit nèn nkabte dù' ze Koṅ be là; ba kérubim nke mbomte Koṅ boa nkeba nelo' nket Koṅ yi.

⁹ Nkeba lo sag neshu kà bo nke ntsin dù' nelàn njen ntôg mi ntùm dù' nelàn ntshùate; là, bo lo ke be yen ntôg mi njam njù. Koṅ num nke' bwe tà nse' nkum sènni.

¹⁰ Nda' ntafèt mbàa mi ndoṅ Mosé na' njab bwe Horéb là na' mbe ntùm bwe. Men ntafèt là b'a mi Mosé kwé ndùse Tshùaben wat kàn boa bon Israél ndùse bo tum mum ngô Egipto là.

¹¹ Num yen ngelaṅ nà ghafà tshule'te tum dù' nelàne, nummbe njoṅ ghafà tshule'te fa tse bo be bwe là lo lànte wut tshobe, ke zin nka mba nkam nkam mub be là;

¹² njoṅ ben Lévi fa tse bo be ghayobkwi là, Asaf, Héman, Yédutun, tshob nshum boa fèt tshobe, ndù bo ket nzwe mebwô ntsinte bag tômbwôg z'a ntumnyam nà, boa ba netsha'a, ndoṅ boa ndoṅ nse'e; ghafà tshule'te ntu ntsha' bon bàa nkù lo be mbaṅ bo nke ntô nta;

¹³ ndùse tse bo ke ntô ba nta tamte nze boa tse bo ke njob kwi nyàmte mbèn ngamte Tshùaben yi tshag nze ba nta, ba netsha' boa tsemo' tshu nebu' ju yi tù là, bo nyàmte Tshùaben ntshob ndù: Tshùaben b'a ngabwôntù, kondèn i bèn nke ntswe matmat! Num yen ngelaṅ nà ndot dun ntùm ndà Tshùaben.

¹⁴ Ghafà tshule'te ke bèn nku'ni netswe ntùm bwe mfa' fa' num ndot z'a be ndà là. Nummbe nkuni Tshùaben lo ke ndun ntùm Ndà Nsi.