2 Kronika 34 - NTSHOB NSI

Nufen Yosias

¹ Yosias lo be jù fen ndù a ghù ngu'njù fome. A tô num ngu'njù ntshob ntshù' ṅam ntat, nke ntswe Yérusalém.

² A ghù nu ndaṅndaṅ num miag Tshùaben, nzin à kua' num tse manze tàab David; ke sô ku i nèn bu zwim ke bu kwéb lo.

³ A lo be kum num fen ngu'njù fome, ndùs'a ke' mônke' là, nto' nediag Nsi tàab David. A be kum num fen ngu'njù ntshob bàa gham, nto' nelànte Yuda bo Yérusalém num ba mbwe', ba neto, ba bebun nekom boa bebun tùne.

⁴ Bo sate ntômbwôg Baal à mbwe i, a be'te ba neto tse bo te num lén lagnyam, bo b'a mfe tu bwe là; a be'te ba neto, ba bebun nekom boa bebun tùne, ndab njoṅ i fa k'a tù' mbabe; a naṅ mbab mi num ntufi ben tse bo fà tshule'te bo là;

⁵ a ton mvôg ghafà tshule'te num ntômbwôg mube. Tshù mba Yosias na' ndo' ndànte Yuda bo Yérusalém yi là.

⁶ Ntùm ntusô Manasé, Efraim, Siméon boa mi Néftali, njoṅ dù' fa netèt ba fam,

⁷ a lo sate ntômbwôge, mbe'te ba neto boa bebun nekom kà bo tù' à mbabe. A be'te ba bebun tse bo te num lén lagnyam nà ntùm ngô Israél fa. Yen nà be tôg a bèn njam Yérusalém.

Ngale'te ze ndùb yen ṅwa'ni kàn

⁸ A be kum num fen ngu'njù ntshob fom gham, ndùs'a lànte ngô bo ba' là, ntum Shafan nshum Atsalia, Maaséya mfen tusô bo Yoak nshum Yoakaz, ngalé' ṅwa'ni, ndù bo nèn nabte ba' Tshùaben Nsi i.

⁹ Bo nèn mbaṅ Hilkija ngafà tshule'te ze ndùb, bo fà nkàb ze bo na' nse' yi Ndà Nsi, ben Lévi tse bo ke mbéb nzendà kwé là. Yen nkàb là na' mfe à Manasé, Efraim bo tshé' bon Israél. Mo' nkàb bèn mfe à Yuda fa, mfe Benjamin boa ba Yérusalém fa.

¹⁰ Bo fà nkàb là mum mbu ben tse bo fà fa' nenabte ba' Tshùaben bo là. Bo lo' nkàb là nke mfà ben tse bo ke mfa' num nenabte ba' Tshùaben nà;

¹¹ bo nke mfà ghalo' tuba' boa ghakut ba', nke njun ndoṅ netshua'te yi, nke njun ntshwèn yi num ba mbwoṅ boa ze tuba', mba' mi fenfen Yuda na' nsate là.

¹² Tshen ben nà lo' à ntù nenùn mfa' yi. Ghatshagte yub na' mb'a Yakat bo Abdia, ben Lévi tse bo tum netèt tse nshum Mérari, Sakaria bo Meshullam, ntum netèt tse nshum Kéhat là;

¹³ njoṅ ben Lévi fa tse bo lèn neyob ju mebwô là lo ke ndôte mfa' mbu fa; tsemo' ben Lévi lo bèn mbe bwe, mb'a ghakite, ghalôte boa ghabéb nzendà.

¹⁴ Ndùse bo ke nsô nkàb ze bo se' yi ndà Tshùaben nà, ngafà tshule'te Hilkija fon ṅwa'ni ntshù' Tshùaben mi Mosé na' mfà là.

¹⁵ Ndùlala Hilkija tshob Shafan ngakite ndù: Me fon ṅwa'ni ntshù' ntùm ndà Tshùaben. Hilkija fà ṅwa'ni Shafan.

¹⁶ Shafan lo' ṅwa'ni nèn mfà mfen, nsoṅ i nu num bwe ntshob ndù: Ghafa' tsho fa' mba ke lo z'o bètte ndù bo fa' là;

¹⁷ bo tse'te nkàb z'a be ndà Tshùaben nà, mfà ntùm mbu ghalôte boa ghafa'.

¹⁸ Shafan ngakite bèn ntshob mfen ndù: Ngafà tshule'te Hilkija fà ta' ṅwa'ni me. Shafan siaṅ ṅwa'ni mbwe mfen.

Yosias ghù bo bètte Hulda ngon mfen nu

¹⁹ Ndùse mfen ju' ntshob ntshù' là, a fagte nzwe tse.

²⁰ Ndùlala mfen tshob Hilkija, Ahikam, nshum Shafan, ntshob Abdon, nshum Mika, ntshob Shafan ngakite bo Asaya ngafa' mfen ndù:

²¹ Bin nèn mbètte Tshùaben nu num yàm tu bo ju z'a tù' Israél bo Yuda, ndù a kwag nu num ntshob yen ṅwa'ni li ze bo fon nà, nummbe yantù Tshùaben b'a ze ndùb num be. Yantù i kamte num be. Tà be lo ke ze ntshob Tshùaben, ke ze tshu tse bo kite ntùm yen ṅwa'ni li là.

²² Hilkija boa ben tse mfen tsho' là nèn mbaṅ ngatshob ntshob Nsi ze mènnzwi Hulda, nzwi Shallum, nshum Tokehat, nshum Hasra, ngabéb ba nzwe. Ngatshob ntshob Nsi là na' nke ntswe à Yérusalém ntùm mo' taṅla' tusô. Ndùse bo tshob ju bo tshob yi là,

²³ a bùnte bo ndù: Tshù ju ze Tshùaben Nsi Israél tshob li: Bin nèn ntshob mèn z'a tum zin mbaṅ àm nà

²⁴ ndù Tshùaben tshob ndù a nsi lo' nge' se' yi num yen dù' li mba num ba la', lo' ndon fa tse bo kite ntùm ṅwa'ni ze bo lo nesiaṅ mbwe mfen Yuda là.

²⁵ Nummbe bo ghua' àm, mfà ba labinda tsemo' nsi, ndo' nkamte yantù àm yi. Bo tshùa njam mfa' mbu mub nkamte yantù àm, mbe ndù a ke nsi fite num yen dù' li.

²⁶ Mbe se' mba mfen Yuda z'a tum zin bin se' mbètte Tshùaben nu là, bin nsi tshob yi ndù: Tshù ju ze Tshùaben tshob num ntshob mi o ju' li:

²⁷ Mba yen nu là kwag ntù o, o fà wul o nsi mbwe Tshùaben, nju' ju me tshob num yen dù' li boa ba la' tse, naṅ ntsha tu bo, nso ndon nelo' nyi'te yub yi là, me Tshùaben ju'. Nummb'o fagte nzwe tsho, nkua' num miag màm.

²⁸ A ndùlala me nsi lo' o mbaṅ tà tsho ntùm fite, bo tshoṅ o ntùm fi so. Miag mu ke nsi yen njoṅ nge' fa tse me nsi se' yi num yen dù' li boa ba la' tse là. Bo bèn njam mfà mbùn ntshob mfen.

Yosias bèn ngwat kàn bo Nsi

²⁹ Mfen kùmte njoṅ ghakwé mbwe fa tse bo Yuda mba Yérusalém nà.

³⁰ Yen nà be tôg a ko' nèn ndà Tshùaben boa njoṅ ba Yuda fa mba njoṅ ba Yérusalém fa, ghafà tshule'te, ben Lévi mba njoṅ ngô fa neto' num tse ndùb nèn nkum num tse nke'e. A siaṅ ntshob ṅwa'ni kàn ze bo fon ndà Tshùaben nà mbwe bo.

³¹ Mfen tsin num dù' i bo bom nà, ngwat kàn bo Tshùaben. A bam mb'a nsi ke tam njam Tshùaben, ke ze ntag mi, nkàn mi boa ntshù' mi njoṅ ngô ntù i fa bo njoṅ zwiag se fa, ndù a tshùa ndùlal'a lé' njoṅ ntshob sen kàn ni bo kite ntùm yen ṅwa'ni là là.

³² A ghù njoṅ benntùn fa tse bo be Yérusalém, Benjamin nà tsho ntùm kàn; ba Yérusalém ghù à mb'a be ntùm kàn Nsi, Nsi tà tshob là.

³³ Yosias biagte njoṅ tshùaya'nu fa ntùm njoṅ ngô fa ts'a b'a tse bon Israél là. A nànte mba zit mèn no z'a be ntùm ngô Israél là ndù a fa' Tshùaben Nsi yub. A ke sô wul i num Tshùaben Nsi tà tse njoṅ ngelaṅ fa z'a be ntùn nà.