2 Kronika 32 - NTSHOB NSI

Senakérib lo' ngô Yuda

¹ Ndùse Ezékia fa' tshen tshu là boa men mfa' bamntù là là, Senakérib, mfen Asiria tsho Yuda, nkab mbu num ntusô mi bo kut ntsham ntsiag là, ngù nkwate nelo' ngô.

² Ezékia be yen mba Senakérib se'e, nke nkwate nekam Yérusalém ntsho là,

³ ntsin tsham boa tse fenfen, boa tse ba neta nduku, num nezwiag ba ntse fa mi a be njam tusô là. Boa bo be ntshu ntshù'.

⁴ Mo' bwoṅ benntùn tse'te nzwiag ba ntse boa bon nta'ntse mi a ke nswe' tèt yen bag ngô là là. Nummbe bo lo ke ntshob ndù: Fenfen Asiria nsi be kum nsen ni tèt ntse yàm à numke?

⁵ Ezékia fèn ntù; a bèn nkut kàbngô z'a ke ntù' nevù là, nkut tà nkum num ba dù' nebéb dù' yi. A bèn nkut mo' kàbngô njam njù, mbèn nkut Millo ntùm tusô David, nabte tshu ntsho yàm boa ntshètntsho.

⁶ A fà fenfen soyé ngô, ntse'te yub mbaṅ i num nsém ntshu mbu' ngô. A tshob nu bo, ntshob ndù:

⁷ Bin ghù tànntù, ngù fènntù; kà bin bwôg; ke vètte mbwe mfen Asiria, ke mbwe bwoṅ benntùn boa bo be lo; nummbe ben tse be ghù là yàm ntshùa tse bo ghù là.

⁸ A ghù à bu mènntùn, be ghù Tshùaben Nsi be z'a nsi ywimte be bèn ma' ntsho num ze be tu là. Ngô yab ntù num ntshob Ezékia mfen Yuda.

Nkùn ze Senakérib tum ba Yérusalém nà

⁹ Senakérib mfen Asiria z'a be mbwe Lakis boa tse ntshu ntsho là tshag ntum Yérusalém, bo tshob Ezékia boa ba Yuda ndù:

¹⁰ Tshù mba Senakérib mfen Asiria tshob li: Bin yé't'a yà kà mfùn wut tsin Yérusalém à?

¹¹ Bin yen mbe Ezékia ke netatte zine, mbe ndù a' ghù bin kwù nziku' bo nzi ntse, nke ntshob bin ndù: Tshùaben Nsi be nsi tshu' be bu mfen Asiria.

¹² A ke b'a yi Ezékia na' mbiagte ba mbwe' boa ntômbwôg Tshùaben, ntshob Yuda bo Yérusalém ndù bo ke ngwù nsi à mbwe nda' ta' tômbwôg, nke mfà ba labinda à bwe ké?

¹³ Bin ke' lèn ju ze bag à tà tshàm na' ngù tsemo' ben ntùm tsemo' ngô là ké? Tse nsi tshen ngô là lo tshu' ngô yub mum mbu màm ké?

¹⁴ Netèt njoṅ nsi tshen ngô là tse tà tshàm biagte yub là, a zit z'a sô ze ngô bam yàm mba' kà Nsi zin nku'ni netshu' zin mum mbu màm à?

¹⁵ A ndùlala, kà bin nefaṅ Ezékia mfùte zine. A ke' bwô nebam mb'a tshob là. Sàm nsi, ntùm sàm ngô ke nufen no mba ntshù' ke' to' tshu' tse ben mum mbu màm ke mbu tà tshàm lo. Zin Nsi b'a zit kà nku'ni netshu' zin bu àm à?

¹⁶ Ghafa' Senakérib bèn ntshob kebwô num Tshùaben Nsi mba num ngafa' i Ezékia.

¹⁷ A tum ta' ṅwa'ni tute Tshùaben Nsi Israél, ntshob num i ntùm bwe ndù: Ndaṅndaṅ mba tse nsi tsemo' ngô na' mbe ke ku'ni netshu' yub ngô bu àm nà, be mba Nsi Ezékia ke tshu' i bu àm.

¹⁸ Ghafa' Senakérib tshag nze yub tù, nkua' ntshob nu ba Yérusalém tse bo be tù kàbngô là. Yen nà na' mb'a nelo' nkag bwôg bo fétwut yi num bo, ndo' tusô. Bo tshob nu à ntùm ntshob Yuda.

¹⁹ Bo tshob nu num Nsi Yérusalém à mb'a b'a ba nsi ngôngô tse bo nsitsha' là, tshen nsi là ts'a b'a fa' mbu mènntùn nà.

Nsi tshu' Yérusalém

²⁰ Mfen Ezékia bo ngatshob ntshob Nsi Esaya nshum Amots le'te Nsi num yen nu là, nkua' ntshob Nsi.

²¹ Ndùlala Tshùaben tum ta' Angél, a biagte mbàn mfen Asiria, nzwite ba neta nduku, kamkam boa fenfen. Tuswe ko mfen, a bèn njam ntùm ze ngô. A tsho ntùm ndà ze nsi, ko' tse nshum wal i.

²² Tshù mba Tshùaben tshu' Ezékia boa ba Yérusalém mbu Senakérib mfen Asiria là. A tshu' yub bu njoṅ benntùn fa, nkabte yub num ben tse bo diaṅ yub mbum nà.

²³ Benntùn yàm lo' tshu bwôntù nèn yi Tshùaben Yérusalém, mfà tshu ntùn Ezékia mfen Yuda. Ezékia lo tù' mèn ndùb num miag njoṅ ngôngô fa.

Miagte nufen Ezékia

²⁴ Num yen ngelaṅ nà Ezékia nke ngone, ngon à vùvù. A le'te Tshùaben, Tshùaben bùnte yi njam ta' nsà.

²⁵ Là, Ezékia lèn mebwô ze Tshùaben ghù yi là, ka'te ko' ntù i, yantù Tshùaben kam num i mba num Yuda bo Yérusalém.

²⁶ Mba tà ndùlala a fà wut nsi boa ba Yérusalém fa, ndùlala yantù Tshùaben ke ghô num bo num ka'te ntù yub njoṅ ngelaṅ fa z'a ke' ntùn nà.

²⁷ Ezékia ghù tshunkàb yàme, mba nkuni yàme; a ghù tshunkàb silba, gol, ndoṅ tanjoṅ, mfèt nelamte, ntshètntsho; njoṅ tshu fa tse be mèn kô là;

²⁸ ba nta neke njab tshu bwe: Nsa, ndu' bo mfèt, ngù ba mba' nyàm nzenze boa nko' nyàm.

²⁹ A kut ba ntusô, ngù bwoṅ nyàm yàme, tse nke'nke' boa tse ndùbndùb; nummbe Nsi lo fà tshu yi yàm neshu.

³⁰ A b'a be Ezékia na' nzwiag ntse Guihon mfe tu bwe, nkaṅ koṅ i a nèn bag tusô David z'a be mbinyam nà. Mba ke lo ze Ezékia to' là nke ngwù lag.

³¹ Là, ngelaṅ fenfen Babilon tshag ntum mbaṅ i num nelèn nsà z'a tôg ntùm ngô là, Nsi ghua' i ndo' ndaṅt'é yi, ntshùa ndùlala lèn ju z'a be ntù i là.

³² Tshé' mfa' Ezékia, mfa' bamntù i bo kite ntùm ṅwa'ni njem ngatshob ntshob Nsi Esaya nshum Amots, ntùm ṅwa'ni fenfen Yuda bo Israél.

³³ Ezékia nèn ntèt tà tse, bo tshoṅ i num dù' neṅate z'a be num mfi tse nshum David là; ba Yuda boa ba Yérusalém ghù nku'ni yi ndùs'a kwù là. Nshum i Manasé tô num ze dù'.