2 Kronika 31 - NTSHOB NSI

Ezékia ghabte mfa' Ndà Nsi

¹ Ngelaṅ bo miagte njoṅ i fa là, njoṅ ba Israél fa tse bo be nsi là nèn ntùm ntusô mi a be Yuda là. Bo be'te ba neto, ndab ba bebun fa naṅ nsi, nsate njoṅ ba mbwe' fa boa njoṅ ntômbwôg fa ntùm Yuda bo Benjamin, ts'a Efraim nà boa ts'a Manasé là. Yen nà be tôg njoṅ bon Israél fa bèn ntùm ntusô mube, mba we lo ntùm se la'.

² Ezékia bèn nte ghafà tshule'te boa ben Lévi ndaṅ ndaṅe, mba bo be ngabte yub là, mba we lo num mi mfa', ghafà tshule'te boa ben Lévi num neke nton ba nyàm, num tshule'te tse nenyàmte, num fa', num nkwi boa neke ngamte num nzendà ts'a tshwèt ntsho mbàn Tshùaben nà.

³ Mfen fà mo' bag tshu tse num ba nyàm tse bo a' ke nton nà, num tse bo ke nton nkebnjù mba mfetnjù là, mba tse bo ke nton ba lé'njù Sabbat, ba ntshùa ṅwù boa ba njùa, mba bo kite ntùm ntshù' Tshùaben nà.

⁴ Mfen tshob ngô, ben tse bo be Yérusalém nà, ndù bo fà mo' bag tshu tshob ghafà tshule'te boa ben Lévi, a tshùa ndùlala bo ze ntshù' Tshùaben kua' ntù yub fa.

⁵ Ngelaṅ ze yen tshô là tam toṅ ngô là, bon Israél fà mbwe tshu yàme: Mbwe nsa, ndu', mfèt, ṅwa'a, boa njoṅ mbwe tshu fa ts'a tum mum nà là; bo ghabte njoṅ tshu fa nze gham mfà ta' nze i ntshù'.

⁶ Be ndaṅndaṅ bon Israél boa bon Yuda tse bo ke ntswe ntùm ntusô Yuda là, ghabte nyàm ndùbndùb boa tse nke'nke' nze gham, ngabte njoṅ tshu nelàn fa tse bo ke njab Tshùaben Nsi yub là nze gham, mfà ta' nze ntshù' num lén Tshùaben. Bo tse'te tshen tshu là tse tse.

⁷ Bo to' netse'te tse tse num mbatte ṅwù tat, miagte num mbatte ṅwù sammbàa.

⁸ Ezékia boa fenfen nèn njen njoṅ tse tse, nyàmte Tshùaben bo ze nzwit mèn Israél.

⁹ Ezékia bètte ghafà tshule'te boa ben Lévi nu mfà num tse tshu là.

¹⁰ Ndùlala Azaria ngafà tshule'te ze ndùb, mèn ntùm tunndà Tsadok bùnte yi ndù: Fe mba bo to' nelo' tshu bwôntù nse' yi ndà Tshùaben nà, bag lo ke njù, njwèt njoṅ yag fa, mbèn mfaṅ tse yàme, nummbe Tshùaben lo naṅ mbotni num ze nzwit mèn; bèn njen tshé' i ze yàm z'a tù' li.

¹¹ Ezékia tshob bo nabte nto'ndà ntùm ndà Tshùaben, bo nabte.

¹² Bo ket tshu bwôntù boa ta' bag ju ntshù' num tse nze gham nèn yi bwe, boa tshu nelàne. Mèn Lévi Konania be ngalôte, mfèl i Shimei be nkwébu i.

¹³ Yéhiél, Azaria, Nakat, Asaél, Yérimot, Yozabad, Eliél, Yismakia, Mahat bo Benaya lo b'a ghafa', Konania bo mfèl i Shimei be ghatshagte, kua' mba mfen Ezékia bo Azaria mfen ndà Tshùaben tshob là.

¹⁴ Koré mèn Lévi, nshum Yimna z'a ke mbéb nzendà z'a ntumnyam nà, na' mbèn nke ndôte tshu tse benntùn ke mfà Nsi num yub nekô là. Nke ngabte tshu bwôntù tse bo fà Tshùaben nà boa tshu nelàne.

¹⁵ Bo lo yab Edèn, Minyamin, Yoshua, Shemaéya, Amaria bo Shekania ntùm ntusô ghafa' le'te, Koré bèn nke ntshagte yub neghabte tshu fèt tshob kua' mb'a bwô là, ke dùbdùb ke bônke' lo, be mba bo yabte yub ndaṅndaṅ nà;

¹⁶ bon bandum tse bo kite ndèn mub ndùse bo ghù ngu'njù tat k'a ntôgte là; njoṅ benntùn fa tse bo ke ntsho ndà Tshùaben mba sit lé'njù lo num mub mfa', num mub ndaṅ mi là;

¹⁷ ghafà tshule'te tse bo kite ndèn mub num tshob tunndà tà là, mba ben Lévi tse bo ghù ngu'njù ṅam mbàa k'a tôgte là, mba mub mfa' be là, num mub ndaṅ mi;

¹⁸ njoṅ benntùn fa ntùm mbumte tse bo kite ndèn mub là, njoṅ bon bon tshob fa, zwi tshobe, nshum tshob boa ngon tshobe, nummbe bo lo ke mfà wut num fa' dù' nelàn kua' mebwô.

¹⁹ Num njoṅ tse nshum Aron fa, ghafà tshule'te tse bo ke ntswe tshwèt, ntùm ntaṅla' ntusô mub là. Bo lo tsho'te benntùn ntsi lén sobe, num neke ngabte tshu njoṅ ghafà tshule'te fa tse bandum boa ben Lévi tse bo kite ndèn mub là mba sit tusô lo.

²⁰ Tshù ju ze Ezékia ghù ntùm ngô Yuda fa là; a ghù numebwô, nu ndaṅndaṅ, nunenùn mbwe Tshùaben Nsi i.

²¹ A ghù à ngô ntù i fa, mba ke lo z'a to'te là vù lag, a nke ndiag Nsi i, num fa' ntùm Ndà Nsi, num ntshù' boa nkàn mi fa.