2 Kronika 26 - NTSHOB NSI

Nufen Ozias

¹ Njoṅ ngô Yuda fa lo' Ozias ngom i fen num dù' tàab Amatsia. A lo be be ndù a ghù ngu'njù ntshob ntôg gham.

² A b'a Ozias bèn mbèn nkut Elot, mbèn nso mum ngô Yuda. A lo be be ndù mfen yà nèn ntèt tà tse.

³ Ozias lo be jù fen ndù a ghù ngu'njù ntshob ntôg gham. A tô num ngu'njù ntshob bàa ṅam ntàn, nke ntswe Yérusalém. Lén màab na' mb'a Yékolia, mbe ngon Yérusalém.

⁴ A ghù nu ndaṅndaṅ num miag Tshùaben, kua' mba tàab Amatsia na' ngù là.

Ozias ju' ntshu mbèn nta tu Nsi

⁵ A nke nkagtùn ndiag Nsi ndùse Sakaria ke' ntùn nà. Sakaria lo ghù zenu num tse njem Nsi; a lo zin kua' mebwô ndùs'a ke ndiag Tshùaben Nsi là.

⁶ A tsho ba Filistia ntsho; a sate mi nkum kàb Gat, mi nkum kàb Yabné boa mi nkum kàb Asdod. A kut ntusô num tse tsha' Asdod mba netèt ba Filistia.

⁷ Nsi ywimt'é num ba Filistia, num ba Arab tse bo ke ntswe Gur-Baal là, njwimt'é num ben Maon.

⁸ Ben Ammon lo ke mfà tshu Ozias, nummbe lén se lo ju'ni tà nèn nkum tse ndùnsi Egipto, a bèn ntù' mèn neta.

⁹ Ozias kut ba dù' nebéb dù' Yérusalém num nzendà z'a be tôg là, num nzendà z'a be tômbo' là, num nzendà z'a be tôg là, nkut ntsham ntsiage.

¹⁰ A kut ba dù' nebéb dù' num kônkwa, ntswe' ntôntse yàme, nummb'a lo ghù nyàm yàm ntùm ntômbo' mba tun mbale, ngù ghadù' nà boa ghadù' ntù ndu' num mbat Karmél, nummb'a lo kô nu nedù' tsha' kua' mebwô.

¹¹ Ozias lo ghù ta' ntshu ntsho ba soyé, bo nke nèn ntsho à nkam nkam, ndaṅndaṅ mba Yeiél ngakite bo Maaséya ngalôte tshu mfen siaṅ yub njabte là. Bo lo ke njabte yub Hanania mo' mfen netèt fenfen mfen bèn nke ntshagte yube.

¹² Njoṅ tse fenfen tse tunndà tà tshob na' mb'a ben ntsha' bàa nkù ntôge. Bo na' mb'a ba neta nduku num ntsho.

¹³ Tshen ni na' nke ntô à ntshu ntsho z'a ghù soyé ntsha' nkù tat ngù soyé ntsha' sammbàa nkù tàn nà. Tshen soyé li lo ku'ni netomte mfen mbwe mba zit ngakeban no.

¹⁴ Ozias fà ntshètntsho, nkô, ntshe', nkum tùne, nkét boa shùmte njoṅ ntshu ntsho fa.

¹⁵ A ghù bo nabte ba masin ze mo' nkum ngave fon nabte mi là. Tshen masin nà bo ke nte à num ba dù' nebéb dù' yi, num ntôg mi, a nke ma' nkét boa ntu' ndoṅ ndùbndùb. Lén se lo ju'ni tà nkum ngùanesà, nummbe Nsi lo tomt'é kua' mebwô k'a tù' mèn neta.

¹⁶ Là, ndùs'a tù' mèn neta là, ntù i ka'te, ngù a bi. A ghù nukebwô num Tshùaben Nsi i: A tsho ntùm ndà Tshùaben num neton ba labinda num tômbwôg labinda.

¹⁷ Ngafà tshule'te Azaria tsho ze ndà njam i boa ghafà tshule'te ben ṅam fome, tse Tshùaben.

¹⁸ Bo ghù fènntù, nta tu mfen Ozias ntshob yi ndù: Ozias, o ke' ghù mba' nefà labinda Tshùaben yu tu. Yen mba' là b'a ze tse nshum Aron tse bo na' njo' yub num neke mfà ba labinda là. Tum dù' nelàne, nummb'a nukebwô là z'o tshwèt ngù là. Yen nu là ke nsi fà ghamte wù num miag Tshùaben Nsi.

¹⁹ Ntù Ozias z'a tshùb ntu' labinda bu i là ya. Mb'a ke nja ntù ghafà tshule'te là, nkin yoṅ nko' num nkô se i mbwe ghafà tshule'te, ntùm ndà Tshùaben, mbaṅ tômbwôg labinda.

²⁰ Azaria ngafà tshule'te ze ndùb boa njoṅ ghafà tshule'te fa te miag num i, njen nkin num nkô se i. Bo tèn i kua' ndende ntshag njù. Mba kua' tu wul i nànte netume, nummbe Tshùaben lo lab i.

Miagte nufen Ozias

²¹ Mfen Ozias be ngankin kà nkum lé'njù s'a kwù là. A nke ntswe ntùm mo' ba' njamnjam mb'a b'a ngankin nà. Mba nummbe bo lo sô i ntùm ndà Tshùaben. Nshum i Yotam tshùb tu ndà mfen, nke nsa' kam ntùm ngô.

²² Tshé' mfa' Ozias, mi mbwe boa mi njam, ngatshob ntshob Nsi Esaya nshum Amots lo kite.

²³ Ozias nèn ntèt tà tse, bo tshoṅ i mbaṅ tà tse ntùm nà tufi fenfen, nke ntshob ndù: A b'a ngankine. Nshum i Yotam tô num ze dù'.