2 Kronika 24 - NTSHOB NSI

Yoas ghù bo nabte Ndà nsi

¹ Yoas lo be jù fen ndù a ghù ngu'njù sammbàa, ntô num ngu'njù ṅam nkuà, nke ntswe Yérusalém. Lén màab na' mb'a Tsibja; a na' mb'a ngon Ber-Shéba.

² Yoas ghù nu ndaṅndaṅ num miag Tshùaben num njoṅ ngelaṅ fa ze Yéhoyada ngafà tshule'te ke' ntùn nà.

³ Yéhoyada diag bènnzwi bàa Yoas. Tshen bènnzwi là bwe nshumnshum boa ngonngon yi.

⁴ Yen nà be tôg Yoas ghù nkwate nenabte ba' Tshùaben.

⁵ A tse'te ghafà tshule'te boa ben Lévi, ntshob bo ndù: Bin nèn ntùm njoṅ ntusô Yuda fa, nkwé nkàb njoṅ ba Israél fa mba zit ngu'njù lo, num nenabte ba' Nsi zin yi; a bwô bin nànte num yen nu là. Là ben Lévi ke nànte tshobe.

⁶ Mfen tsiaṅ ngafà tshule'te ze ndùb Yéhoyada ntshob yi ndù: Numk'o mbe ke lôte, ngù ben Lévi lo' ntshub ze Mosé ngafa' Tshùaben na' ntshob là mfe yi Yuda mba Yérusalém nse' yi à? Yen ntshub là b'a ze bo tam tu njoṅ mbumte bon Israél fa num ntàb kwénta (mbumte) là.

⁷ Nummbe mèn kebwô Atalia boa nshumnshum tse lo sate Ndà Nsi, ngù bo lo' tshu nelàn ts'a ndà Tshùaben nà nke mfa' yi Baal.

⁸ Ndùlala mfen tshob bo nabte nkob nte nzendà z'a be ntsho ndà Tshùaben nà, nze njam njù.

⁹ Bo tswi nkùn Yuda mba Yérusalém ndù benntùn lo' ntshub Tshùaben ze ngafa' i Mosé tam tu ba Israél kônkwa là nse' yi.

¹⁰ Njoṅ fenfen fa mba ngô fa tsiaṅte num yen nu là, ndo' ntshub z'a bwô ndù bo fà là nèn ma' ntùm nkob.

¹¹ A lo ke mbe ngelaṅ ze ben Lévi yen ndù nkàb yàm ntùm nkob là, mba bo a' nèn ntèt tse ghalôte tshu mfen, ngakite mfen bo ngalôte tshu ngafà tshule'te ze ndùb, bo se' nsô nkàb ntùm nkob. Bo bèn nket nkob nte dù' i; bo nke ngù ndùlala mba sit lé'njù lo, nkwé nkàb k'a yàm neshu.

¹² Mfen bo Yéhoyada fà nkàb là ben tse bo fà fa' nenabte ba' Tshùaben bo là. Tshen ben ni bèn ndo' yub ghatshua'te ndoṅ, ghakwim tuba' num nenabte ba' Tshùaben, boa tsemo' ghafa' tùn bo fôgtab tùn num ba' Tshùaben.

¹³ Ben tse bo fà fa' bo là, nenabte tôg num mbu mube; bo tsiagte ba', a bèn nta, ntsin tù kua' neta.

¹⁴ Ndùse bo miagte fa' là, bo lo' tshé' nkàb nèn yi mbwe mfen bo Yéhoyada; bo lo' nabte tshundà yi ntùm ndà Tshùaben, tshundà num fa' mba num neton ba nyàm yi, ba ntu', boa tsemo' tshundà tse gol mba silba. Ndùse Yéhoyada ke' ntùn nà, bo nke nton ba nyàm ntùm ndà Tshùaben njoṅ ndù fa.

Yoas tatu mbwe Nsi

¹⁵ Yéhoyada ywèn kua' neshu kà nkwù; a be kwù ndù a ghù ngu'njù bon tat nkù.

¹⁶ Bo tshoṅ i ntùm tusô David boa fenfen, nummb'a lo ghù numebwô Israél, num miag Nsi mba num ba' Nsi.

¹⁷ Ngelaṅ Yéhoyada kwù là, fenfen Yuda se' ngwù mbwe mfen, ndùlala mfen ju' ntshu yube.

¹⁸ Bo ghua' ndà Tshùaben Nsi tà tshobe, nke mfa' Astarté boa ba neto. Yantù Tshùaben kam num Yuda bo Yérusalém, nummbe bo lo tsho ntùm nukebwô ndùlala.

¹⁹ Tshùaben tum ba ghatshob ntshob Nsi netèt bo ndù bo bèn ndo' yub mbèn yi mbaṅ i, là bo ke bam tshob ntag mi bo ju' là.

²⁰ Sakaria nshum Yéhoyada ngafà tshule'te dun ywèt Nsi, nèn ntèt ngô ntshob ngô ndù: Tshù mba Nsi tshob li: Numke bin nke mfàn ntshù' Tshùaben à? Be bin ke bèn ngù fen, nummbe bin ghua' Tshùaben. Tu wul i a' ghua' zin ze.

²¹ Bo ze ntsham Sakaria, ntamt'é ndoṅ mba mfen tshob là bam ntshundà ndà Tshùaben.

²² Mfen Yoas ke bèn nkwimte mebwô ze Yéhoyada tà Sakaria na' ngù yi là, nzwi nshum i. Sakaria be kwù ntshob ndù: Tshùaben yene, ngù nunetsine.

Miagte nufen Yoas

²³ Ngelaṅ ze ngu'njù mi là, ntshu ntsho ba Siria ko' nèn num Yoas, nèn Yuda mba Yérusalém. Bo zwite njoṅ fenfen fa ntùm ngô, ntum ntsha' yub fa mfen Damas.

²⁴ Ntshu ntsho ba Siria ṅwag bo mebwoṅ benntùn, mba ndùlala Tshùaben swèn mo' tonte ntshu ntsho ntùm mbu mube, nummbe bo lo ghua' Tshùaben Nsi tà tshobe. Ba Siria ghù nunetsin Yoas.

²⁵ Ndùse bo faṅ i ntùm ba sobni ndùb nèn nkum ngùanesà là, ghafa' tse ze ntsham i num lem nshumnshum Yéhoyada ngafà tshule'te. Bo zwi Yoas, num kunndà se, a kwù. Bo tshoṅ i ntùm tusô David, là ke tshoṅ i à ntùm mfi fenfen.

²⁶ Tshù ben tse bo ze ntsham i li: Zabad nshum Shimeat ngon Ammon bo Yozabad nshum Shimrit ngon Moab.

²⁷ Mbe se' mba tse nshum nà, mbe se' mba ntshob ghatshob ntshob Nsi yàm mi a kwag i là, mba mba bo nabte ba' là, bo kite ntùm ṅwa'ni kwimte fenfen. Nshum i Amatsia tô num ze dù'.