2 Kronika 23 - NTSHOB NSI

Bo yo' Yoas, ndo' i ngù mfen yi

¹ A lo be kum mbatte ngu'njù sammbàa Yéhoyada fèn ntù, ngwat kàn boa fenfen ben nkù, Azaria nshum Yérosham, Ismaél nshum Yokanan, Azaria nshum Obèd, Maaséya nshum Adaya bo Elishafat nshum Zikri.

² Tshen ben ni zinte Yuda, ntse'te ben Lévi ntùm njoṅ ntusô Yuda fa boa fenfen tse tunndà Israél fa, bo se' Yérusalém.

³ Mbumte wat kàn boa mfen ntùm Ndà Nsi. Yéhoyada tshob bo ndù: Tshù, nshum mfen nsi tô ngô, mba Tshùaben na' ntshob mfà num tse nshum David là.

⁴ Tshù ju ze bin nsi ghù li: Ta' kam benntùn num nkam mi ntat z'a fa' lé' Sabbat là, ghafà tshule'te boa ben Lévi nsi béb ba nzendà,

⁵ mbatte nkam mbàa tsinte num nzendà ba' mfen, mo' kam i tsinte num nzendà Yésod. Ngô fa z'a tù' là tswete yub bam ntshundà ba' Tshùaben.

⁶ Kà sàm mèn tsho ntùm ndà Tshùaben, k'a ke nda' ghafà tshule'te boa ben Lévi tse bo be tshwèt fa' là: Bo nsi tsho, nummbe bo b'a ben nelàne. Ngô fa nsi béb ntshundà ba' Tshùaben.

⁷ Ben Lévi nsi lam mfen num njoṅ bag tse fa, mba we lo bo se ngàn bu i. Bo nsi zwi mba we lo z'a tshwèt ndiag netsho ntùm ndà là. Bin ke ntshètte mfen ndùs'a tshwèt ntum mba ndùs'a tsho là.

⁸ Ben Lévi boa ngô Yuda fa ghù njoṅ tshu fa kua' mba ngafà tshule'te Yéhoyada tshob là. Mba we lo netèt bo lo' tse ben, ben tse bo ke ntum fa' là mba tse bo ke ntsho tshwèt fa' lé' Sabbat là; nummbe ngafà tshule'te Yéhoyada lo ke sô mba zit kam benntùn no nka,

⁹ Yéhoyada ngafà tshule'te fà nkô boa ntshètntsho ndùb boa mi nke' fenfen ben nkù. Tshen tshu là fe à David kà mbe ntùm Ndà Nsi.

¹⁰ A ghù benntùn lam mfen mbume, ngô tsinte mbaṅ i mba we lo bo ngàn bu i, nelo num bag ba' ze zwim nkum ze kwéb, mbaṅ tômbwôg mba mbaṅ ba'.

¹¹ Bo ghù nshum mfen kù'te, bo so kwa bu i bo ntshù', ngom i fen. Yéhoyada boa tse nshum yo' i ntshob ndù: Mfen te ku i num nenàfi.

¹² Atalia ju' tshu'te ngô, mba bo tshwèt nkù nde, nke ngamte mfen nà. A nèn mbaṅ ngô ntùm ndà Tshùaben, njene.

¹³ A lôte njen ndù mfen tsin tù num dù' ṅaṅa; fenfen boa nta be mbaṅ mfen. Ngô fa na' mb'a ntùm tsiaṅte, bo nke ntô ba nta, ghayobkwi boa tshu nebu' ju yi nke ntshagte nkwi mi bo ke ngamte mfen yi là. Ndùlala Atalia fagte nzwe tse, nkua' ntshob ndù: Bo ze ntsham àm! Bo ze ntsham àm!

¹⁴ Ndùlala Yéhoyada ghù fenfen ben nkù ghebte mbaṅ i, a tshob bo ndù: Bin lo' i ntum yi ntùm nka, nzwi mèn z'a fi'te netam njam i là. Nummb'a lo be be ndù ngafà tshule'te tshob ndù: Kà bo zwi Atalia ntùm ndà Tshùaben.

¹⁵ Bo fà nze yi, a tshùa num nze ze nyàmdiaṅ ke ntsho yi kà nèn ntùm ba' mfen nà. A bwe là ze bo zwi i là.

¹⁶ Yéhoyada wat kàn netèl i, ngô, bo mfen, ta' kàn s'a la'te mbe ngô a' b'a ze nzwit mèn Tshùaben nà.

¹⁷ Ngô fa tsho ntùm ndà Baal, nsat'é fafa; bo be'te ntômbwôg mi boa neto tse, nzwi Mathan ngale'te Baal mbwe ntômbwôge.

¹⁸ Yéhoyada fà mfa' ndà Tshùaben mum mbu ghafà tshule'te boa ben Lévi, tse David na' ngabte ntùm ndà Tshùaben, ndù bo ke nton ba nyàm Tshùaben, mb'a be ntùm ntshù' Mosé kite là. Bo nke ngù njoṅ i fa à netèt tsiaṅte yàm boa nkwi, kua' mba David na' ntshob là.

¹⁹ A yab ghabéb nzendà num ba nzendà ba' Tshùaben, ndùlala ndù kà sàm mèn z'a sagte là tsho bwe mba num zit mat lo.

²⁰ A lo' fenfen ben nkù, ben ndùbndùb, ben bo ghù mba' ntùm ngô là, ngô fafa, ngù mfen swe' nèn ndà Tshùaben. Bo tshùa nzendà ntshundà ntsho ndà mfen, nte mfen num diaṅkwa fen.

²¹ Ngô fa nke ntsiaṅte, tusô tswe ndù kam. Bo wat Atalia, nzwi i a kwù.